بۇگىن ۇلتتىق ۇلاننىڭ ەلوردا تۇبىندەگى جەدەل قۇراماسىندا قىزمەت بابىندا قايسارلىقتىڭ ايقىن ۇلگىسىن كورسەتكەن 9 اسكەري قىزمەتشىنى قۇرمەتتەۋ كەشى ءوتتى دەپ حابارلايدى Qamshy.kz اقپارات اگەنتتىگى ۇلتتىق ۇلان باسپاسوزقىزمەتىنە سىلتەمە جاساپ. توتەنشە جاعدايلار كوميتەتى ءتوراعاسىنىڭ بۇيرىعىمەن ساربازدار «ورتتە كورسەتكەن قايسارلىعى ءۇشىن» مەدالىمەن، «قۇتقارۋ وپەراسيالارىنا بەلسەندى قاتىسقانى ءۇشىن» جانە ءىىى دارەجەلى «قۇتقارۋشى» كەۋدە بەلگىلەرىمەن ماراپاتتالدى. اتالمىش ءىس-شاراعا ۇلتتىق ۇلان باس قولباسشىلىعى، توتەنشە جاعدايلار كوميتەتىنىڭ وكىلدەرى، ورتەنگەن كوپقاباتتى ءۇيدىڭ تۇرعىندارى، وجەتتىك تانىتقان ساربازداردىڭ تۋعان-تۋىستارى جانە 5573 اسكەري ءبولىمىنىڭ جەكە قۇرامى قاتىستى.
- جەدەل قۇرامانىڭ جاۋىنگەرلەرى كۇندەلىكتى قىزمەتىمەن ەلوردامىزدىڭ تىنىشتىعىن، ازاماتتارىمىزدىڭ قاۋىپسىزدىگىن كۇزەتىپ وتىر. وقىس وقيعا، توتەنشە جاعداي كەزىندە بەيبىت تۇرعىننىڭ ومىرىنە بەيجاي قاراماي، ءوز باستارىن قاۋىپكە تىگىپ، ەرلىكتىڭ ۇلگىسىن كورسەتتى، مىنە. بۇگىنگى ماراپاتتار – جاۋىنگەرلەرگە بەرىلگەن لايىقتى باعا دەپ ەسەپتەيمىن. «ەلىم دەپ ەڭىرەگەن ەرىڭ بولماسا، ەرىن قادىرلەيتىن ەل قايدان بولماق» دەمەكشى، ۇلانداردىڭ قىزمەتىن ەلەپ، باسشىلىقتار جەەدەل تۇردە بۇيرىق شىعارىپ، باسقا دا ساربازدارعا ۇلگى ەتىپ وتىر، - دەيدى ۇلتتىق ۇلاننىڭ تاربيە جانە الەۋمەتتىك-قۇقىقتىق جۇمىستار باس باسقارماسىنا قاراستى ءتىل ساياساتى جانە اقپاراتتاندىرۋ ءبولىمىنىڭ باستىعى پودپولكوۆنيك الىشەر ءابدىراسىلوۆ. ول سونداي-اق، باتىل دا ەرجۇرەك ازاماتتاردى تاربيەلەپ-وسىرگەندەرى ءۇشىن ساربازداردىڭ جاقىندارىنا العىس ءبىلدىردى.
العىر ازاماتتار: اسكەري جاساق كەزەكشىسى اعا لەيتەنانت جەڭىس قۇرامىسوۆ، پاترۋلدىك توپ باستىعى كىشى سەرجانت بەكسۇلتان نيازىمبەتوۆ، اسكەري جاساق باستىعى قاتارداعى الماس قالىمتاي جانە پاترۋلدەر – باۋىرجان قۇسپانوۆ، سۇراعان سەرعالييەۆ، ناعاشبەك ۇسەنباي، داۋلەت كەتەركەيەۆ، ەرسۇلتان ابدۋساماتوۆ، الكەي قۇربانبەك ۇلتتىق ۇلان باس قولباسشىسىنىڭ بۇيرىعىمەن ءىى دارەجەلى «ۇلتتىق ۇلان قىزمەتىنىڭ ۇزدىگى»، اسكەر سيمۆوليكاسى بەلگىلەنگەن قولساعاتتارمەن، 5573 اسكەري ءبولىم كومانديرىنىڭ بۇيرىعىمەن «قوعامدىق ءتارتىپتى ساقتاعانى ءۇشىن» كەۋدە بەلگىلەرىمەن جانە گراموتالارمەن ماراپاتتالدى.
- جۇبايىم جىلاپ حابارلاسقاندا، نە ىستەرىمدى بىلمەدىم. مەن كەلگەنشە جاۋىنگەرلەر ايەلىم مەن بالالارىمدى دا، مۇلكىمىزدى دە ساقتاپ قالىپتى. بۇرىن دا ەستىپ جاتامىز عوي، ۇلتتىق ۇلاننىڭ جىگىتتەرى ادامدارعا كومەكتەسىپتى دەپ. بۇل جولى ءوزىم كۋا بولىپ وتىرمىن. ءتونىپ تۇرعان قاۋىپتەن جانىمىزدىڭ امان قالعانى الدىمەن اللانىڭ، سوسىن وسى ازاماتتاردىڭ ارقاسى. دەر كەزىندە كومەككە كەلگەن ساربازدارعا دا، ولاردى وسىلاي تاربيەلەگەن كومانديرلەرىنە دە وتباسىمىزدىڭ اتىنان ۇلكەن العىس ايتامىز، - دەيدى وتاعاسى ش. ەركەتاي.
وقيعا 21 قىركۇيەك كۇنى كەشكى 19.30 شاماسىندا استانا قالاسىنىڭ الماتى اۋدانىن كەنەسارى كوشەسى 51 ءۇيدىڭ 3-قاباتىندا بولعان. سول ماڭدا كوشە ءتارتىبىن قاداعالاپ جۇرگەن ۇلاندىقتار جەدەل ارەكەتىمەن تۇرعىنداردى ءقاۋىپسىز جەرگە شىعارىپ، ءورتتى اۋىزدىقتاعان.
