الماتىنىڭ تاريحي ورتالىعىنىڭ ۇشتەن ءبىرىن قايتا جاساۋ جۇمىستارى جالعاسىپ جاتىر، - دەپ حابارلايدى Qamshy.kz اقپارات اگەنتتىگى.
الماتى اكىمى باۋىرجان بايبەك كەزەكتى جۇمىس ساپارى اياسىندا جاياۋ جۇرگىنشىگە باسىمدىق بەرەتىن قابانباي باتىر، پانفيلوۆ، جىبەك جولى، گوگول كوشەلەرى مەن "استانا" الاڭىن قايتا جاڭعىرتۋدىڭ بارىسىن تەكسەردى. الماتىنىڭ تاريحي ورتالىعىنىڭ ۇشتەن ءبىرىن قايتا جاساۋ، قالانىڭ جولدارى مەن ينجەنەرلىك جەلىلەرىن سالۋ مەن جوندەۋ جەرگىلىكتى كاسىپورىنداردىڭ جۇكتەمەسىن قامتاماسىز ەتىپ، 43 مىڭ جۇمىس ورنىن قۇرۋعا ىقپال ەتتى.
باسپا ءسوز قىزمەتىنىڭ مالىمەتىنشە، مەگاپوليس باسشىسىنا اتالعان ۋچاسكەلەردە ينجەنەرلىك جەلىلەردىڭ اۋىستىرىلعانى، عيمارات سىرتىنىڭ جاڭارعانى، ءبىرىڭعاي ءستيلدىڭ ەنگىزىلگەنى، گرانيت تاستاردىڭ توسەلگەنى باياندالدى.
سونداي-اق، اكىمدىكتەگىلەردىڭ ايتۋىنشا، قابانباي باتىر كوشەسىنىڭ ەكى جاعىنان تولەبايەۆ پەن ابىلايحان كوشەلەرىنىڭ اراسىنا بىرنەشە كۇن ىشىندە تاس توسەۋ جۇمىستارى اياقتالادى. گوگول كوشەسى بويىندا جاسىل جەلەكتى سۋاراتىن جۇيە تارتىلۋدا، قالداياقوۆ پەن جەلتوقسان كوشەلەرىنىڭ اراسىنا تاس توسەۋ قىركۇيەكتىڭ باسىندا ىسكە اسادى. "استانا" الاڭىندا قوزعالىس جولاعى ازايعان، قۇرعاق فونتانداردى مونتاجداۋ جۇمىستارى ءجۇرىپ جاتىر، تاس توسەۋ دە اياقتالىپ قالدى. الاڭ قىركۇيەك ايىنىڭ باسىندا اشىلادى.
اكىمنىڭ باسپا ءسوز قىزمەتىندەگىلەر الماتى اكىمى جۇرگىنشى تروتۋارلارىنا تەگىس، ساپالى ءارى ەكولوگيالىق تازا گرانيت پليتكالاردى توسەۋ، جايلى كوشە جيھازدارىن قويۋ، ءتۇرلى اعاشتاردى وتىرعىزۋ، ارىقتاردان سۋ اعىزۋ، كولىكتىڭ بولماۋى، رەتسىز جاسالعان جارنامانىڭ، سىرتى ابدەن ەسكىرگەن فاسادتاردىڭ جويىلۋى قالا ورتالىعىن بارىنشا جايلى ءارى تانىمال ەتەتىنىن اتاپ ءوتتى.
جالپى، جاڭا تاس توسەلگەن، ورىندىقتار، كىشى ءپىشىندى ارحيتەكتۋرالىق فورمالار قويىلعان، جارىق كوزدەرى ورناتىلعان، جاسىل جەلەكپەن كومكەرىلگەن، دەمالىس ايماقتارى، بالالار الاڭدارى، ۆەلوجولدارى جاسالعان بارلىق وبەكتىلەر 16 قىركۇيەكتە دايىن بولادى دەپ جوسپارلانعان. اتاپ وتەرلىك جايت، ماماندار اعاش وتىرعىزۋدى كۇز مەزگىلىندە باستاۋ تۋرالى شەشىم قابىلداعان. بۇلار تامىر جايعان اعاشتار: قايىڭ، تەرەك جانە باسقالارى. بارلىعى 330 مىڭ م2. جاسىلداندىرىلادى.
اكىمدىكتىڭ مالىمەتىنشە، قالادا بارلىق ماگيسترالدى كوشەلەردەگى جولدارعا ورتاشا جوندەۋ جۇمىستارىن جۇرگىزۋ اياقتالدى. قىركۇيەكتىڭ باسىندا اسقاروۆ كوشەسىنىڭ بويىنداعى سۋ قۇبىرلارىن جانە قازىبەك بي، مامەتوۆا ، ماسانچي كوشەلەرىنىڭ بويىنداعى ۋچاسكەلەردە جىلۋ جۇيەلەرىن قايتا جاساۋ جۇمىستارى قىركۇيەكتە اياقتالادى. سونىمەن قاتار، 14،7 شاقىرىم ارىق جەلىلەرى، 57 كوشەدەگى 42،2 شاقىرىم ارىق جۇيەلەرى قايتا جاسالۋدا.
جىل اياعىنا دەيىن 102 وتپەلى جولعا جارىق ءتۇسىرىلىپ، ولار قايتا جاڭارادى. بيىل ءار اۋداندا 472 جاڭا اۋلا الاڭدارى، ەكىدەن جۇرگىنشى ايماقتارى پايدا بولادى.
