بۇگىن قازاقستان رەسپۋبليكاسى ۇلتتىق مۋزەيىندە «قاسيەتتى قازاقستان» ورتالىعىنىڭ عىلىمي-ساراپتامالىق كەڭەسىنىڭ وتىرىسى ءوتتى دەپ حابارلايدى Qamshy.kz اقپارات اگەنتتىگى ق ر ۇلتتىق مۋزەيىنىڭ باسپا ءسوز قىزمەتىنە سىلتەمە جاساي وتىرىپ.

وتىرىس ماقساتى جالپىۇلتتىق دەڭگەيدەگى 100 نىساندى بەلگىلەۋ جانە تىزىمدەۋ بولدى. ءىس-شاراعا مەملەكەت تاريحى ينستيتۋتىنىڭ ديرەكتورى، پروفەسسور ب. اياعان، پروفەسسور ز. ساماشيەۆ، رەسپۋبليكالىق «ارداگەرلەر ۇيىمى» ورتالىق كەڭەسىنىڭ ءتوراعاسى، پروفەسسور ءو.وزعانبايەۆ، پروفەسسور ج. ارتىقبايەۆ سىندى ەسىمدەرى ەلگە بەلگىلى تۇلعالار قاتىستى.

«قازاقستاننىڭ جالپىۇلتتىق قاسيەتتى جەرلەرىن» بەلگىلەۋ ماقساتىنداعى عىلىمي-ساراپتامالىق كەڭەسى وتىرىسىنىڭ كۇن تارتىبىندە اتالعان ورتالىقتىڭ 2 اي ىشىندە اتقارعان جۇمىسى تۋرالى اقپارات بەرىلىپ، قازاقستاننىڭ جالپىۇلتتىق دەڭگەيدەگى كيەلى جەرلەرىن  انىقتاۋ، عىلىمي تىزىمدەۋ مەن جۇيەلەۋ ماسەلەلەرى قوزعالدى.

عالىمدار ۇسىنىلعان ءتىزىمنىڭ جوباسىن جان-جاقتى تالقىلاپ، ءوز پىكىرلەرىن اشىپ ايتتى. ت.ع.ك.، پروفەسسور زەينوللا ساماشيەۆ: «بىزدە تاريحي وقيعالار وتكەن، ءبىراق ءدال قازىرگى كۇنى ول جەردە ەشقانداي بەلگى ساقتالماعان، ەشقانداي ءىز بايقالمايتىن جەرلەر بار. قيراعان ەسكەرتكىشتەردىڭ سىنىعى نەمەسە جاي ورنى عانا قالعان نىساندار بار. الايدا تاريحي ءمانى وتە زور بولعاندىقتان، ول جەردى قۇرمەتتەپ جاتامىز. مىسالى، «تاڭبالى تاستى» الساق، تولىق قالپىنا كەلتىرۋ جۇمىستارىن قاجەت ەتەدى. ول وتە ماڭىزدى نىسان. مەنىڭ جەكە ۇسىنىسىم، بۇگىنگى كۇنى ەش بەلگىسى ساقتالماعان، ءبىراق تاريحي ماڭىزى بار ورىنداردى وسى تىزىمگە ەنگىزگەن ءجون»، – دەپ ءوز ۇسىنىسىن ايتتى.

قازاقستاننىڭ تاريحي-مادەني مۇراسى مەن الەۋمەتتىك-ساياسي ومىرىندەگى ماڭىزدى ورىن الاتىن قاسيەتتى ورىندار بۇگىندە ۇلتتىق بىرلىك پەن جاڭعىرۋ نىشانى رەتىندەگى نىساندار بولماق. «قاسيەتتى قازاقستان» ورتالىعىنىڭ ايماقتاردان العان مالىمەتتەرىنە قازاقستاندىق عالىمدار، ولكەتانۋشىلار، قوعام قايراتكەرلەرى بىرلەسە وتىرىپ، ساراپتاما جۇرگىزەدى. ال وبلىستارداعى قاسيەتتى، كيەلى جەرلەردى انىقتاۋ ءۇشىن جەرگىلىكتى مادەنيەت باسقارمالارىنىڭ جەتەكشىلىك ەتۋىمەن تاريحشىلار، عالىمدار، قوعام قايراتكەرلەرىنەن قۇرىلعان ارنايى توپتار جۇمىس ىستەۋدە.

اتالعان ورتالىقتىڭ جەتەكشىسى بەرىك ءابدىعالي ۇلى: «بۇل – بەس  جىلعا جوسپارلانعان جوبا، بيىل جالپىۇلتتىق دەڭگەيدەگى، ەلگە كەڭىنەن تانىلعان 100 نىساندى انىقتاۋ قولعا الىنعان. بۇل ءتىزىم جوباسىنا بۇگىنگى كەڭەستىڭ قورىتىندىسى بويىنشا ۇلتتىق كوميسسيا ساراپتاما جاساپ، ءبىر، ەكى اي كولەمىندە بەكىتەدى. كەسەنە، ەسكەرتكىشتەردى، ارنايى ءبىر ورىندى عانا ەمەس، ءبىز ەلباسىنىڭ ماقالاسىندا اتاپ كورسەتىلگەن سول نىساندارمەن بايلانىستى رۋحاني قۇندىلىقتاردى ناسيحاتتايمىز. ول نىسان قانداي تاريحي وقيعامەن، قانداي سالت-داستۇرمەن، قاي كەزەڭمەن بايلانىستى ەكەنىن انىقتايمىز. سول ارقىلى ۇرپاققا جات اعىمداردىڭ بوتەن پيعىلىنا قالقان بولاتىن  رۋحاني تاربيەنى ءسىڭىرۋ، ناسيحاتتاۋ، نىعايتۋدى ماقسات ەتىپ وتىرمىز»، – دەپ ورتالىقتىڭ ماقساتىن ايقىنداپ ايتىپ بەردى.