قازاقتىڭ ءبىرتۋار تۇلعاسى، باتىر، قاھارمان جازۋشى باۋىرجان مومىش ۇلىنىڭ تىك مىنەزدى بولعانى جايلى كوزىن كورگەندەردىڭ اڭگىمەسى جەتەرلىك. باتىردىڭ سونداي تۇسىن مىنا وقيعادان وقىڭىزدار!

بىردە مومىشۇلىنا راديودان ماگنيتوفونىن ارقالاپ ءتىلشى كەلەدى. ءتىلشى شاشىن ايەلشە قويا بەرگەن جاس جىگىت ەكەن. 

- ءاي، سەن كىمسىڭ؟ - دەيدى باۋىرجان ونى كورگەن بويدا. 

- ءراديوجۋرناليستپىن، اعاي. سىزبەن سويلەسەيىن دەپ كەلىپ ەدىم. 

- ءوزىڭ ايەلمىسىڭ، ەركەكپىسىڭ، مەن سونىڭدى ايت دەپ تۇرمىن ساعان؟! 

- ەركەكپىن، اعاي. 

- كرۋگوم! - دەيدى باۋكەڭ وعان ەجىرەيىپ. ساسقان جىگىت ۇرشىقشا اينالىپ كەيىن بۇرىلىپ، ەسىككە قاراپ تۇرادى. 

- سەن ەركەك بولساڭ، وندا شاشىڭدى ەركەكشە الدىرىپ كەل. مارش! 

جىگىت سالى سۋعا كەتىپ، كەڭسەسىنە قايتادى. قىسقارتايىن دەسە، شاشىن قيمايدى، قىسقارتپايىن دەسە - تاپسىرما قينايدى. ءسويتىپ جۇرگەندە ءبىر كۇن وتە شىعادى. ەرتەڭىندە ونى باستىعى شاقىرتادى. 

- مومىشۇلىمەن اڭگىمە دايىن با؟ - دەپ سۇرايدى باستىق. 

- جوق. 

- نەگە؟ 

- شاشىڭدى ەركەكشە الدىرىپ كەلمەسەڭ، سەنىمەن سويلەسپەيمىن دەپ قۋىپ شىقتى. 

- شاشىڭدى نەگە الدىرمايسىڭ؟ 

- قيمايمىن. 

باستىق اشۋلانادى. 

- ول ماتەريال پروگراممادا تۇر. شاشىڭ تۇرعاي باسىڭدى الدىرساڭ دا بۇگىن ماتەريال وسىندا بولسىن! - دەپ بۇيىرادى ول جىگىتكە. 

جىگىت امالسىزدان شاشتارازعا بارىپ شاشىن جۇقارتتىرادى. سودان سوڭ باۋىرجانعا قايتادان بارادى. 

"اقيقات پەن اڭىز" 

ءازىلحان نۇرشايىق