دارىگەرلەر جامبىل وبلىسىندا اپاتقا ۇشىراعان ان-2 ۇشاعىنان امان قالعان جولاۋشىنىڭ جاعدايى جاقسارىپ كەلە جاتقانىن ايتتى دەپ حابارلادى "قازتاگ".

"اسەم شاياحمەتوۆا كەشە ساعات 19.00-دە قالالىق اۋرۋحاناعا تجم جەلىسى بويىنشا جەدەل-جاردەم كولىگىمەن جەتكىزىلدى. اۋرۋحاناعا تۇسكەن كەزدە جاعدايى اۋىر بولاتىن، ءبىراق ەسىن جيناعان ەدى. سۇيەكتەرىنىڭ سىنۋى سالدارىنان كوپ قان جوعالتقان. وعان اۋرۋحاناعا تۇسكەن ساتتەن باستاپ ءتيىستى مەديسينالىق كومەك كورسەتىلدى، قان قۇيىلدى. ءقازىر ناۋقاستىڭ جاعدايى ءبىر قالىپتى اۋىر، ەسىن جيدى. ەگەر قانداي دا ءبىر اۋىرتپالىقتار ورىن الماسا، جاعدايى جاقسارادى دەپ ۇمىتتەنەمىز"، - دەدى شۋ قالالىق اۋرۋحاناسىنىڭ باس دارىگەرى سەيسەنعازى اقپايەۆ تەلەفون ارقىلى.

بۇعان دەيىن حابارلانعانداي، 2015 جىلعى 20 قاڭتاردا ساعات 15.40-تا جامبىل وبلىسىنداعى "شاتىركول" كەن ورنى ماڭىندا "بالقاش-شاتىركول" باعىتى بويىنشا ۇشىپ بارا جاتقان ان-2 ۇشاعى قۇلاعان بولاتىن.

ۇشاقتا 7 ادام بولعان، سونىڭ ىشىندە 3-ەۋى ەكيپاج مۇشەسى. ەكيپاجدىڭ بارلىق مۇشەسى  جانە "قازاقمىس" كورپوراسياسىنىڭ بارلىق قىزمەتكەرى قازا تاپتى.

كومپانيانىڭ تەك ءبىر قىزمەتكەرى عانا امان قالعان. ول شۋ قالاسىنىڭ اۋرۋحاناسىنىڭ جان ساقتاۋ بولىمىنە اۋىر حالدە جەتكىزىلگەن ەدى. اپات سەبەبىن ۇكىمەتتىك كوميسسيا تەكسەرەتىن بولادى. "كازتاگ"

سۋرەت: tengrinews.kz