«Qazaqstan» تەلەارناسى مەملەكەتتىك ءتىلدىڭ قولدانۋ اياسىن كەڭەيتۋدە وزگە باق-قا ۇلگى بولادى. بۇل تۋرالى بۇگىن ق ر اقپارات جانە كوممۋنيكاسيالار مينيسترلىگى جانىنداعى قوعامدىق كەڭەس وتىرىسىندا «Qazaqstan» تەلەراديوكورپوراسياسى باسقارماسىنىڭ ءتوراعاسى ەرلان قارين ءبىلدىردى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.
«Qazaqstan» تەلەراديوكورپوراسياسى تەلەراديواۋديتوريانىڭ سۇرانىسىنا، تالاپتارىنا سايكەس ءوز مەدياكتيۆتەرىندە مەملەكەتتىك ءتىلدىڭ قولدانۋ اياسىنىڭ كەڭەيتۋ ساياساتىن جۇرگىزۋدە. ءبىز باسقا دا ب ا ق وكىلدەرىنە وسى باعىت بويىنشا ۇلگى بولا الامىز دەگەن ويدامىز. ب ا ق سالاسىنداعى مەملەكەتتىك ءتىلدىڭ دامۋىنا ىقپال ەتەتىن تاعى ءبىر فاكتور - زەرتتەۋشى كومپانيالاردىڭ ولشەۋلەرىنىڭ ساپاسىندا. الايدا ولاردىڭ جۇرگىزەتىن ولشەۋ-زەرتتەۋلەرى كورەرمەندەردىڭ تەلەديدار كورۋ رەيتينگىن وبەكتيۆتى جەتكىزبەيدى. مىسالى «TNS Central Asia» كومپانياسى تۇرعىندارى 100 مىڭنان اساتىن قالالار بويىنشا، زەرتتەۋدى تەك 2200 تىركەلگەن ابونەنتتەرمەن جۇرگىزگەن. ولاردىڭ ايتۋىنشا، سۇرالعان رەسپوندەنتتەردىڭ 58 پايىزى قازاق ءتىلدى. الايدا ول رەسپوندەنتتەردىڭ استانا جانە الماتى قالالارىندا، باسقا دا ورتالىقتاندىرىلعان ءىرى قالالاردا ورنالاسقاندىقتارىن ەسكەرۋ قاجەت. ال قازاق ءتىلدى اۋديتوريانىڭ باسىم بولىگى ءىرى قالالاردا ەمەس، قالا شەتىندە، اۋىلدى ەلدى مەكەندەردە تۇرادى. سوندىقتان، ولاردىڭ تالعامدارى ەسكەرىلمەي قالادى»، - دەدى ەرلان قارين.
سول سەبەپتى ول كومپانيا ۇسىنعان ولشەمدەر ناقتى جاعدايدى ەسكەرمەيتىندىگىن باسا ايتتى. مىسالى، جوعارىدا ايتىلعان كومپانيا وتكەن اپتانىڭ ءۇش كۇنىندە (سارسەنبى، بەيسەنبى، جۇما) 60 پايىز كورسەتكىشتى تەك «1-ارنا» مەن «كتك» تەلەارنالارىنىڭ ۇلەسىنە بەرگەن.
«سوندىقتان، تەلەكورۋدىڭ ولشەمدەرىنىڭ ساپاسىن جوعارىلاتۋ ءۇشىن، رەيتينگتى ولشەۋدىڭ باسقا دا بالامالىق جولدارىن قولدانۋ كەرەك. باعدارلامالاردىڭ تانىمالدىلىعى جايىنداعى اقپاراتتى ءبىلۋ ءۇشىن بالامالى زەرتتەۋ جولدارىن قولدانىسقا ەنگىزۋ قاجەت. مىسالى، ساۋالناما، بليس-ينتەرۆيۋ، الەۋمەتتىك زەرتتەۋلەر، فوكۋس گرۋپپالاردىڭ زەرتتەۋلەرىن، ونلاين رەجىمدەگى ينتەراكتيۆ سياقتى جولداردى ساپالى ءارى ناقتى، شىنايى ناتيجە ءۇشىن قولدانۋ كەرەك. مەديا ولشەمدەردىڭ بالامالى جۇيەسىن قولدانۋ، بىزگە جاڭا باعدارلامالار اشۋ، باعدارلامالاردىڭ قۇرىلىمى، قۇرامى، ەفيرلىك سەتكانىڭ قۇراستىرىلۋى جونىندە دۇرىس شەشىم قابىلداۋعا كومەكتەسەدى. ودان بولەك، وبەكتيۆتى ستاتيستيكانى قۇرۋ ءۇشىن، قۇزىرەتتى ورگاندارمەن بىرگە ولشەۋ مەتودولوگياسىنىڭ جەتىلدىرۋ جۇمىستارىن جۇرگىزۋ كەرەك. بۇل ءىستى جۇزەگە اسىرۋ ءۇشىن، «TNS Central Asia» كومپانياسىمەن، تەلەارنالارمەن، ستاتيستيكا اگەنتتىگىمەن جانە باسقا دا مۇددەلى ۇيىمدارمەن جۇمىستى جۇيەلەۋ كەرەك»، - دەدى «Qazaqstan» تەلەراديوكورپوراسياسىنىڭ باسشىسى.
