2017 جىلدىڭ 27-29 قازان ارالىعىندا استانادا قازاق كۇرەسىنەن (Qazaq kuresi) الەم چەمپيوناتى ۇيىمداستىرىلادى دەپ حابارلايدى Qamshy.kz اقپارات اگەنتتىگى.

ەلىمىزدىڭ ۇلتتىق ويىنىنا الەمنىڭ تۇكپىر-تۇكپىرىنەن 40 مەملەكەتتىڭ سپورتشىلارى قاتىسادى. ولاردىڭ قاتارىندا اقش، جۇڭگو، اۋستراليا، ءۇندىستان، ليتۆا، رەسەي، بەلگيا، كامەرۋن جانە ت.ب. ەلدەر بار.

قازاق كۇرەسى ەجەلگى سپورت تۇرىنە جاتادى. ونىڭ كۇن وتكەن سايىن تانىمالدىعى ارتىپ كەلەدى. 2016 جىلدان باستاپ يۋنەسكو قازاق كۇرەسىن ماتەريالدىق ەمەس مادەني مۇرا تىزىمىنە ەنگىزگەن.

بۇل رەتتە، چەمپيونات قازاق كۇرەسىنىڭ بەدەلىن ارتتىرىپ، دەنە شىنىقتىرۋ مەن سالاۋاتتى ءومىر سالتىن قالىپتاستىرۋ باعىتىنا جاعىمدى ىقپال ەتىپ، سونداي-اق، سپورتتىق جانە مادەني بايلانىستاردىڭ نىعايۋۋىنا ماردىمدى ۇلەس قوسادى دەپ كۇتىلۋدە. 

چەمپيونات 8 سالماق دارەجەسى جانە ابسوليۋتتىك دارەجە بويىنشا وتەدى.   

27ء-شى قازاندا «حان شاتىر» ويىن-ساۋىق ورتالىعىندا سپورتشىلاردى ولشەۋ جانە جەرەبە تاستاۋ شاراسى جوسپارلانعان.

28-29 قازاندا «بارىس-ارەنا» مۇزايدىن سارايىندا جارىس بولادى.

سايىستىڭ العاشقى كۇنى سپورتشىلار 55، 90، 100، 100+ جانە كەلەسى كۇنى 60، 66، 74، 82 جانە ابسوليۋتتىك سالماق دارەجەسى بويىنشا ب ا ق سىنايدى.

شارانىڭ باستى ۇيىمداستىرۋشىسى - زتب «قازاق كۇرەسى حالىقارالىق فەدەراسياسى».