الماتى وبلىسىنىڭ قاراساي اۋدانىندا رۇقسات ەتىلمەگەن جەردە قوردالانعان قوقىس الاڭى ءبىر ايدىڭ ىشىندە تولىقتاي تازارتىلادى. بۇل تۋرالى وبلىس اكىمى اماندىق باتالوۆتىڭ قاراساي اۋدانىنا جاساعان جۇمىس ساپارى كەزىندە بەرگەن تاپسىرماسىنان بەلگىلى بولدى، دەپ حابارلايدى Qamshy.kz اقپارات اگەنتتىگى الماتى ايماق باسشىسىنىڭ باسپا ءسوز قىزمەتىنە سىلتەمە جاساپ.

ءوڭىر باسشىسى قازىرگى ۋاقىتتا اۋماعى قورشالىپ، جابىق تۇرعان جالپاقساي اۋىلىندا ورنالاسقان قوقىس الاڭىندا بولىپ، وبلىسقا قاراستى بارلىق اۋدان، قالا اۋماقتارىنداعى سانيتارلىق جاعدايدى دەرەۋ قالپىنا كەلتىرۋدى تاپسىردى. جانە دە وبلىستاعى بارلىق رۇقسات ەتىلمەگەن كۇل-قوقىس الاڭدارىن جويۋعا باعىتتالعان شارالاردى كۇشەيتۋدى قاتاڭ ەسكەرتتى.

«مىنا قوقىس الاڭىنىڭ كوزىن تەز ارادا جويۋ كەرەك. اتقارىلار جۇمىس اۋقىمدى، دەسەك تە بارلىق جۇمىستاردى ءبىر ايدىڭ كولەمىندە اياقتاۋلارىڭىز قاجەت. وسى ىسپەن قاتار وبلىستاعى بارلىق قوقىس الاڭدارىن جويۋدى قولعا الىڭىزدار. وسىنداي اشىق-شاشىق قوقىس ورىندارى ازاماتتاردىڭ دەنساۋلىعى مەن ءوڭىردىڭ ەكولوگيالىق جاعدايىنا كەرى اسەرىن تيگىزەدى. سول سەبەپتى اتالعان جۇمىسقا زور جاۋاپكەرشىلىكپەن قاراڭىزدار»، - دەدى ا. باتالوۆ.

سونىمەن قاتار وبلىس اكىمى اۋدانداعى قوقىس الاڭىن تولىعىمەن تازارتۋمەن اينالىساتىن «تاۋسامالى» مقك قىزمەتكەرلەرىن قاجەتتى تەحنيكامەن قامتاماسىز ەتۋدى اۋدان باسشىلىعىنا تاپسىردى. ال وبلىستىق جانە اۋداندىق جاۋاپتى مەكەمە باسشىلارىنا قانداي دا ءبىر ورىندا وسىنداي قوقىس الاڭدارى پايدا بولا باستاعان جاعدايدا، دەرەۋ حابارلاۋدى ەسكەرتتى. رۇقسات ەتىلمەگەن جەرلەردە قوقىس الاڭدارىنىڭ پايدا بولۋىنا جول بەرگەن ازاماتتاردىڭ ىسىمەن قارجى پوليسياسى مەن پروكۋراتۋرا قىزمەتكەرلەرى اينالىساتىندىعىن باسا ايتتى.

ەستەرىڭىزگە سالار بولساق، رۇقسات ەتىلمەگەن قوقىس الاڭدارىنىڭ ماسەلەسىن تۇبەگەيلى شەشۋ ماقساتىندا، وبلىس اۋماعىندا قوقىستى وڭدەۋ سالاسىن بەلسەندى تۇردە دامىتۋ شارالارى قولعا الىنعان. ماسەلەن، بۇگىنگى كۇنى «الماتى وبلىسىنىڭ اۋماعىنداعى قوقىس قالدىقتارىن باسقارۋدىڭ وڭىرلىك جۇيەسىنىڭ» تەحنيكالىق-ەكونوميكالىق نەگىزدەمەسى ازىرلەندى. سونىڭ شەڭبەرىندە مەملەكەتتىك-جەكەمەنشىك ارىپتەستىك مەحانيزمدەرىن قولدانا وتىرىپ، 16 قوقىس سۇرىپتاۋ كەشەنىن، 13 قوقىستى قايتا جۇكتەۋ ستانسالارىن، 16 پوليگون مەن 3 قوقىس وڭدەۋ زاۋىتىنىڭ قۇرىلىسىن جۇرگىزۋ جوسپارلانعان.