ءال-فارابي اتىنداعى قازاق ۇلتتىق ۋنيۆەرسيتەتى، جۋرناليستيكا فاكۋلتەتى «باسپا ءسوز جانە ەلەكتروندى ب ا ق» كافەدراسىنىڭ ۇيىمداستىرۋىمەن 2015 جىلى 25-ناۋرىزىندا قازاق حاندىعىنىڭ 550 جىلدىعىنا وراي ستۋدەنتتەر اراسىندا «ءبىز جانباساق لاپىلداپ...» اتتى رەسپۋبليكالىق جاس اقىندار ءمۇشايراسى وتەدى.

ءمۇشايرانىڭ ماقساتى: وسكەلەڭ جاس ۇرپاقتىڭ بويىنداعى پاتريوتيزم ۇشقىنىن جالىنداتىپ، ۇلتجاندى ازامات ەگەمەن ەلدىڭ ەرتەڭى ەكەنىن سەزىندىرۋ. ستۋدەنت كەزدەگى جاستىق جالىنىنا ورانعان جىگەرلى جىرلاردى، تۇمسا بۇلاقتاي ءمولدىر ولەڭدەردى ناسيحاتتاۋ. اقىنداردى ىنتالاندىرۋ.

ءمۇشايراعا اقىندار مىناداي ءۇش تاقىرىپتاعى ولەڭدەرىن جولدايدى: 1.قازاق حاندىعىنا – 550 جىل (قازاق جۇرتىنىڭ 1465 جىلدان بۇگىنگە دەيىنگى قايعىسى مەن قۋانىشى، ەرتەڭگى بولاشاعى ستۋدەنتتەر كوزىمەن.) 2. ستۋدەنتتىك ءومىر 3. ەركىن تاقىرىپ. ءمۇشايرانىڭ جۇلدەسى: باس جۇلدە (بىرەۋ) ءبىرىنشى ورىن (بىرەۋ) ەكىنشى ورىن (ەكەۋ) ءۇشىنشى ورىن (ۇشەۋ) ارنايى جۇلدە (بەسەۋ)

ءمۇشايراعا قاتىسۋشى تالاپكەر وسى ءۇش تاقىرىپقا ارنالعان ولەڭدەرىن 2015 جىلدىڭ 10 ناۋرىزىنا دەيىن جىبەرۋ ءتيىس. قوسىمشا بايلانىس تەلەفونى، سۋرەتىن سالۋى مىندەتتى. ءمۇشايراعا بۇرىن جاريالانباعان ولەڭدەر عانا قابىلدانادى. شىعارما كولەمى ا4 فورماتىندا 5 بەتتەن اسپاعانى ءجون. شارتتارى تۇگەل ورىندالماعان، مەرزىمىنەن كەشىككەن شىعارمالار قاتىستىرىلمايدى. جەڭىمپاز اقىنداردىڭ جىرلارى جەكە جيناق بولىپ جانە فاكۋلتەتتىڭ «جۋرناليست» گازەتىنە جاريالانادى. جەڭىمپازداردى قارا قىلدى قاق جاراتىن قازىلار القاسى انىقتايدى.

شىعارمالار مىنا ەل.پوشتاعا جولدانۋى ءتيىس: jurkaznu.kz@mail.ru ۇيىمداستىرۋشى: قازۇۋ جۋرناليستيكا فاكۋلتەتى باسپا ءسوز جانە ەلەكتروندى ب ا ق كافەدراسى

ءالىمجانوۆا ايگەرىم، جۋرناليستيكا فاكۋلتەتىنىڭ وقىتۋشىسى