تۇركيادا جانتۇرشىگەرلىك كولىك اپاتىنا ۇشىراعان 7 قازاقستاندىقتىڭ ۇشەۋى ەلگە امان-ەسەن ورالدى، ― دەپ حابارلايدى Qamshy.kz اقپارات اگەنتتىگى. اپات كەزىندە ۆاديم، باتىرحان، ديليارا جەڭىل جاراقات العان.

تالدىقورعان قالاسى اكىمدىگى باسپا ءسوز قىزمەتىنىڭ مالىمەتى بويىنشا، ولار ءقازىر الماتى قالاسىندا ەكەن. ولار ءتيىستى ەمىن الۋدا. ال، نۇرسۇلتان، الماگۇل، اسىل جانە ايدىن ەسىمدى قازاقستاندىقتار ءالى دە توسەك تارتىپ جاتىر. ءقازىر ولاردى  ەلگە جەتكىزۋ جۇمىستارى جۇرگىلۋدە.

«ءبارى ورىمدەي جاستار. 1992 جىلى تۋعان مەنىڭ باۋىرىم نۇرسۇلتان سوناۋ مەكتەپ كەزىنەن الماگۇلمەن جۇرەتىن. وسى جاقىندا عانا، 9 قىركۇيەكتە تويىن وتكىزگەنبىز. سوندا دوستارى تۇركياعا جولداما سىيلاعان ەدى. بال ايىنىڭ سوڭى وسىنداي بولادى دەپ ويلاماپپىز، ايتپەسە جىبەرمەس ەدىك قوي»، ―  دەيدى تالدىقورعان قالاسىنىڭ تۇرعىنى ەلزيرا.

وسى وقيعاعا بايلانىستى، تالدىقورعان قالاسىنىڭ  اكىمدىگى اپاتقا تۇسكەن جاستاردىڭ اتا-انالارىمەن، تۋعان-تۋىستارىمەن حابارلاسىپ، قانداي كومەككە مۇقتاج ەكەندەرىن سۇراعان بولاتىن. اتا-انالار ەلگە بالالارى امان-ەسەن جەتسە، مەديسينالىق تۇرعىدان كومەك كورسەتىلسە ەكەن دەيدى.

سوندىقتان قالا اكىمىنىڭ ورىنباسارى وبلىستىق دەنساۋلىق ساقتاۋ باسقارماسىنىڭ باسشىسىمەن اقىلداسىپ، اپاتقا تۇسكەن جاستاردى كۇتىپ الۋ ءۇشىن بار جاعدايدى قاراستىرىپ جاتىر. قاجەت بولعان جاعدايدا تالدىقورعاندىق جاستاردى الماتىنىڭ نەمەسە  استانانىڭ اۋرۋحانالارىنا جاتقىزۋعا دا جاردەم كورسەتىلۋى مۇمكىن.

ەسكە سالا كەتەتىن بولساق، 21 قىركۇيەكتە تۇركيانىڭ  كەمەر قالاسى ماڭىندا بولعان جول اپاتى سالدارىنان 7 قازاقستاندىق اۋرۋحاناعا تۇسكەن ەدى. دەر كەزىندە كورسەتىلگەن مەديسينالىق كومەك پەن حيرۋرگيالىق وتا جاستاردىڭ جانىن ساقتاپ قالدى.