اقتوبەلىكتەر ليەۆون ميرزوياننىڭ ەسكەرتكىشىن الىپ تاستاۋدى تالاپ ەتتى. تالاي قازاقتىڭ ولىمىنە سەبەپشى بولعان ادامدى ۇلىقتاۋدىڭ قاجەتى جوق دەپ سانايدى جۇرت. ءبىراق مۇنىمەن ارميان دياسپوراسىنىڭ وكىلدەرى كەلىسپەيدى. كەرسىنشە «مىرزاجان» اتىمەن ءمالىم ميرزوياننىڭ كۇناسى ءالى انىقتالمادى دەگەن پىكىردە. دەسە دە مەملەكەتتىك ينسپەكتورلار قالانىڭ قاق ورتاسىنداعى كوكتاستىڭ زاڭسىز ورناتىلعانىن مالىمدەدى، - دەپ حابارلايدى Qamshy.kz اقپارات اگەنتتىگى كتك تەلەارناسىنا سىلتەمە جاساپ.

تەلەارنا تىلشىلەرىنىڭ مالىمەتىنشە، ءقازىر اقتوبەنىڭ قاق ورتاسىنداعى بۇل كوكتاستى جوق قىلۋدى قالايتىندار كوپ. اسىرەسە، قۋعىن-سۇرگىن قۇرباندارى ۇرپاقتارىنىڭ جانىن جەگىدەي جەپ ءجۇر. ويتكەنى، قازاقستاندى 30-جىلداردىڭ اياعىندا باسقارعان ليەۆون ميرزوياننىڭ كەسىرىنەن مىڭداعان ادامنىڭ جازىقسىز اتىلعانى قۇجاتتارمەن ايعاقتالعان. "قىزىل تەرروردى" ۇيىمداستىرۋعا بەلسەنە اتسالىسقان ادامدى ۇلىقتاۋعا نەگىز جوق ەكەنىن ايتادى.

"بۇل  قازاق حالقىن ءبىر قولىمەن باسىنان سيپاپ، ەكىنشى قولىمەن قاندى قولىمەن قازاقتىڭ تالاي بەلسەندىلەرىن، تالاي اتالارىمىزدى قىرعانى بەلگىلى بولىپ تۇر. نەگە سولاردى قىرعان ادامعا قالانىڭ قاق ورتاسىنان ەسكەرتكىش قويادى؟ نەگە وعان كوشە بەرىلەدى؟ بىزدەر وسى بيلىكتەن زاڭدى تۇردە وسى ەسكەرتكىشتى الۋىن تالاپ ەتەمىز. سۇرامايمىز، تالاپ ەتەمىز"، - دەيدى اقتوبە قالاسىنىڭ تۇرعىنى باقىتجان قۇرمانوۆ.

سونداي-اق، ليەۆون ميرزويانعا ارنالعان ەسكەرتكىشتىڭ وسىدان تۋرا 20 جىل بۇرىن قالانىڭ قاق ورتاسىنا ورناتىلعانى ايتىلادى. ونى كوك تاستان قاشاتىپ، كەتەر قاراجاتىن بارلىعىن جەرگىلىكتى كاسىپكەر ترەتەريان ءوز موينىنا العان ەكەن. ول مەسەناتتىعى تۋرالى ەسكەرتكىشتىڭ تومەنگى بولىگىنە جازدىرىپ تا قويعان.  

ءدال وسى ەسكەرتكىشتى ءسۇرىپ تاستاۋعا ارميان دياسپوراسىنداعىلار قارسى. ءتىپتى ميرزوياننىڭ كۇناسىن كەشۋ كەرەك دەگەندى ايتادى.

"ءبىز كوشە اتى مەن ەسكەرتكىش بۇرىنعى قالپىندا قالۋ كەرەك دەپ ەسەپتەيمىز. سەبەبى، بەيكۇنا ادام بولمايدى. كۇناسى بولسا، ىستەگەن جاقسىلىعىمەن دە تارازىلاپ كورۋ كەرەك"، - دەيدى اقتوبە وبلىستىق ارميان دياسپوراسى اقساقالدار القاسىنىڭ ءتوراعاسى ارۋتيۋن ميكاەليان.

20 جىل بويى قالانىڭ قاق ورتاسىندا تۇرعان بۇل ەسكەرتكىش ەش جەردە تىركەۋدە جوق. ماماندار ونىڭ زاڭسىز ورناتىلعانىن ەندى ايتىپ وتىر.

"ليەۆون ميرزوياننىڭ ەسكەرتكىش بەلگىسى بىرىنشىدەن اقتوبە وبلىسىنداعى جەرگىلىكتى ماڭىزى بار تاريحي جانە مادەني ەسكەرتكىشتەر مەملەكەتتىك ءتىزىمى دەگەن بار.  بۇل ەسكەرتكىش بەلگى سول تىزىمدە جوق. سوندىقتان دا ونى الىپ تاستاۋعا بولادى"، - دەيدى اقتوبە وبلىستىق تاريحي-مادەني مۇرالاردى قورعاۋ جونىندەگى مەملەكەتتىك ينسپەكسياسىنىڭ باس ينسپەكتورى فارحاد دوسمۇراتوۆ.

اقتوبەلىكتەر بولشيەۆيكتىڭ اتىنداعى كوشە اتاۋىن دا وزگەرتۋدى بىرنەشە جىل بويى بيلىكتەن سۇراپ كەلەدى. ازىرگە قالالىق ءماسليحات دەپۋتاتتارى عانا ميرزويان كوشەسىن الاش كوسەمى ءاليحان بوكەيحانعا بەرۋگە شەشىم شىعاردى. ءبىراق وبلىستاعى ارىپتەستەرى مەن ونوماستيكالىق كوميسسيادان حابار بولماي وتىر