قازاقستان رەسپۋبليكاسىنىڭ مەملەكەتتتىك حاتشىسى الماتىعا جاساعان جۇمىس ساپارى اياسىندا قالانىڭ ءبىرقاتار مادەني نىساندارىندا بولدى، دەپ حابارلايدى Qamshy.kz اقپارات اگەنتتىگى الماتى قالاسى اكىمدىگىنىڭ باسپا ءسوز قىزمەتىنە سىلتەمە جاساپ. گۇلشارا ءابدىحالىقوۆا 1931-1933 جىلدارداعى اشارشىلىق قۇرباندارىنىڭ ەسكەرتكىشىنە گۇل شوقتارىن قويدى، سونىمەن قاتار الماتى مۇراجايىنىڭ ەكسپوزيسيالارىمەن تانىستى.

ق ر مەملەكەتتىك حاتشىسى الماتى اكىمىمەن بىرگە «رۋحاني جاڭعىرۋ» باعدارلاماسى اياسىندا بيىلعى جىلدىڭ مامىر ايىندا قاراعايلى سكۆەرىندە اشارشىلىق جىلدارىنىڭ قۇرباندارىنا ورناتىلعان ەسكەرتكىشكە گۇل شوقتارىن قويدى. قولا مەن گرانيتتەن قۇيىلعان ءتورت مەترلىك مونۋمەنت بالاسىن كەۋدەسىنە قىسقان انا سكۋلپتۋراسىن بەينەلەيدى.

گۇلشارا ءابدىحالىقوۆا قالانىڭ 1000 جىلدىعى مەرەكەسى اياسىندا اشىلعان الماتى مۇراجايىنىڭ ەكسپوزيسيالارىمەن تانىستى. مۇراجاي مەگاپوليستىڭ ءىرى عىلىمي جانە مادەني ورتالىعى بولىپ تابىلادى، مۇندا ءوڭىردىڭ تاريحي-مادەني مۇراسىنىڭ بارلىق سپەكترى كورىنىس تاپقان. مۇراجاي كوللەكسياسى 40 مىڭعا جۋىق ەكسپوناتتاردان تۇرادى، ولاردىڭ اراسىندا كوركەمونەر شىعارمالارى، قازاق ەتنوگرافياسىنىڭ قۇندى جيىنتىعى، ءتۇرلى داۋىردەگى تۇرمىستىق زاتتار كوللەكسياسى، نۋميزماتيكا جانە باسقالارى بار.

ق ر مەملەكەتتىك حاتشىسى ءدال وسى كۇنى «قالا كۇنى» مەن «استانا ەحرو-2017» حالىقارالىق كورمەسىنە ورايلاستىرىلعان حالىقارالىق «الماتى كوك-توبە وpera – 2017» فەستيۆالىنە قاتىسادى. فەستيۆال ساحناسىندا اباي اتىنداعى مەملەكەتتىك وپەرا جانە بالەت تەاترى سيمفونيالىق وركەسترىنىڭ سۇيەمەلدەۋىمەن قازاقستاندىق ۇزدىك سوليستەر مەن الەمدىك وپەرا جانە بالەت جۇلدىزدارى ونەر كورسەتەدى.

بۇلاردان وزگە، گۇلشارا ءابدىحالىقوۆا جاڭارتىلعان «سۇلۋشاش» پاننوسىنىڭ اشىلۋىنا قاتىسادى. سۋرەتشى مولداحمەت كەنبايەۆ پەن مونۋمەنتاليست نيكولاي سيۆچينسكيي جاساعان قولىنا ۇلتتىق زەرگەرلىك بۇيىمداردى تاققان قىز بەينەسى 70ء-شى جىلدارى دوستىق داڭعىلىنىڭ بويىنداعى ءبىر ءۇيدىڭ قابىرعاسىنا قويىلعان بولاتىن. سۋرەتشىنىڭ ۇلى الپامىس كەنبايەۆتىڭ ارقاسىندا الماتى قالاسىنى اكىمدىگىنىڭ قولداۋىمەن پاننو سمالتادان قايتا جاسالىپ، الماتىنىڭ ەڭ كورىكتى جەرى – كوكتوبەگە قويىلدى.