قىرعىزستان باسشىسى المازبەك اتامبايەۆ رەسەي پرەزيدەنتى ۆلاديمير ءپۋتيندى رەسپۋبليكانىڭ جوعارى مەملەكەتتىك ماراپاتى – «ماناس» وردەنىمەن ماراپاتتادى. بۇل تۋرالى قىرعىز باسشىسىنىڭ باسپا ءسوز قىزمەتى حابارلادى، دەپ جازادى Qamshy.kz اقپارات اگەنتتىگى.

باسپا ءسوز قىزمەتىنىڭ مالىمەتىنە سۇيەنسەك، اتامبايەۆ اتالمىش جارعىعا سارسەنبىدە قول قويعان.

«المازبەك اتامبايەۆ قىرعىز رەسپۋبليكاسى مەن رەسەي فەدەراسياسىنىڭ ىنتىماقتاستىعىنىڭ دامۋى مەن بەرىكتىگىنە ۇلەس قوسقانى ءۇشىن رەسەي پرەزيدەنتى ۆلاديمير ءپۋتيندى I دارەجەلى «ماناس» وردەنىمەن ماراپاتتادى»، - دەلىنگەن باسپا ءسوز حابارلاماسىندا.

«ماناس» وردەنى قىرعىزستاننىڭ جوعارعى مەملەكەتتىك ماراپاتى بولىپ 1996 جىلى بەكىتىلگەن. ول ءۇش دارەجەدەن تۇرادى، مەملەكەتتىڭ جانە دەموكراتيالىق قوعامنىڭ، حالىقتىڭ بىرلىگىن، ەلدىڭ ەكونوميكالىق، رۋحاني جانە ينتەللەكتۋالدى الەۋەتىن قورعاۋ مەن نىعايتۋعا زور ۇلەس قوسقاندار «ماناس» وردەنىمەن ماراپاتتالادى.

ايتا كەتەيىك، 2015 جىلدىڭ شىلدەسىندە اتامبايەۆ قازاقستان پرەزيدەنتى نۇرسۇلتان نازاربايەۆتى I دارەجەلى «ماناس» وردەنىمەن ماراپاتتاعان.