قازاقستان سىرتقى ىستەر مينيسترلىگى تۇركيادا جول اپاتىنان زارداپ شەككەن قازاقستاندىقتارعا قاتىستى پىكىر ءبىلدىردى، دەپ جازادى Qamshy.kz اقپارات اگەنتتىگى.

ق ر ءسىم باسپا ءسوز قىزمەتىنىڭ مالىمەتىنە سۇيەنسەك، الماتى مەن تالدىقورعاننان بارعان قازاقستاندىق 7 تۋريست تۇركيانىڭ كەمەر قالاسىندا جول اپاتىنا ءتۇستى. سونىڭ سالدارىنان تۇركيانىڭ 4 ازاماتى قازا تاپتى. قازاقستاندىق تۋريستەر امان، الايدا بىرنەشە جاراقات العان. وقيعا 21 قىركۇيەكتە بولعان.

«قازاقستاننىڭ انتالياداعى ەلىشىلىگى ءبىزدىڭ ازاماتتارمەن ءاردايىم بايلانىستا، اۋرۋحاناعا بارىپ تۇرادى. جەتى دوس انتالياعا وزدەرى بارعان، وكىنىشكە قاراي، ساقتاندىرۋ ءپوليسى بولماعان. سوندىقتان جول اپاتىنان كەيىن وتانىڭ جانە مەديسينالىق قىزمەتتەردىڭ اقىسى بويىنشا قيىندىقتار تۋدى. الايدا ءبىزدىڭ ديپلومات تۇرىك تاراپىمەن بەس ازاماتتىڭ مەديسينالىق شىعىندارىن قازا بولعان تاكسي جۇرگىزۋشىسىنىڭ ساقتاندىرۋ كومپانياسىنا تولەتۋگە قول جەتكىزدى. قالعان ەكى ازاماتتىڭ وتا اقىسى بويىنشا ماسەلەسى شەشىلىپ جاتىر»، – دەدى ق ر ءسىم باسپا ءسوز قىزمەتىنىڭ جەتەكشىسى ءانۋار جايناقوۆ.

جايناقوۆتىڭ ايتۋىنشا، ءقازىر جاراقات العانداردىڭ جاعدايلارى تۇراقتى. ەكەۋىنىڭ جامباس بۋىنى سىنعان، ءبىر قىز باستان قاتتى سوققى العان، ۇشەۋى دە وزدىگىنەن قوزعالا المايدى. ولاردى قازاقستانعا تاسىمالداۋدى ۇيىمداستىرۋ ماسەلەلەرى شەشىلىپ جاتىر.