ارىس قالاسىندا حيدجاب كيەتىن وقۋشىنىڭ اتا-اناسى مەن مەكتەپ اكىمشىلىگى اراسىندا داۋ تۋىندادى، - دەپ حابارلايدى "31-ارنا".

ايشا ەسكەرمەس ارىس قالاسىنداعى №376 مەكتەپتىڭ ەكىنشى سىنىپ وقۋشىسى. 17 قاڭتار كۇنى اتا-انا مەكتەپكە قىزىن باسىنا ورامال تاققىزىپ جىبەرەدى.ال مەكتەپ باسشىلىعى اتا-انانى شاقىرىپ، زاڭدا وقۋشىلار مەكتەپتىڭ ىشكى ءتارتىبىن ساقتاۋى كەرەك ەكەندىگى جازىلعانىن تۇسىندىرەدى.

«مەكتەپكە وقۋشىلاردىڭ ورامال تاعىپ كەلۋىنە بولمايدى. اتا-انالار جينالىسىن وتكىزدىك، ولاردىڭ 99 پايىزى مەكتەپ اكىمشىلىگىن قولدادى. ءتىپتى، وقۋشىنى باسقا مەكتەپكە اۋىستىرۋدى سۇراپ وتىر»،- دەيدى مەكتەپتىڭ وقۋ ءىسى جونىندەگى مەڭگەرۋشىسى تالعات احمەتوۆ.

مەكتەپ باسشىلىعى ايشانى ءبىلىم ورداسىنىڭ جارعىسىن بۇزدى دەپ كىنالايدى. ال اتا –انا ايتىلعانمەن كەلىسەر ەمەس.. كەرىسىنشە، قىزدىڭ اتا-اناسى مەكتەپ اكىمشىلىگى قىز بالانىڭ ءدىني ەرەجەلەردى ۇستانۋعا كەدەرگى كەلتىرىپ وتىر دەپ ەسەپتەيدى.

رۋسلان ءابىلوۆ ( وقۋشى قىزدىڭ اكەسى): "ءبىز يسلام ءدىنىن ۇستانامىز، قۇرانى كارىمنىڭ "نۇر" سۇرەسىنىڭ 31-اياتىندا "بارلىق ايەل ورامال تاعىپ، ۇزىن كويلەك كيگەيۋى ءتيىس" دەپ جازىلعان. ءبىز دە اۋرەتتى جاۋىپ ءجۇرۋدى دۇرىس سانايمىز".

قالالىق ءبىلىم ءبولىمىنىڭ وكىلدەرى دە بۇل داۋدا مۇعالىمدەردىڭ ۇستانىمىن دۇرىس دەپ ەسەپتەيدى.

ءبىلىم ءبولىمىنىڭ ادىسكەرى بەرەكە تاسقىمبايەۆ مىرزا  "بۇل مەكتەپتىڭ قىس كەزىندەگى فورماسى - اق الجاپقىش، كوك نەمەسە قارا ءتۇستى كيىم. باسقا بانت تاعۋعا بولادى، ال ورامالعا رۇقسات ەتىلمەيدى"، - دەسە، سونىمەن قاتار، ايشا ەسكەرمەستىڭ اتا-اناسىنا ەسكەرتۋ جاساعان مۇعالىمدەردى جەرگىلىكتى مەشىتتىڭ وكىلدەرى دە قولداپ وتىرعان كورىنەدى. ولار دا ەلدەگى ەرەجەلەر مەن زاڭداردى ۇستانۋ ءدىني سەنىمگە قايشى كەلمەيدى. وقۋشى مەكتەپ اكىمشىلىگىنىڭ زاڭىندا بەكىتىلگەن مەكتەپ كيىمىن كيۋى ءتيىس، ال باسقا جەرلەردە حيدجابىن كيە بەرسىن،ول ءۇشىن مەكتەپكە بارماي قالۋعا نە مەكتەپ باسشىلىعىمەن سوتتاسۋعا بولمايتىندىعىن ايتتى.

ءدىني سەنىم بوستاندىعىن ءبىرىنشى ورىنعا قويعان ايشا ەسكەرمەستىڭ اكەسى قىزىنىڭ مەكتەپتە جالاڭباس جۇرۋىنە ۇزىلدى-كەسىلدى قارسى. تىپتەن، وسى تۋراسىندا پروكۋراتۋراعا شاعىم ءتۇسىرىپ تە ۇلگەرىپتى. قۇقىق قورعاۋ ورگاندارىنا شاعىمدانۋعا مۇعالىمدەر قاۋىمى دا ازىرلەنىپ جاتىرعان كورىنەدى.