بۇگىن قالالىق ساياباقتا اقمولا وبلىستىق ولكەتانۋ مۇراجايىنىڭ ۇيىمداستىرۋىمەن ەلباسىمىزدىڭ «رۋحاني جاڭعىرۋ» ماقالاسى بويىنشا جانە استانا قالاسىنداعى حالىقارالىق ەكسپو-2017 كورمەسىنە وراي قولونەر شەبەرلەرىنىڭ جارمەڭكەسى ءوتتى. مۇندا كوكشەتاۋ جانە ششۋچينسك قالالارى قولونەرشىلەرىنىڭ تۋىندىلارى ۇسىنىلدى، دەپ حابارلايدى Qamshy.kz اقپارات اگەنتتىگى اقمولا وبلىسى ىشكى ساياسات باسقارماسىنىڭ وڭىرلىك كوممۋنيكاسيالار قىزمەتىنە سىلتەمە جاساي وتىرىپ.
كورمەگە اتالعان قالالاردان بارلىعى 57 قولونەرشى قاتىسقان. اقمولا وبلىستىق ولكەتانۋ مۇراجايىنىڭ جالپىعا ورتاق تاريحي ءبولىمىنىڭ اعا عىلىمي قىزمەتكەرى ايمان سالمۋحامەدوۆانىڭ ايتۋى بويىنشا، جارمەڭكەدە ءار ءتۇرلى جانرداعى، باعىتتاعى، ءار ءتۇرلى ستيلدەگى، تۋىندىلار ۇسىنىلعان. اتاپ ايتقاندا، تابيعي تاستاردان جاسالعان اشەكەي بۇيىمدارى، توقىلعان كورزينالار مەن پورترەتتەر، تەرىدەن جانە اعاشتان جاسالعان بۇيىمدار بولعان.
قاتىسۋشىلاردىڭ قاتارىندا اعاشتان حالقىمىزدىڭ ءداستۇرلى جيھازدارىن، مۋزىكالىق اسپاپتارىن جاسايتىن شوقان ەلامانوۆ بولدى. شوقان اعانىڭ ونەرىن بالاسى شىڭعىس تا جالعاستىرىپ كەلەدى. ۇلتتىق ناقىشتاعى دۇنيەلەردى دايىندايدى.
سونىمەن قاتار، ششۋچينسك قالاسىنان كەلگەن راشيت مينيحانوۆ كوركەم فوتوسۋرەتپەن اينالىساتىنىن، ءارى قالامىزدا وسىنداي جارمەڭكەلەردى، كەم دەگەندە، جىلىنا ءۇش رەت ۇيىمداستىرىپ تۇرۋ كەرەكتىگىن اتاپ ءوتتى.
