"Dancing Zhetysu" - ءدال وسىنداي اتاۋمەن الماتى وبلىسىندا تىڭ جوبا قولعا الىندى، - دەپ حابارلايدى Qamshy.kz اقپارات اگەنتتىگى.
ەلباسىنىڭ "بولاشاققا باعدار: رۋحاني جاڭعىرۋ" ماقالاسى جارىق كورگەلى وبلىس اۋماعىندا ىلكىمدى ىستەر اتقارىلىپ كەلەدى. اسىرەسە، ۇلتتىق بي ونەرىن تۋريزم سالاسىمەن ۇشتاستىرا وتىرىپ، تابيعاتتىڭ تاڭعاجايىپ تۋىندىلارىن تاماشالاۋعا مۇمكىندىك بەرەتىن جاڭا Dancing Zhەtysu كوپشىلىكتى قىزىقتىرىپ جاتىر.
جەتىسۋ جەرىنىڭ تۇمسا تابيعاتتىڭ الەمگە تانىتۋ ءارى تۋريزم سالاسىنا جاڭاشا باعدار بەرۋ ماقساتىندا قولعا الىنعان جوبا تۋرالى اۆتور ادىلبەك ابيلوۆ باسپاسوز-كونفەرەنسياسىندا جان-جاقتى بايانداپ بەردى. ونىڭ ايتۋىنشا، اتالمىش جوباعا وبلىستىق وڭىرلىك كوممۋنيكاسيالار قىزمەتى مەن "تالدىقورعان اۋەندەرى" فولكلورلىق-ەتنوگرافيالىق ءان-بي ءانسامبلىنىڭ مىڭ بۇرالعان بيشىلەرى قاتىسقان. ولار جەتىسۋدىڭ كولساي، شارىن، قايىندى، التىن ەمەل سىندى كورىكتى جەرلەرىندە ارنايى ءتۇسىرىلىم جاساعان.
كەلەسى تۇسىرىلىمدەر توتىدايىن تارانىپ، كۇن سايىن قۇلپىرىپ كەلە جاتقان تالدىقورعان قالاسىنىڭ كورىكتى جەرلەرىندە ىسكە اسپاق.
"ەڭ العاش ۇسىنىس تۇسكەندە زور جاۋاپكەرشىلىك جۇگىن ارقالاۋ وڭاي بولمادى. الايدا جەتىسۋلىق بەلسەندى جاستاردىڭ ەل مۇددەسىن ويلاپ، وسىنداي تىڭ جوبا ويلاپ تاپقاندارىنا از دا بولسا ءوز ۇلەسىمدى قوسۋدى پارىزىم سانادىم. ماعان تابيعات اياسىندا بيلەگەن وتە قاتتى ۇنادى. بۇل تەك مەنى عانا ەمەس، سونىمەن قاتار ارىپتەستەرىمدى دە شابىتتاندىرا ءتۇستى. نەبارى ءتورت كۇنگە سوزىلعان ءتۇسىرىلىم قىزىقتى ءوتتى. جۇمىس بارىسى دا ەش قيىندىق تۋعىزعان جوق. سەبەبى، ءوز كاسىبىن جاقسى مەڭگەرگەن بىلىكتى ماماندارمەن تىعىز بايلانىستا جۇمىس جاسادىق. ال وسى جوباعا دايىندالعان ءبيىمىزدى شىعارۋ ءۇشىن كوپ تەر توكتىك. بي جەتىسۋ ولكەسىنىڭ ءار جەرىندە بيلەنەتىندىكتەن، وعان ساي كوستيۋم مەن قويىلىمنىڭ ساي كەلۋى باستى ورىندا تۇردى جانە ءاربىر ءىس-قيمىلدا وزىندىك سىر جاتىر دەسەك تە بولادى. وسىمەن بىرگە، جالپى جوبانىڭ ۇيىمداستىرۋشىسى مەن قولداۋ كورسەتكەن الماتى وبلىستىق ىشكى ساياسات باسقارماسىنا العىسىمىز شەكسىز"، - دەيدى "تالدىقورعان اۋەندەرى" فولكلورلىق-ەتنوگرافيالىق ءانسامبلىنىڭ ءبيشىسى سارا قايىرجانوۆا.
الداعى ۋاقىتتا ەكى ۇجىم بىرلەسىپ جۇيەلى جۇمىس جاساماق نيەتتە. "زامانىڭ تۇلكى بولسا تازى بوپ شال" دەگەندەي، جاستاردىڭ جارقىن بولاشاققا جاساعان جوباسى كوپشىلىك كوڭىلىنەن شىعادى دەگەن ويدامىز.
