قاراعاندى وبلىسىنىڭ  تۇرعىنى ءوزىنىڭ 13 جىل بۇرىن سەكسۋالدى قۇلدىقتا بولعانىن ايتىپ ارىز جازعان ەدى. الايدا ءىس اياعىنا جەتپەي توقتاتىلدى، دەپ حابارلايدى Qamshy.kz اقپارات اگەنتتىگى 31 ارناعا سىلتەمە جاساي وتىرىپ.

جابىرلەنۋشى تۋىستارىمەن ارالاسپايدى. تۇراتىن باسپاناسى جوق. ۋايىمنان دەنساۋالىعى دا سىر بەرگەن.

ايەل ازەر دەگەندە قۇلدىق قامىتتان قاشىپ قۇتىلىپتى. ول ءوزىن زورلاعان ادامنان قىز دا تۋىپ العان. ءقازىر قىزى ءوز اكەسىنەن اۋماي ءوسىپ كەلە جاتىر. ءقازىر 36 جاستاعى كەلىنشەكتىڭ 19 جىلى قورقىنىش، ىزامەن وتكەن.

“ىشىمدە ءبارى قايناپ جاتىر. ءتۇسىندىرىپ ايتا المايمىن. مەنىڭ ءومىرىمدى قۇرتقانى ءۇشىن ىشىمدە قايناعان كەك بار”، – دەيدى قارلىعاش.

وقيعا 1998 جىلى باستالعان. 17 جاستاعى قارلىعاش قاراعاندى پەداگوگيكالىق كوللەدجىنە تۇسەدى. الايدا ستۋدەنت بولىپ ۇلگەرە الماعان. ونى ەر ادام ۇرلاپ اكەتىپ، دالادا زورلاپ، سوسىن كۋرچاتوۆ قالاسىنىڭ ماڭىنداعى اۋىلعا الىپ كەتەدى. بەلگىلى بولعانداي مۇنى ۇرلاعان ەر ادام شارۋا قوجالىعىنىڭ باسشىسى، جەرگىلىكتى بەدەلدى ادام ەكەن.

“اياعىما جاسىل گراناتا بايلاپ، ونى ەسىككە بەكىتىپ قويادى. سوسىن “بىرەۋ اشاتىن بولسا، گراناتا جارىلادى” دەيدى. سول كۇيى مەنى تاستاپ شىعىپ كەتكەن كەزدەرى دە بولعان. ادەيى مە، الدە ۇمىتتى ما بىلمەيمىن. ال مەن ءبىر كۇن بويى سول گراناتاعا تاڭىلىپ وتىردىم،” – دەيدى ول.

قارلىعاش ومارحانوۆا جەتىم بولعاندىقتان، ونى ەشكىم ىزدەي قويماپتى. كەيىن جالعىز اپكەسى ءوتىنىشىن پوليسيانىڭ قابىلداماي قويعانىن ايتىپتى. ول قۇلدىقتا بولعان بەس جىل ىشىندە ول ۇيدە باسقا قىزدار دا پايدا بولىپتى. ءبىراق، ولار كەيىنىرەك قاشىپ كەتكەن. ال قارلىعاشتىڭ بوساۋىنا سول جەردەگى جۇمىسشى كومەكتەسىپتى. ايەل كەيىن بارىپ ءوزىنىڭ جۇكتى ەكەنىن بىلگەن. قىزىن بوسانىپ، ءبىراق اپكەسىنە بارماعان.

“مەن ەگەر قارقارالىعا بارسام، مەنى ءتىرى قالدىرماس ەدى”، – دەيدى ايەل.

سودان بەرى دە 13 جىل وتكەن. كۇيەۋگە شىقپاعان قارلىعاش اۋرۋحانادا سانيتارلىق قىزمەتكەر بولىپ ىستەيدى. ەركەكتەردەن ابدەن قورقىپ قالعان. ينتەرناتتا وقيتىن قىزىنىڭ جىل ساناپ اكەسىنە ۇقساپ بارا جاتقانى دا ايەلدىڭ جانىن جەگىدەي جەگەن. اقىرى، ويلانا كەلە “مير دوبرا” داعدارىس ورتالىعىنا كەلىپتى.

“ورتالىقتىڭ الەۋمەتتىك-پسيحولوگيالىق بەيىمدەۋ جۇمىستارى اياسىندا ءبىز وعان كومەكتەسەمىز. ءقازىر ونىمەن پسيحولوگتار، پسيحياترلار جۇمىس ىستەپ جاتىر”، – دەدى ۇيىمنىڭ جەتەكشىسى تاتيانا ابرامەنكو.

سونداي-اق، ايەلدىڭ تۇسىرگەن شاعىمىنا سايكەس پوليسيا قازىرگى تاڭدا بىرنەشە باپ بويىنشا قىلمىستىق ءىس قوزعاپ ۇلگەردى.

“اۋىر قىلمىس ءۇشىن بۇل ۋاقىت 10 جىلمەن تەڭ. ەرەكشە اۋىر قىلمىس – 20 جىل. مەنىڭ تۇسىنگەنىم بويىنشا بۇل ءىستى قوزعاۋعا ابدەن بولادى”، – دەيدى ادام قۇقىقتارى جونىندەگى حالىقارالىق بيۋرو فيليالىنىڭ ديرەكتورى يۋريي گۋساكوۆ.

ال قارلىعاش قىزدىڭ بۇل جاعدايلاردان بەيحابار.