بۇگىن قازاقستان رەسپۋبليكاسى ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ جۇمىس ساپارىمەن قىرعىزستاندا بولدى دەپ حابارلايدى Qamshy.kz اقپارات اگەنتتىگى. مينيستر بىشكەك قالاسىنداعى «الا-ارچا» مەملەكەتتىك رەزيدەنسياسىندا وتكەن «قازىرگى زاماناۋي زايىرلى مەملەكەتتەگى يسلام» تاقىرىبىندا ۇيىمداستىرىلعان حالىقارالىق كونفەرەنسياعا قاتىستى.
كونفەرەنسيا جۇمىسى قىرعىزستان رەسپۋبليكاسىنىڭ پرەزيدەنتى المازبەك اتامبايەۆتىڭ قۇتتىقتاۋ سوزىمەن اشىلدى.
كونفەرەنسيا بارىسىندا نۇرلان ەرمەكبايەۆ قىرعىز رەسپۋبليكاسىنىڭ پرەزيدەنتى المازبەك اتامبايەۆقا جانە وسىنداي ماڭىزدى شارانى ۇيىمداستىرعان قىرعىز ۇكىمەتىنىڭ وكىلدەرىنە العىس ءبىلدىردى.
قازاقستان رەسپۋبليكاسىنىڭ ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ ءوز سوزىندە راديكاليزم كورىنىستەرىنە قارسى كۇرەس باعىتىن كورسەتە وتىرىپ، دەسترۋكتيۆتى ءدىني اعىمدار يدەيالارىنىڭ ناسيحاتتالۋ ماسەلەسىن كوتەردى.
«كەڭەس ۇكىمەتى كەزەڭىنىڭ وزىندە ءبىزدىڭ حالىقتارىمىزدىڭ اراسىندا ادامداردىڭ دىنگە دەگەن كوزقاراسىنا قاراماستان، بەيبىتشىلىك پەن تولەرانتتىلىققا باعىتتالعان ءدىني داستۇرلەر قالىپتاسقان بولاتىن. ءبىز ءدىني مۇرالارىمىزدى زامان تالاپتارىنا سايكەس بەيىمدەپ، ساقتاپ قالۋ كەرەكپىز. تەك زايىرلى قوعام عانا كوپكونفەسسيالى ورتادا ءوزىنىڭ ءدىني تەڭدىگىن قامتاماسىز ەتە الادى»،-دەپ ءوز ويىن ورتاعا سالدى نۇرلان ەرمەكبايەۆ.
مينيستر حالىقارالىق ىنتىماقتاستىقتى تەرەڭدەتۋ جانە ءدىني نەگىزدە ەكسترەميزمنىڭ الدىن الۋ سالاسىندا تاجىريبە الماسۋ مەن بىرلەسكەن شارالاردى قابىلداۋ ماقساتىندا ءدىني قىزمەت سالاسىن رەتتەيتىن ورتالىق ازيا ەلدەرىنىڭ ۆەدومسۆولارى اراسىندا حالىقارالىق كونسۋلتاتيۆتىك كەڭەس قۇرۋ تۋرالى ۇنىسىس ءبىلدىردى.
«بىزگە، مەملەكەت قايراتكەرلەرى، عىلىم مەن ءدىن جولىنداعى تۇلعالار – ءبارىمىز ءدىني ەكسترەميزم مەن راديكاليزم تاراپىنان تۋىندايتىن قاۋىپ-قاتەرلەرگە قارسى بىرىگۋىمىز كەرەك... مۇنداي كەڭەس وڭىرلىك فورماتتا بىرلەسكەن ءتيىمدى جۇمىس تەتىكتەرىن قالىپتاستىرۋعا جول اشادى. بىرلەسىپ شەشىمدەردى جۇزەگە اسىرۋ ارقىلى دەسترۋكتيۆتى كۇشتەرگە قارسى تۇرا الامىز»- دەپ اتاپ ءوتتى ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ.
سونداي-اق، نۇرلان ەرمەكبايەۆ كونفەرەنسيا قاتىسۋشىلارىن مەملەكەتتىڭ جانە دىندەردىڭ ءوزارا ارەكەتتەسۋى جولىندا قازاقستاندىق مودەلىن قالىپتاستىرۋ باعىتىندا قازاقستان ۇكىمەتى تاراپىنان اتقارىلىپ جاتقان شارالارمەن تانىستىردى. زاڭدى تۇردە جۇمىس ىستەيتىن بارلىق ءدىني بىرلەستىكتەرمەن ىنتىماقتاستىق ورناتۋ ارقىلى ازاماتتاردىڭ ار-وجدان بوستاندىعىنا دەگەن قۇقىقتارىن قامتاماسىز ەتۋدەگى مەملەكەت قولعا الىپ وتىرعان جۇمىستار تۋرالى ايتتى.
مينيستر قازاقستاندىق قوعام ەتنوسارالىق جانە ءدىنارالىق كەلىسىمدى ساقتاۋدىڭ بىرەگەي ۇلگىسى بولىپ سانالاتىندىعىن اتاپ ءوتتى. وسىنداي وڭتايلى تاجىريبەنىڭ نەگىزىندە پرەزيدەنت نۇرسۇلتان نازاربايەۆ الەمدىك ءداستۇرلى ءدىن كوشباسشىلارىنىڭ سەزىن وتكىزۋ تۋرالى باستاما جاسادى.
قازىرگى زايىرلى مەملەكەتتەردە يسلامنىڭ ورنى مەن ءرولىن تالقىلاۋ كونفەرەنسيانىڭ باستى تاقىرىبىنا اينالدى. قاتىسۋشىلار مەملەكەتتەردىڭ ۇلتتىق مادەني ەرەكشەلىكتەرىن ساقتاۋ، تەرىس ءدىني قۇندىلىقتاردىڭ تارالۋىن بولدىرماۋ جانە ءدىني سالادا دەموكراتيالىق باسقارۋدىڭ تيىمدىلىگىن ارتتىرۋ قاجەتتىلىگىنە نازار اۋداردى.
كونفەرەنسيانىڭ اشىلۋ سالتاناتىندا سونداي-اق ورتالىق ازيا بويىنشا ەۋروپالىق كەڭەستىڭ ارنايى وكىلى پەتەر بۋريان، ءۇندىستاننىڭ سىرتقى ىستەرى جونىندەگى مەملەكەتتىك ءمينيسترى مۋشابار اكبار، وزبەكستان پرەزيدەنتىنىڭ كەڭەسشىسى رۋستام كاميلوۆ، مىسىر اراب رەسپۋبليكاسىنىڭ مادەنيەت ءمينيسترى حەلمي نامنام، تاجىكستان رەسپۋبليكاسىنىڭ ءدىن ىستەرى كوميتەتىنىڭ ءتوراعاسى سۋلايمون داۆلاتوۆ جانە ازەربايجان، بەلگيا، بۇۇ، ەقىۇ كەلگەن باسقا دا مارتەبەلى مەيماندار ءسوز سويلەدى.
ەسكە سالا كەتەيىك، كونفەرەنسيا جۇمىسىنا 19 ەلدىڭ ءدىن سالاسىنداعى ۋاكىلەتتى ورگاندارىنىڭ باسشىلارى، بەدەلدى حالىقارالىق ۇيىمداردىڭ وكىلدەرى جانە تانىمال شەتەلدىك يسلامتانۋشى ساراپشىلار قاتىسۋدا.
