سالالىق قاۋىمداستىقتار مەن كومپانيالارعا جالعان لوتورەيالار مەن اقشا ۇتىسى بار ينتەرنەت-ويىندارىنىڭ زياندى اسەرى تۋرالى، سونداي-اق زاڭسىز ويىن بيزنەسىمەن اينالىساتىن تۇلعالاردىڭ، جالپى اۋماقتا سونداي ويىن اۆتوماتتارىن ورنالاستىرۋ ءۇشىن ورىنجايدى جالعا بەرۋشىلەر مەن ولاردىڭ يەلەرىنىڭ قىلمىستىق جاۋاپتىلىعى تۋرالى كەزەكتى رەت حابارلاندى دەپ جازادى Qamshy.kz اقپارات اگەنتتىگى.

بۇل ماسەلەلەر الماتى قالاسى كاسىپكەرلەر پالاتاسىنىڭ الاڭىندا كونسۋلتاسيالىق كەڭەستىڭ وتىرىسىندا ايتىلدى.

«ەكونوميكالىق تەرگەۋ قىزمەتىنىڭ مالىمەتى بويىنشا 2017 جىلدىڭ 8 ايى ىشىندە 50 ويىن مەكەمەسىنىڭ زاڭسىز جۇمىسى توقتاتىلدى. ونىڭ ىشىندە 43 مەكەمە ەلەكتروندى كازينومەن اينالىسسا، 7 – ويىن اپپاراتىنىڭ زالى. 617 كومپيۋتەرلىك تەحنيكا، 246 تەلەديدار، 117 ەلەكتروندى تەرمينال، 21 ويىن اۆتوماتى مەن شامامەن 6 ملن تەڭگە اقشالاي قارجى الىندى»، – دەپ حابارلادى الماتى قالاسى مەملەكەتتىك كىرىستەر دەپارتامەنتىنىڭ باسشىسى اسقار تىنىسبەكوۆ.

دەپارتامەنت باسشىسى بيۋدجەتكە تۇسەتىن سالىق پەن وزگە دە تولەمدەردىڭ بولجانعان كورسەتكىشىن دە باياندادى. الماتىدا 183 754 كاسىپكەر (جۇمىس ىستەمەگەندەردى ەسەپتەمەگەندە)  جۇمىس ىستەيدى، ونىڭ ىشىندە 74،9 مىڭى زاڭدى تۇلعا جانە 108،9 مىڭ – جەكە كاسىپكەرلىك. وسى جىلدىڭ 27 قىركۇيەگىندە مالىمەت بويىنشا الماتى قالاسى بيۋدجەتىنىڭ كىرىس بولىگىندە 103%-عا ورىندالعان، ياعني 1 206 058 ملن تەڭگە جوسپارىندا 1 246 762 ملن تەڭگە ءتۇسىم ەسەپتەلگەن. وتكەن جىلمەن سالىستىرعاندا 112% نەمەسە 132 533 ملن تەڭگەگە ارتىق.

«كونسۋلتاتيۆتىك-كەڭەس بەرۋشى ورگاننىڭ الدىڭعى وتىرىسىنىڭ قورىتىندىسى بويىنشا بيزنەستىڭ ساۋالىنا قاتىستى «قازاقتەلەكوم» اق ەلەكتروندى شوت-فاكتۋرا اقپاراتتىق جۇيەسى كانالى وپەراتورىنىڭ وتكىزۋ قابىلەتىن ارتتىرۋ تۋرالى ۇسىنىس جولدادى. ناتيجەسىندە كانالدىڭ جۇگى تۇراقتالدى جانە 500 مبيت/س دەيىن رەتتەلدى. زاڭناماعا كەدەندىك تازالاۋ كەزىندە شەتەلدىك ۆاليۋتادا وپەراسيانى قايتا ەسەپتەۋدە پايدا بولاتىن تيىن ايىرماشىلىعىن ەسەپتەۋگە قاتىستى وزگەرتۋ ەنگىزۋ ۇسىنىسى بويىنشا جوعارىدا اتالعان جاعدايلاردى زاڭنامانىڭ بۇزىلعانى دەپ قاراماۋ جانە كامەرالدىق باقىلاۋ جۇرگىزگەندە اكىمشىلىك جاۋاپكەرشىلىككە تارتپاۋ شەشىمى قابىلداندى»، – دەپ اتاپ ءوتتى اسقار تىنىسبەكوۆ.

كەزدەسۋ بارىسىندا ەلەكتروندى شوت-فاكتۋرانى بەرۋ كەزىندە قايتالاناتىن قاتەلىكتەر، استانا-1 اقپاراتتىق جۇيەسىن ەنگىزۋ ماسەلەلەرى قارالدى.

كونسۋلتاتيۆتىك كەڭەس وتىرىسىنىڭ ماقساتى – كاسىپكەرلىك سۋبەكتىلەرى مەن سالىق جانە كەدەن ىستەرى سالاسىندا قىزمەت اتقاراتىن تۇلعالارعا كومەك بەرۋ، سالىق جانە كەدەندىك رەتتەۋدى جەتىلدىرۋ، اكىمشىلىكتەندىرۋدىڭ ءتيىمدى تاسىلدەرىن ەنگىزۋ، ەلىمىزدە بيزنەس جۇرگىزۋ ءۇشىن قاجەتتى جاعدايلار جاساۋ.