اقش-تىڭ تەحاس شتاتىندا ورنالاسقان حيۋستون قالاسىندا سۋ تاسقىنى بولىپ جاتىر. ناتيجەسىندە 2000 ادام ءقاۋىپسىز جەرگە شىعارىلدى. سۋ تاسقىنىنا "حارۆي" داۋىلى سەبەپ بولعان دەپ حابارلايدى Qamshy.kz اقپارات اگەنتتىگى بي-بي-سي مالىمەتىنە سۇيەنىپ.
اتالعان شتاتتىڭ باسقا دا اۋداندارىندا نوسەر جاۋىن قۇيىپ تۇر. ۇلتتىق مەتەورولوگيالىق قىزمەتتىڭ مالىمەتى بويىنشا، قالا اۋماعىندا توتەنشە جاعداي جاريالانعان، مۇندا كولىك قاتىناسى قيىنداپ كەتكەن.
سونداي-اق، بەس ادامنىڭ قازا تاپقانى تۋرالى دەرەك بار. الايدا ازىرگە تەك 2 ادامنىڭ قازاسى ناقتىلاندى.
گۋبەرناتور گرەگ ەببوتتىڭ سوزىنشە، قالاعا 50 سم جاۋىن-شاشىن تۇسكەن. ودان بولەك 40 سم جاۋىن-شاشىن ءتۇسۋى ىقتيمال. قۇتقارۋشىلاردىڭ جۇمىسىن قاتتى جەل تىپتەن قيىنداتىپ جىبەرگەن. وعان قوسا مىڭداعان ادام جارىقسىز قالعان.
