بۇگىن شىڭجاڭ وڭىرىندەگى مۇسىلمان ايەلدەرى اراسىنان شىققان ۇلكەن تۇلعا ءباتيما قۇلمۇقان قىزى جاكۋلينا (جاكۋلانىڭ كەلىنى) 84 جاسقا قاراعان شاعىندا دۇنيەدەن وزدى.

ءباتيما جاكۋلينا – 1931 جىلى قازىرگى اياكوز ماڭىنداعى ۇشبيىككە قارايتىن ەڭىرەكەي دەگەن جەردە دۇنيەگە كەلگەن. اقتايلاق ءبيدىڭ بەسىنشى ۇرپاعى. اشتىق جىلدارى شەشەسى ءباتيمانى ارقالاپ، ەلمەن بىرگە شاۋەشەك قالاسىنا وتەدى. 1930-40 جىلدارى شاۋەشەكتەگى «كۇلانداميا» مەكتەبىنەن سوڭ شاۋەشەك گيمنازياسىن بىتىرگەن. 1946 جىلى ءانۋار جاكۋلينگە تۇرمىسقا شىعىپ، شاعانتوعاي اۋدانى، ءدوربىلجىن اۋدانى، قۇلجا قالاسى، ءۇرىمجى قالاسى سياقتى جەرلەردە قىزمەتتەر اتقارعان. كۇيەۋى ءانۋار جاكۋلين ىلە ايماعىنىڭ ءۋاليى، شىڭجاڭ ولكەسىنىڭ ساياسي زاڭ دەپارتامەنتىنىڭ باسشىسى، قحر حالىق قۇرىلتايىنىڭ ءبىرىنشى شاقىرىلىم دەپۋتاتى بولعان. ءا.جاكۋلين قۋعىن-سۇرگىنگە ۇشىراعان جىلداردا ءباتيما دا قۋدالاۋعا تۇسكەنىنە قاراماستان، اۋلەتىنىڭ وسىپ-ونۋىنە بار كۇش-جىگەرىن سالدى.

رەپرەسسيا جىلدارىنان سوڭ، «شىڭجاڭ ايەلدەرى» جۋرنالىنىڭ باس رەداكتورى، شىڭجاڭ ايەلدەرى بىرلەستىگىنىڭ ءتورايىمى ورىنباسارى، بۇكىلقىتايلىق ساياسي ءماسليحاتىنىڭ دەپۋتاتى قىزمەتتەرىن اتقاردى. شىڭجاڭ ءوڭىرى ءباتيما قۇلمۇقانقىزىن قۇرمەتتەپ، ءباتۋ اپا دەپ اتاعان.

ءباتيما قۇلمۇقانقىزىن 24 قاڭتار كۇنى ءۇرىمجى قالاسىندا جەرلەيدى.

ءباتيما قۇلمۇقان قىزى – سەمەي وڭىرىنە اتى شىققان جاكۋلا بولىستىڭ كەلىنى. 2013 جىلى جاكۋلانىڭ تۋعانىنا 150 جىل تولۋىنا وراي، شقو تارباعاتاي اۋدانىندا اس بەرىلدى. اسقا ءۇرىمجى قالاسىنان ب.قۇلمۇقان قىزى ارنايى كەلدى. نازارلارىڭىزعا سول كەزدە دايىندالعان «الاشتىڭ الىس كەتكەن ارىستارى» اتتى دەرەكتى ءفيلمدى ۇسىنامىز.

مارقۇمنىڭ تۋعان-تۋىستارى مەن قالىڭ قازاق ەلىنە "قامشى.kz" ۇجىمى كوڭىل ايتادى.