ق ر اقپارات جانە كوممۋنيكاسيالار مينيسترلىگىنىڭ قولداۋىمەن «قازاقستان» رترك» اق ۇيىمداستىرۋىمەن استانادا قازاق سايتتارى رەداكتورلارىنىڭ فورۋمى باستالدى، دەپ حابارلايدى Qamshy.kz اقپارات اگەنتتىگى. فورۋمدى اقش ەلشىسى دجوردج كرول اشتى.

شارا ماقساتى – قازاق ءتىلدى سايتتاردى دامىتۋ، كونتەنت ساپاسىن ارتتىرۋ جانە وزەكتى ماسەلەلەردىڭ شەشىمىن تابۋ.   

فورۋم بارىسىندا ءسوز باستاعان قازاقستان باسپا ءسوز كلۋبىنىڭ اتقارۋشى ديرەكتورى ساكەن بالبايەۆ شارانىڭ تابىستى ءوتۋىن تىلەدى.

«قازاقستاننىڭ اقپارات قۇرالدارى دامىسا، ەلىمىزدىڭ ۇلتتىق قاۋىپسىزدىگى دە نىعايادى. سايتتار – قازىرگى زاماننىڭ ۇزدىك قۇرالدارى. ينتەرنەتتىڭ ىقپالى گازەتتەرگە قاراعاندا كەڭىرەك»، - دەدى بالبايەۆ.

ال «قازاقستان» رترك» اق باسقارما ءتوراعاسى ەرلان قارين ۇلتتىق ارنانىڭ شارانى ۇيىمداستىرۋداعى ماقساتىن ايتتى.

«قازاق مەديا سالاسىندا جۇرگەن ازاماتتارعا ادىستەمەلىك كومەك بولسىن دەگەن ماقساتتا ۇيىمداستىردىق. جاڭا ادىستەر، تەحنولوگيالار قولدانۋ كەرەكتىگى جونىندە پىكىر الماسۋ ءتاسىلى ارقىلى ءوتسىن دەگەن ويدامىز. ۇلتتىق ارنانىڭ قانداي قاتىسى بار دەسەك، بۇگىنگى تاڭدا ءداستۇرلى باعىت پەن جاڭا مەديانى ءبولىپ قاراستىرۋعا بولمايدى. ەكەۋى بىر-بىرىمەن ۇشتاسىپ، تىعىز بايلانىستا دامىپ جاتىر. ءبىز تەليەۆيزيالىق ونىمدەردى شىعارۋمەن اينالىسىپ جاتساق تا، ۇلتتىق ارنانىڭ الدىندا تۇرعان نەگىزگى ماسەلەنىڭ ءبىرى، ينتەرنەت سالاسى ارقىلى ونىمدەرىمىزدى كەڭەيتۋ. بولاشاقتا جاڭا ءونىمنىڭ بارلىعى وسى سالادا كەڭىرەك داميتىنى انىق»، - دەدى ەرلان قارين.

سونداي-اق، وسى سالاعا قاتىستى ۇلتتىق ارنانىڭ الداعى جوسپارىمەن دە ءبولىستى

«2018 جىلدىڭ قاڭتار ايىندا قازاقستان ۇلتتىق ارناسىنىڭ جاڭا قوسىمشاسىن نازارلارىڭىزعا ۇسىنامىز. مۇمكىندىگىنشە شەتەلدىك تاجىريبەنى، قازىرگى اۋديتوريانىڭ سۇرانىسىن، تالابىن ەسكەرە وتىرىپ جاساۋعا تىرىسامىز. تەلە سەريالدار مەن فيلمدەر ءۇشىن دە جاڭا قوسىمشالار داميتىن بولادى. بۇدان باسقا كەلەسى جىلدىڭ ءبىرىنشى جارتىسىندا تاعى ءبىر ۇلكەن شارانى ۇيىمداستىرۋدى كوزدەپ وتىرمىز. وندا قازاقستاننان وزگە شەتەلدىك مامانداردى دا شاقىرىپ سەمينارلار وتكىزەمىز. ءبىزدىڭ ماقساتىمىز – وسى سالاداعى مۇمكىندىكتەردى كەڭىنەن پايدالانۋ، كورەرمەندەرگە، ونىمدەردى تۇتىنۋشى اۋديتورياعا جاڭا ونىمدە، جاڭا فورماتتا ۇسىنعىمىز كەلەدى. بۇل ءبارىمىز ءۇشىن پايدالى جيىن بولماق»، - دەدى ۇلتتىق ارنانىڭ باسقارما ءتوراعاسى.

قازاقستاننىڭ تۇپكىر-تۇپكىرىنەن بلوگەرلەر مەن سايت رەداكتورلارى جينالعان فورۋم بۇگىن كەشكە دەيىن جالعاسادى. ايتا كەتەيىك، فورۋم 2012 جىلدان بەرى ەلىمىزدە ءداستۇرلى تۇردە جالعاسىپ كەلەدى.