اعىلشىننىڭ كومەك قوعامى Oxfam جاھاندىق تابىس ادىلەتسىزدىگىنىڭ 2017-دە ارتا تۇسكەنىن بايقاعان، دەپ جازادى Qamshy.kz. بۇل تۋرالى  BBC تۇرىك قىزمەتى حابارلادى.

ماقالادا ەڭ باي ادامداردىڭ ءبىر پايىزى عانا جەر-جاھانداعى كاپيتالدىڭ 82 پايىزىنا يە ەكەنىن جازعان.

كەدەيلىكپەن جانە سەبەپتەرىمەن كۇرەسۋدى ماقسات تۇتاتىن، الەمنىڭ 90-نان استام ەلىندە قىزمەت ەتەتىن قوعامنىڭ ەسەبىنشە الەمدەگى كەدەيلەردىڭ 50 پايىزىندا ەشقانداي دا كاپيتال ارتۋى بايقالماعان.

Oxfam بايقاعانداي، الەمدىك ەكونوميكانىڭ جۇيەسى ساتسىزدىككە جول الىپ بارادى.

سالىقتان جالتارۋ، كومپانيالاردىڭ ساياساتتاعى ارتىپ بارا جاتقان ىقپالى، جۇمىسشى قۇقىقتارىنىڭ «ەروزياعا» ءتۇسۋى، ۇنەمدەۋ ساياساتتارى تابىس ادىلەتسىزدىگىنىڭ شىڭىراۋىن تەرەڭدەتىپ بارا جاتقان سەبەپتەرى دەپ توپشىلاعان Oxfam.

ەسكە سالساق، Oxfam 2017 جىلدىڭ باسىندا الەمدەگى حالىقتىڭ جارتىسىنا تيەسىلى كاپيتالدىڭ تەك 8 ادامنىڭ قولىندا ەكەنىن مالىمدەگەن بولاتىن. اتالعان سان بيىل 42-گە ارتقان. بۇل ەسەپكە سوڭعى ستاتيستيكالار قولدانىلعان.

Oxfam ديرەكتورى Mark Goldring «اتالعان جاعدايعا قالاي قاراساڭىز دا قابىلداۋ قيىن» دەگەن.

زەرتتەۋ قوعامى ەكونوميكالىق پروسەستەردى باقىلاپ، كومپانيالاردىڭ اكسيونەرلەرىنىڭ پايداسىن ۇستەمەلەي ءتۇسۋ ءۇشىن اتقارعان جۇمىستارىنىڭ الەۋمەتتىك سەبەپتەرىنىڭ نازارعا الىنۋى ءتيىس ەكەنىنە ءمان بەرىپ وتىر.

الەمدەگى دوللار ميللياردەرلەرىنىڭ جالپى سانى  2043 ەكەنىن مالىمدەگەن Oxfam، ءاربىر 10 ميللياردەردىڭ توعىزى ەركەك ەكەنىن، ايەل مەن ەركەك اراسىنداعى تابىس ادىلەتسىزدىگىنە دە نازار اۋدارعان.  

Oxfam قوعامى ەل ۇكىمەتتەرىنە الەمدەگى بايلاردىڭ 10 پايىزىنىڭ بايلىعى جەر بەتىندەگى كەدەيلەردىڭ 40 پايىزىنىڭ كاپيتالىنان اسىپ كەتپەۋى ءۇشىن باعدارلامالار قابىلداۋ قاجەتتىگىن ۇسىنعان.

الايدا ەركىن نارىق ەكونوميكاسىن جاقتايتىن زەرتەۋ ۇيىمى ەكونوميكالىق بايلانىستار ينستيتۋتىنىڭ ديرەكتورى  Mark Littlewood «Oxfam كەدەي توپتىڭ ماسەلەسىنە شەشىم تابۋدىڭ ورنىنا باي ادامداردىڭ ماقتانۋىنا جاعداي جاساپ بەرىپ وتىر» دەپ سوكتى. «سالىقتىڭ ارتا ءتۇسۋى مەن كاپيتالدىڭ قايتا ءبولىنىسى كەدەي توپتار ءۇشىن ءبىر پايدا بەرمەيدى. باي تۇلعالار بىردەي ۋاقىتتا ەڭ كوپ سالىقتى تولەيتىن كىسىلەر. ولاردىڭ پايداسىنىڭ ازايتىلۋى ەشكىمگە پايدالى ەمەس»، - دەگەن ينستيتۋت ديرەكتورى.