بۇگىن پالاتانىڭ كەزەكتى جالپى وتىرىسىندا ءماجىلىس ءتوراعاسى نۇرلان نىعماتۋلين باسقا ەلدەردىڭ قازاقستانعا قايتارۋعا ءتيىس بەرەشەكەتەرىن ۋاقىتىندا رەتتەۋ كەرەكتىگىنە نازار اۋداردى دەپ جازادى Qamshy.kz اقپارات اگەنتتىگى.  

ناقتىلاپ ايتقاندا بۇل ماسەلە قازاقستان ۇكىمەتىنىڭ گرۋزيا ۇكىمەتىنە بەرگەن مەملەكەتتىك كرەديتتەرىن قايتا قۇرىلىمداۋعا قاتىستى راتيفيكاسيالىق زاڭ جوباسىن تالقىلاۋ كەزىندە كوتەرىلدى.

ماسەلەن، دەپۋتات يرينا ۋنجاكوۆا گرۋزيا ۇكىمەتىنىڭ بەرەشەكتى قايتارماۋعا قاتىستى جاعدايى 20 جىلدان اسىپ بارا جاتقانىن اتاپ ايتتى.

وسىدان كەيىن ءماجىلىس سپيكەرى قارجى ءمينيسترى باقىت سۇلتانوۆقا: « گرۋزيندىك ارىپتەستەرمەن قارىز ماسەلەسىنىڭ رەتتەلگەنى جاقسى، دەگەنمەن، بۇل بوساڭسۋعا سەبەپ بولماۋى كەرەك. ويتكەنى، باسقا ەلدەرمەن قارىزدار بويىنشا ءالى رەتتەلمەگەن سۇراقتاربار»،-دەدى.

سونداي-اق، ءماجىلىس ءتوراعاسى قايتارىلعان قارجىلار بيۋدجەت قورجىنىن تولتىرۋ كەرەكتىگىن ايتا كەلىپ، - قارىزدى بەرگەننەن كەيىن، ۋاقىتىندا قايتارا ءبىلۋ كەرەك،-دەدى.