ءانشى قايرات نۇرتاس حالىق ءارتىسى ەسكەندىر حاسانعالييەۆكە العىس ايتتى. ەسكەندىر حاسانعالييەۆ وسىعان دەيىن قايرات نۇرتاستىڭ "اۋىرمايدى جۇرەك" ءانىن وتاندىق تەلەارنالاردىڭ بىرىندە ورىنداعان ەدى.

"قازاق ونەرىندەگى شوقتىعى بيىك ساڭلاق ەسكەندىر اعامنىڭ مەنىڭ رەپەرتۋارىمداعى ءاندى ورىنداۋى مەن ءۇشىن ۇلكەن مارتەبە. ەسكەندىر اعا، مۇنى ءسىزدىڭ اسقان كىشىپەيىلدىگىڭىز، كەڭدىگىڭىز، كورەگەندىگىڭىز، ارتىڭىزدان ەرگەن بۋىنعا جاساعان قامقورلىعىڭىز دەپ بىلەمىن"، - دەدى ءانشى Instagram جەلىسىندەگى پاراقشاسىندا.

سونىمەن قاتار، قايرات نۇرتاس سوڭعى ۋاقىتتا ءوز تاراپىنا سىن ايتقاندار جايلى دا پىكىرىن جەتكىزدى. ونىڭ پىكىرىنشە، حاسانعالييەۆتىڭ "اۋىرمايدى جۇرەك" ءانىن ايتۋى انشىگە شابىت سىيلاعان.

"كەي جانداردىڭ ەڭسەڭدى تۇسىرگىسى كەلەتىن سىندارىنان كەيىن ءسىزدىڭ ارەكەتىڭىز قانات ءبىتىرىپ، شابىت سىيلادى. اللا رازى بولسىن سىزگە!"، - دەپ جازدى قايرات نۇرتاس.

ەسكە سالا كەتەيىك، بۇعان دەيىن رەسپۋبليكالىق باسىلىمداردىڭ بىرىنە بەرگەن سۇحباتىندا كسرو حالىق ءارتىسى بيبىگۇل تولەگەنوۆا قايرات نۇرتاستى دارىنسىزدىعى ءۇشىن سىناپ، قازىرگى ەسترادادا سول سياقتى "بىركۇندىك جۇلدىزداردىڭ" تولىپ كەتكەنىن ايتقان ەدى.

بۇدان كەيىن قايرات نۇرتاس تولەگەنوۆانىڭ سىنىنا جاۋاپ بەردى. "بىلەسىز بە، ول كىسىنىڭ مەنى تانيتىنىنىڭ وزىنە قۋانىشتىمىن. اركىمنىڭ ءوز پىكىرى بار. نەشە ءتۇرلى جاعداي بولادى. مەن ونىڭ سوزدەرىنە وكپەلەمەيمىن. كەرىسىنشە، ول كىسىنى انامداي كورەمىن. ونى شەكسىز قۇرمەتتەيمىن"، - دەگەن ەدى

دەرەككوز: Baq.kz