اقتوبە وبلىسىندا اۆتوبۋستان شىعا الماي، تىرىدەي جانىپ كەتكەن 52 ادامنىڭ وقيعاسىن ءقازىر بۇكىل الەمنىڭ باق-تارى جارىسا جازىپ جاتىر. ينتەرنەت كەڭىستىگىنە كوز جۇگىرسەك، سوڭعى 2017 جىلدىڭ وزىندە عانا وسىنداي وقيعالار الەمدە بىرنەشە مارتە قايتالانىپتى. ەندى اۆتوبۋستارداعى ءورت وقيعالارىنا رەت-رەتىمەن توقتالىپ وتەيىك.

2017 جىلدىڭ 3 شىلدەسى،  گەرمانيا

باۆاريا ايماعىندا جولعا شىققان تۋريستىك اۆتوبۋستىڭ ىشىندە 48 جولاۋشى بولعان. ونىڭ ەكەۋى – جۇرگىزۋشى. يتاليانىڭ كۋرورتتىق قالاسىنا بارا جاتقان جەرگىلىكتى زەينەتكەرلەر مىنگەن اۆتوبۋس جۇك كولىگىنە سوعىلىپ، اۆتوبۋس اپ-ساتتە ورتتەنگەن. 31 جولاۋشى اۋىر جاعدايدا اۋرۋحانا جەتكىزىلىپ، 18 جولاۋشى اۆتوبۋستىڭ ىشىندە تىرىدەي جانىپ كەتكەن.

2017 جىلدىڭ 5 شىلدەسى، ءۇندىستان

بارالي قالاسىنىڭ ماڭىندا 22 ادام مىنگەن جولاۋشىلار اۆتوبۋسى قارسى باعىتقا شىعىپ كەتىپ، جۇك كولىگىمەن سوقتىعىسقان. اۆتوبۋستىڭ ديزەل قۇيىلعان باگى اتىلىپ، سالوننىڭ ءىشى تۇتاس جالىننىڭ قۇشاعىندا قالعان بولاتىن. ۇيىقتاپ وتىرعان جولاۋشىلار قاس-قىعىم ءساتتىڭ ىشىندە كۇلگە اينالدى. ءورت سوندىرۋشىلەر وقيعا ورنىنا جىلدام جەتكەنىمەن، جولاۋشىلاردى قۇتقارۋعا ەشقانداي مۇمكىندىك قالماعان ەدى.

2017 جىلدىڭ 2 شىلدەسى رەسەي، تاتارستان

سامارادان شىعىپ يجيەۆسك قالاسىنا بارا جاتقان اۆتوبۋس جۇك كولىگىمەن بەتپە-بەت سوعىلۋ سالدارىنان اۋدارىلىپ قالعان. 28 جولاۋشى مىنگەن اۆتوبۋس تۇتاس وتقا وراندى. سالوننان شىعىپ ۇلگەرمەگەن 14 جولاۋشى وقيعا ورىنىندا مەرت بولدى، ولاردىڭ ىشىندە ەكى بالا بار. تەكسەرۋ قورىتىندىلارى كورسەتكەندەي، جول اپاتىنا جۇرگىزۋشىلەر كىنالى بولۋ مۇمكىن دەگەن نۇسقا قارالعان. تاتارستاندا وسى وقيعاعا بايلانىستى قارالى كۇن جاريالاندى. 

2017 جىلدىڭ 14 شىلدەسى، ەكۆادور

كيتو قالاسىنىڭ ماڭىندا اۆتوبۋس اۋدارىلىپ، سالون ىشىندە جىلدام ءورت شىققان. جەرگىلىكتى توتەنشە جاعدايلار قىزمەتى مالىمدەگەندەي، ورتەنەگەن اۆتوبۋستان 26 ادام شىعىپ ۇلگەرىپ، 14 جولاۋشى تىرىدەي جانىپ كەتكەن.

دارىن نۇرساپار