ق ر پرەزيدەنتى نۇرسۇلتان نازاربايەۆ تاماق تالعامايتىن، ءدامدى بولسا بولعانى، ءبارىن جەي بەرەتىن. بۇل تۋرالى ەلباسىنىڭ العاشقى باس اسپازى الەكسەي سىرىح ايتتى، دەپ حابارلايدى Qamshy.kz اقپارات اگەنتتىگى Tengrinews.kz پورتالىنا سىلتەمە بەرىپ.

«ول تاماق تالعامايتىن. تاماقتاردىڭ ءدامدى جانە ءار ءتۇرلى بولعانىن جاقسى كورەتىن. ءبىراق ناعىز قازاقتار سىندى پىسكەن ەتتى ءسۇيىپ جەيتىن. كوكونىستەرمەن، كارتوپپەن پىسكەن تاۋىق ەتىن جاقسى كوردى. بالىقتى دا ءجيى جەيتىن. سونداي-اق بورشش تاماعىن جاقسى كورەتىن. ول مەنىڭ جاساعان تاماقتارىمدى بىردەن بىلەتىن»، - دەدى باس اسپاز.

الەكسەي سىرىحتىڭ ايتۋىنشا، كۇنى-تۇنى جۇمىستا بولاتىن، سەبەبى كەز كەلگەن ۋاقىتتا ونى شاقىرىپ قالۋى مۇمكىن ەدى.

«مەن كۇندىز جۇمىسقا اتتانىپ، كەشكە ماسكەۋدە نەمەسە قازاقستاننىڭ وزگە قالالارىندا جۇرەتىنمىن. ءبارى اياق استىنان شەشىلەتىن. پىشاقتارىممەن بىرگە شابادانىمدى الىپ، جۇرە بەردىم. ءتىپتى اۋەجايلاردا ۇشاقتار كەشىگىپ قالعان ۋاقىتتار ءجيى بولاتىن، وندايدا باستىققا تاماق ازىرلەپ بەرۋ كەرەك. سوندا مەنى اۋەجايدىڭ اس بولمەسىنە كىرگىزەتىن، ال مەن ءوز جۇمىسىمدى باستاپ كەتەمىن. ءوزىم جەكە جوسپار قۇرا المايتىنمىن، وتباسىممەن دە كوپ ۋاقىتىمدى وتكىزە المادىم. جاعداي اياق استى ورىن الىپ جاتادى. ماسەلەن، پرەزيدەنتتىڭ شەت ەلگە ۇشاتىنى جايىل حابارلانىپ، ول تىزىمدە مەن جوق بولسام، دەرەۋ وتباسىمدى الىپ دەمالۋعا اتتانىپ كەتەتىنمىن»، - دەدى ول.

الەكسەي سىرىح نازاربايەۆتىڭ جانىندا كەڭەس ۇكىمەتىنەن بەرى جۇمىس ىستەگەن، جالپى 27 جىل ەلباسىنىڭ باس اسپازى بولدى. العاشقى جىلدارى جالعىز ىستەگەن، تەك 8 جىلدان كەيىن جانىنا اسپازدار الۋعا رۇقسات ەتتى.

نازاربايەۆ قازاق تاعامدارىنا ۇلكەن قۇرمەتپەن قاراعان.

«ماڭىزدى قوناقتار كەلەردە، قازاق تاعامدارىنىڭ جاسالۋىن باستى نازارعا الاتىن. وزگەلەرگە وزىمىزگە ءتان ءتۇرلى، ءدامدى، ۇلتتىق اسحانامىزدىڭ بارىن ءبىلۋى ءتيىس ەدى. داستارحان تولىپ  تۇرۋى كەرەك. بۇل قازاق حالقىنىڭ قوناقجايلىلىعىنىڭ بەلگىسى.

ءبىر جاعداي بولعان. مەيرامحانادا بيلل كلينتوندى كۇتۋىمىز كەرەك بولدى. مەيرامحانا يتالياندىق ەدى. ۆلاديمير ني بىزگە دايىن بولۋدى، ءارى ۇلتتىق تاعامداردىڭ بولۋىن تاپسىردى. قوناعىمىز كەلگەندە الدىمەن كاپرەزە سالاتىن جانە كەپتىرىلگەن ريزوتتو اسىن ۇسىندىق. سوندا نۇرسۇلتان نازاربايەۆ پروتوكول باسشىسىن شاقىرىپ الىپ، ۇلتتىق تاعامداردىڭ نەگە بەرىلمەي جاتقانىن ايتتى. سول ساتتە-اق مەن ەت اسۋعا كىرىسىپ كەتتىم. كەيىن قۋىرداق پەن ءمانتى ۇسىندىق. باستىق تا، قوناعىمىز دا ريزا بولدى. اسپازداردى شاقىرىپ الىپ، بارىمىزگە العىس ايتتى»، - دەدى سىرىح.

سونداي-اق ۆلاديمير پۋتينمەن دە بولعان جاعدايدى ەسىنە ءتۇسىردى.

«پۋتين كەزەكتى رەت شىمبۇلاققا كەلگەندە، ءبىز ارنايى تاعامىمىزدى ۇسىندىق. ءوز ارامىزدا ونى «سنيكەرس» دەپ اتاپ كەتكەنبىز. ول بودەنە تۋراماسى سالىنعان قوزى بودى. پۋتينگە ول اسىمىز قاتتى ۇنادى، باستىق تا ەڭبەگىمىزدى جوعارى باعالادى. كەيىن ءمانتى ۇسىندىق. داياشىلار بىرنەشە ۋاقىتتان كەيىن ۇستەل ءۇستىن جيناستىرۋعا بارعاندا، پۋتين ءالى جەيتىنىن ايتتى. ول ءمانتىنى ءسۇيىپ جەيتىن، تاعى سالىپ بەرۋىمىزدى ءجيى وتىنەتىن»، - دەدى باس اسپاز.