نۇرسۇلتان نازاربايەۆ «نۇر اقتوبە» القابىندا نەسيەگە بەرىلەتىن ءارى جىلدام سالىناتىن ءبىر قاباتتى جانە ەكى قاباتتى ءتۇرعىن-ۇي قۇرىلىسىنىڭ جاي-كۇيىمەن تانىستى دەپ حابارلايدى Qamshy.kz اقپارات اگەنتتىگى اقورداعا سىلتەمە جاساي وتىرىپ.

قازاقستان پرەزيدەنتى ەلىمىزدىڭ تۇرعىندارى ءۇشىن «نۇرلى جەر» باعدارلاماسىن ىسكە اسىرۋدىڭ ماڭىزدى ەكەنىن ەرەكشە اتاپ ءوتتى.

– حالىقتىڭ ءال-اۋقاتىن ارتتىرۋدا بۇل باعدارلامانىڭ ماڭىزى زور. ءبىزدىڭ باستى ماقساتىمىز – ازاماتتاردىڭ جايلى تۇرمىسى ءۇشىن قاجەتتى ينفراقۇرىلىم قالىپتاستىرىپ، ولاردى جۇمىسپەن قامتاماسىز ەتۋ، – دەدى نۇرسۇلتان نازاربايەۆ. 

وبلىس اكىمى بەردىبەك ساپاربايەۆ مەملەكەت باسشىسىنا «نۇرلى جول» جانە «نۇرلى جەر» مەملەكەتتىك باعدارلامالارىنىڭ ىسكە اسىرىلۋ بارىسى جونىندە باياندادى. «نۇرلى جەر» باعدارلاماسى ارقىلى بيىل وبلىستاعى 1000-نان استام وتباسىن تۇرعىن-ۇيمەن قامتاماسىز ەتۋ جوسپارلانىپ وتىر.

سوڭىندا ەلباسى اتالعان جوبانى ىسكە اسىرۋعا اتسالىسىپ جاتقان قۇرىلىس كومپانيالارىنىڭ وكىلدەرىمەن اڭگىمەلەستى.