"قازاقستانعا تاۋەلسىزدىك العان 1991 جىلدان بەرى شەتەلدەن 950 مىڭنان استام ەتنيكالىق قازاق ورالدى" دەپ حابارلادى بۇگىن دەنساۋلىق ساقتاۋ جانە الەۋمەتتىك دامۋ مينيسترلىگى.
مينيسترلىك اقپاراتىنا قاراعاندا، 1991 جىلدان 2015 جىلدىڭ 1 قاڭتارىنا دەيىنگى ارالىقتا 952 مىڭ 882 ەتنيكالىق قازاق (259 مىڭ 159 وتباسى) قازاقستانعا ورالعان.
رەسمي ەسەپ بويىنشا، وتانىنا ورالعان ەتنيكالىق قازاقتاردىڭ 61 پايىزدان استامى - وزبەكستاننان، 14 پايىزدايى - قىتايدان، 9 پايىزى - موڭعوليادان، 7 پايىزعا جۋىعى پايىزى - تۇركىمەنستاننان، 4 پايىزدان استامى - رەسەيدەن، 3 پايىزدان كوبى وزگە ەلدەردەن كەلگەن.
ورالماندار قازاقستانداعى جالپى حالىقتىڭ (17،4 ميلليون ادام) 5،5 پايىزى بولىپ وتىر.
دەرەككوز: "ازاتتىق"
