ناۋرىزباي اۋدانىندا تۇرعىنداردى اۋىز سۋمەن قامتۋ كۇردەلى ماسەلەنىڭ ءبىرى رەتىندە كۇن تارتىبىنەن تۇسپەگەن. سۋ جەلىلەرىندە جىلىنا 300-گە دەيىن اپات بولعان. 

بۇل تۋرالى اۋدان اكىمى سايران سايفەدەنوۆ ايتتى.

بۇگىن الماتى قالاسىنىڭ وڭىرلىك كوممۋنيكاسيالار قىزمەتى الاڭىندا الماتى قالاسى، ناۋرىزباي اۋدانىنىڭ اكىمى سايران سايفەدەنوۆ اۋدانداعى الەۋمەتتىك-ەكونوميكالىق دامۋدىڭ ناتيجەلەرى،  اۋدان ورتالىقتارىندا «رۋحاني جاڭعىرۋ» باعدارلاماسىنىڭ ىسكە اسىرىلۋ بارىسى تۋرالى مالىمدەدى.

اۋدان اكىمى 2017 جىلدىڭ 11 ايى، ءارى اۋدان اشىلعان 3 جىلدىڭ ىشىندە اتقارىلعان جۇمىستارمەن قاتار، كۇردەلى تاقىرىپتاردى دا ءسوز ەتتى.

«تۇرعىنداردى اۋىز سۋمەن قامتۋ  تۇيتكىلدى ماسەلەلەردىڭ ءبىرى بولىپ وتىر. سۋ جەلىلەرىندە جىلىنا 300 اپات بولادى. سۋ جەتىسپەيتىنىنە تۇرعىندار نارازى. سۋ جەلىسىن جۇرگىزۋ بويىنشا جوبا ازىرلەندى. وسى جىلدىڭ اياعى مەن الداعى جىلدىڭ باسىندا مەملەكەتتىك ساراپتاماعا بەرىلەدى. قارعالى، اقساۋ وزەندەرىنىڭ باسىندا سۋ تازالاۋ ستانساسى سالىنادى. «بارلىق» بازارى جانىندا ۇلكەن ۇڭعارناما قازۋ جۇمىستارى ءجۇرىپ جاتىر. اۋداندا 2014 جىلدان بەرى 118 شاقىرىم جول سالىندى. كەيبىر ەلدى مەكەندەرگە الداعى ۋاقىتتا سۋ جەلىلەرى ءۇشىن قازبا جۇمىستارى جوسپارلانىپ وتىرعاندىقتان اسفالت كىرمەي وتىر»، - دەدى اۋدان اكىمى.

سونىمەن قاتار، ول تۇرعىنداردى ەلەكتر جارىعىمەن قامتۋ ماسەلەسى دە وزەكتى ەكەنىن جەتكىزدى. 

«اۋداندا 680 شاقىرىم ەلەكتر جەلىسىنىڭ 582ء-سى جەكە مەنشىكتىڭ قولىندا. اپات بولعاندا انىقتاۋ قيىنعا ءتۇسىپ، 1500-2000-عا دەيىن ءۇي 2 ساعاتتان 20 ساعاتقا دەيىن جارىقسىز وتىرىپ قالادى. ەلەكتر جەلىلەرىندە ايىنا 130 اپاتتىق جاعداي تىركەلەدى»، - دەدى سايران سافەدەنوۆ.

ناۋرىزباي اۋدانىنىڭ اكىمى سۋ تاسقىنى بويىنشا قانداي قاۋىپسىزدىك شارالارى اتقارىلعانىنا دا توقتالدى. 

«الماتى قالاسى توتەنشە جاعدايلاردى جويۋ قورىنان قاراجات سۇراتىپ، 4 كوشەگە ارىق جەلىسى سالىندى. اۋدانىمىز اۋماعىندا 3 وزەن اعىپ وتەدى. وزەندەر باستاۋىن تاۋ سۋىنان الادى. ارىق جەلىلەرىن تازارتقاندا دوڭگەلەك، توڭازىتقىشتار شىعادى. مىسالى، ءبىر كوپىردى تازالاعاندا ونىڭ استىنان 4-5 توڭازىتقىش شىققان. قۇتقارۋ قىزمەتى قىس باستالماي قازان ايىنان باستاپ سۋ ارنالارىن تازارتىپ شىقتى. كەلەسى جىلى اقپان ايىنان ارنانى تازالاۋ جۇمىستارى جۇرەدى. ناۋرىزباي اۋدانى قالاعا قوسىلعانعا دەيىن ارىق جۇيەسى 24 كوشەدە 21 شاقىرىم ەدى، قازىرگى ۋاقىتتا 61 كوشەدە 45 شاقىرىم ارىق جەلىسى جاسالدى»، - دەدى ول.

ايتا كەتەيىك ناۋرىزباي اۋدانى 2014 جىلدىڭ 2 شىلدەسىندە قۇرىلعان.