قازاقستاننىڭ سىرتقى ىستەر ءمينيسترى قايرات ءابدىراحمانوۆ «ەكسپو-2017» كورمەسىندە افريكا كۇنىن مەرەكەلەۋ اياسىندا ءبىرقاتار افريكا ەلدەرى پاۆيلوندارىن ارالادى دەپ حابارلايدى Qamshy.kz اقپارات اگەنتتىگى ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساي وتىرىپ.

سىرتقى ساياسي ۆەدومستۆاسىنىڭ باسشىسى افريكا مەملەكەتتەرىنىڭ استاناداعى حالىقارالىق مامانداندىرىلعان كورمەسىنە بەلسەندى قاتىسقانىن اتاپ ءوتتى.

«بۇل كورمە ءارتۇرلى سالالاردا قازاقستان مەن افريكانىڭ ىنتىماقتاستىعىن كەڭەيتۋگە، سونداي-اق «جاسىل» ەكونوميكانى دامىتۋدا قازىرگى زامانعى تەحنولوگيالارعا افريكالىق ەلدەردىڭ قول جەتكىزۋىنە جاڭا مۇمكىندىگىن اشادى»، – دەدى مينيستر.

بۇگىنگى كۇنى افريكا ينۆەستيسيالاردى تارتۋ تۇرعىسىنان الەمدەگى جەتەكشى ورىنداردىڭ ءبىرىن يەمدەنەدى جانە قىزمەت كورسەتۋ، ازىق-تۇلىك جانە ەنەرگەتيكا بويىنشا الەمدەگى باسەكەگە قابىلەتتى نارىقتاردىڭ ءبىرى بولىپ سانالادى. قازاقستان افريكا مەملەكەتتەرىمەن جان-جاقتى ارىپتەستىكتى ودان ءارى دامىتۋعا قىزىعۋشىلىعىن بىلدىرەدى.

افريكا ءۇشىن ورنىقتى دامۋ ماقساتتارىنىڭ ماڭىزدىلىعىن مويىنداي وتىرىپ، استانا وڭىردەگى جانجالداردى رەتتەۋدە، ەتنوسارالىق جانە كونفەسسياارالىق ديالوگقا، كەدەيلىك پەن ساۋاتسىزدىقتى جويۋعا جانە ءارتۇرلى ەپيدەميالار مەن اۋرۋلارعا قارسى كۇرەستە بۇۇ مەن افريكا وداعىنىڭ بەلسەندى قاتىسۋىن قولدايدى.

بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە قازاقستان افريكالىق ءمۇيىز ءوڭىرى جانە بۇكىل كونتينەنتتە ۇلتتىق تاتۋلاسۋ مەن بەيبىتشىلىكتى قالپىنا كەلتىرۋ ءۇشىن ءوزىنىڭ ەلەۋلى ۇلەسىن قوسۋعا ۇمتىلادى.