وزبەكستان ۇلتتىق قاۋىپسىزدىك قىزمەتى قاراقالپاقستاننىڭ كەيبىر اۋداندارىندا تۇراتىن قازاقتاردى جەر اۋدارا باستادى، دەپ حابارلايدى Qamshy.kz اقپارات اگەنتتىگى algakarakalpakstan.com سايتىنا سىلتەمە جاساپ.

دەرەكتەرگە سەنسەك، مۇنداي جاعدايلار قوڭىرات، قاراوزەك، تاقتاكوپىر اۋداندارى مەن قاراقالپاقيا اۋىلىندا بولىپ جاتىر.

سايتتىڭ جازۋىنشا، بارلىق ماسەلە وزبەكتەردى فەرعانا مەن ءاندىجاننان جوعارىدا اتالعان اۋداندارعا كوشىرىپ اكەلۋدەن باستالعان. بۇعان جەرگىلىكتى قازاقتار نارازىلىق ءبىلدىرىپ، سول ءۇشىن وزبەك بيلىگى ولاردى دەپورتاسيالاۋعا كىرىسكەن.

بيلىك جەر اۋدارىلعان قازاقتاردىڭ جەر تەلىمدەرىن تارتىپ العان. وزبەكستان وكىمەتىنىڭ مۇنداي شەشىمىنە جەرگىلىكتى تۇرعىندار جاپپاي نارازىلىق بىلدىرۋدە. سەبەبى كوپتەگەن وتباسى ويراندالىپ، قولدارىنداعى بار دۇنيە-مۇلكىنەن ايىرىلعان. ال جەر اۋدارىلماعان قازاقتار قىستىڭ كوزى قىراۋدا جىلۋسىز جانە جارىقسىز قالىپ وتىر.

سايكەسىنشە، ىشكى وزبەكستاننان كوشىرىپ اكەلىنگەن وزبەكتەردى ورنالاستىرۋ جۇمىسى قارقىندى جۇرگىزىلۋدە. ولارعا جەر تەلىمدەرى ءبولىنىپ، جاڭا ۇيلەر سالىنعان، اۋىلشارۋاشىلىعىنا ارنالعان جاڭا تەحنيكالار بەرىلىپ جاتىر. سونىمەن قاتار وزبەكتەردى ازىق-تۇلىكپەن قامتاماسىز ەتۋ ءۇشىن بانكتەر قاراستىرعان، دەيدى اۆتور.

جەرگىلىكتى تۇرعىندارعا كەشكى توعىزدان كەيىن سىرتقا شىعۋعا جانە وزگە وبلىستاردان كوشىپ كەلگەن وزبەكتەرمەن قارىم-قاتىناسقا ءتۇسىپ، سويلەسۋگە قاتاڭ تىيىم سالىنعان. ەكى ادامنان ارتىق جينالىپ تۇرۋعا دا بولمايدى. اتالمىش ءتارتىپتى بۇزعان ازاماتتاردىڭ بارلىعىن قازاقستانعا دەپورتاسيالاۋ كوزدەلگەن، دەپ جازادى سايت.