نوۆوسيبيرسك وبلىسى زاڭنامالىق كەڭەسىنىڭ ءبىرىنشى ۆيسە-سپيكەرى اندرەي پانفەروۆ كۋپينسك اۋدانىنداعى "سلادكوە" كولىن قازاقستانعا بەرۋ تۋرالى اقپاراتتىڭ جالعان ەكەنىن مالىمدەدى دەپ حابارلايدى Qamshy.kz اقپارات اگەنتتىگى.

بۇدان بۇرىن كۋپينسك اۋدانىنىڭ اكىمشىلىگى شەكارانى بەلگىلەگەنگە دەيىن "سلادكوە" كولىنىڭ ءبىر بولىگى رەسەيگە تيەسىلى بولعانىن، ال قازىرگى ۋاقىتتا تولىعىمەن قازاقستان اۋماعىنا ءتان ەكەنىن حابارلاعان. كەيىن رەسەيدەگى قازاقستان ەلشىسىنىڭ باسپا ءسوز قىزمەتى شەكارانىڭ سول كۇيى قالعانىن جەتكىزگەن.

«كولدىڭ ءبىر بولىگى بىزگە ءتان. شەكارا وزگەرگەن جوق. مەملەكەتتىڭ ءبىر اۋماعىن وزگە مەملەكەتكە بەرىپ قويۋدى وزدەرىڭىز قالاي ەلەستەتەسىزدەر؟»، – دەدى اۋداندىق پارلامەنتتىڭ ءبىرىنشى ۆيسە-سپيكەرى «كوممەرسانت» گازەتىنە بەرگەن سۇحباتىندا.

ال اۋدان اكىمشىلىگىنىڭ باسشىسى ۆلاديمير شۋبنيكوۆ «كولدى بەرۋ» تۋرالى اقپاراتتى «ەرىككەندەردىڭ شىعارىپ جۇرگەنى» دەپ سانادى.