باس ءمۇفتي سەرىكباي قاجى وراز «ازىرەت سۇلتان» مەشىتىندە اقشام نامازىنان كەيىن جاماعاتپەن جۇزدەسىپ، «قۇراننىڭ ومىرلىك قاعيدالارى» تاقىرىبىندا عيبراتتى ۋاعىز ايتتى، دەپ جازادى Qamshy.kz اقپارات اگەنتتىگى muftyat.kz مالىمەتىنە سۇيەنىپ.
باس ءمۇفتي ۋاعىزىندا قۇران – سوڭعى پايعامبارمەن كەمەلىنە جەتكەن ەڭ ۇلى ءدىن – يسلامنىڭ كىتابى ەكەنىن، سوندىقتان ول بارشا ادامزاتقا، بۇكىل عاسىردا ءارى بارلىق عىلىمي دەڭگەيدە ءتالىم ۇيرەتەتىنى تۋرالى ويلارىن پايىمدى تۇجىرىمدارمەن جەتكىزدى.
«قۇران ادامزاتقا امانات. ول – عىلىم مەن ءبىلىم، تالىم-تاربيە. قۇران كارىم – ءومىردىڭ بارلىق سالاسىن قامتىعان، ادامداردى زۇلىمدىقتان، ناداندىقتان قورعاپ، جاقسىلىققا باستايتىن كەمەل كىتاپ. قازىرگى كوپتەگەن عالىمدار ءوزىنىڭ زەرتتەگەن عىلىمي جۇمىستارىنىڭ جاۋابىن وسى قۇراننان تاۋىپ جاتقانى دا جاسىرىن ەمەس. ويتكەنى، عىلىم بولاشاق جايلى تۇجىرىم جاساماي، تەك ناتيجەلەردى عانا ايتا الادى. ال، قۇران تاڭعاجايىپ مۇعجيزا رەتىندە عاسىرلار بۇرىن ايتقان انىقتامالارى عىلىمدا اينا قاتەسىز ورىندالىپ جاتىر»، دەدى باس ءمۇفتي.
سونداي-اق، باس ءمۇفتي سەرىكباي قاجى وراز قاسيەتتى قۇران قوعامدىق ءومىردىڭ بارلىق سالاسىن قامتيتىنى جايلى ايتىپ ءوتتى.
«ادامزاتتى ناداندىق شىرماۋىنان قۇتقارىپ، قاراڭعىلىقتان نۇرعا باستاۋ ءۇشىن جىبەرىلگەن قاسيەتتى قۇران كارىم – جول كوسەتۋشى نۇر. قۇراندا ءناپسى تاربيەسى، ار-وجدان تازالىعى، وز-وزىنە ەسەپ بەرۋ، جانۇيانى باسقارۋ، بالا تاربيەسى، الەۋمەتتىك قاتىناستار، ادەپتىلىك قاعيدالارى، ادامگەرشىلىك نورمالارى، ەكونوميكا، جاراتىلىس زاڭدىلىقتارى، عىلىم سالالارىنىڭ نەگىزدەرى سياقتى كوپتەگەن جايتتار قامتىلعان. قۇران وقىلعان، وعان امال ەتىلگەن ۇيدە، جەردە، ەلدە تىنىشتىق ورنايدى، اللانىڭ بەرەكەتى بولادى»، دەپ اتاپ ءوتتى باس ءمۇفتي سەرىكباي قاجى ساتىبالدى ۇلى.
