رەسەي پرەزيدەنتى ۆلاديمير پۋتين مەن اقش پرەزيدەنتى دونالد ترامپ تەلەفون ارقىلى سويلەسىپ، كەلىسسوز جۇرگىزدى. اق ءۇي باسپا ءسوز قىزمەتى ەكى پرەزيدەنت اراسىنداعى اڭگىمەنىڭ شامامەن ءبىر ساعاتقا سوزىلعانىن حابارلادى. پۋتين مەن ترامپ سيريا جانە ۋكرايناداعى قارۋلى قاقتىعىستاردى، سولتۇستىك كورەيا، يران جانە اۋعانستانداعى جاعدايدى تالقىلادى، دەپ Qamshy.kz اقپارات اگەنتتىگى ازاتتىققا سىلتەمە بەرىپ جازادى.

بۇدان ءبىر كۇن بۇرىن پۋتين سيريا پرەزيدەنتى باشار اسادپەن كەزدەسكەن بولاتىن. كرەملدىڭ حابارلاۋىنشا، پۋتين ترامپپەن اڭگىمەسىندە سيريادا پرەزيدەنت جانە پارلامەنت سايلاۋلارىن وتكىزۋدى قالايتىنىن، كونستيتۋسيالىق رەفورمانى جاقتايتىنىن مالىمدەگەن.

ماسكەۋ، انكارا جانە تەگەران قازاقستان استاناسى استانادا سيريا بەيبىت كەلىسسوزىن وتكىزىپ كەلەدى. وعان جانجالداسۋشى تاراپتار قاتىسىپ ءجۇر. استاناداعى كەزدەسۋدە سيريانىڭ ماڭىزدى ايماقتارىندا دەەسكالاسيا ايماقتارىن قۇرۋ ماسەلەسى تالقىلانىپ جاتىر.

اق ءۇيدىڭ مالىمەتىنە قاراعاندا، ترامپ پەن پۋتين 21 قاراشادا «تاياۋ شىعىس پەن ورتالىق ازيا اۋماعىندا تەرروريزممەن كۇرەستىڭ ماڭىزدىلىعىن» ايتتى جانە «يسلام مەملەكەتى»، «ءال قايدا»، «تاليبان» جانە باسقا دا تەررورلىق توپتارمەن كۇرەسۋ ءۇشىن ارىپتەستىكتى ارتتىرۋ جولدارىن ىزدەۋگە كەلىستى.

وتكەن اپتادا ترامپ پەن پۋتين ۆەتنامداعى سامميتتە بەيرەسمي كەزدەسۋ وتكىزگەن. ول كەزدە كرەمل امەريكالىقتار «رەسمي كەزدەسۋگە كەلىسپەي قويعانىن» مالىمدەگەن. اق ءۇي كەزدەسۋ پرەزيدەنتتىڭ «ۋاقىتى جوقتىقتان جانە جۇمىس كەستەسىنىڭ تىعىزدىعىنان» وتپەي قالعانىن ايتقان.