العاش رەت رەسپۋبليكا بويىنشا تالدىقورعان قالاسىندا ق ر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ الماتى وبلىسى بويىنشا مەملەكەتتىك قىزمەتشىلەردى وقىتۋ فيليالى اشىلدى. وقۋ 2018 جىلدىڭ 1 قاڭتارىنان باستالماق. قازىرگى تاڭدا ءار تاراپتان ۇيىمداستىرۋشىلىق جۇمىستارى جۇرگىزىلىپ جاتىر. بۇل تۋرالى وڭىرلىك كوممۋنيكاسيالار قىزمەتى الاڭىندا بەلگىلى بولدى.

الماتى وبلىسى بويىنشا مەملەكەتتىك قىزمەتشىلەردىڭ شتات سانى - 8036. قازىرگى كەزدە 1451 مەملەكەتتىك قىزمەتشى قايتا دايارلاۋ جانە بىلىكتىلىگىن ارتتىرۋ كۋرستارىنان ءوتتى، ياعني ول 88،9% قۇرايدى. اتالعان مەملەكەتتىك قىزمەتشىلەردى وقىتۋ كۋرستارىن وتكىزۋ ءۇشىن جەرگىلىكتى بيۋدجەتتەن 57 787 706 تەڭگە ءبولىندى.

«تالدىقورعان قالاسىندا فيليال 22 قىركۇيەكتە تىركەلگەن بولاتىن. سالتاناتتى اشىلۋىن جەلتوقسان ايىنا قالدىرىپ وتىرمىز. فيليالدا مەملەكەتتىك قىزمەتتە تاجىريبەسى مول قىزمەتكەرلەر ءدارىس بەرەتىن بولادى، جانە مەملەكەتتىك قىزمەتكەرلەر تەك تەوريامەن شەكتەلمەي پراكتيكالىق جۇمىستارعا كىرىسەتىن بولادى. مىسالى، پروەكتتى جوبالاۋ، عىلىمي جوبا جاساۋدىڭ قىر-سىرى ۇيرەتىلەتىن بولادى جانە وسى جوبالاردى بىرگە جۇزەگە اسىرامىز دەپ ويلايمىن. سونىمەن قاتار، بىلىكتىلىگىن ارتتىرۋ جانە قايتا دايارلاۋ كۋرستارىن تابىستى اياقتاعان مەملەكەتتىك قىزمەتشىلەرگە سەرتيفيكات تابىستايتىن بولامىز»، - دەدى ق ر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ الماتى وبلىسى بويىنشا فيليالىنىڭ ديرەكتورى شاكيشيەۆ قازبەك.

ايتا كەتەيىك، الماتى وبلىسى بويىنشا مەملەكەتتىك قىزمەتشىلەردى وقىتۋ فيليالى كەلەر جىلعا 1200 قىزمەتكەردى وقىتىپ شىعۋدى جوسپارلاپ وتىر.