2018 جىلى 22 قاڭتاردا شىمكەنت قالاسىنىڭ اكىمى نۇرلان ساۋرانبايەۆ ءال-فارابي اۋدانىنىڭ اكىمى باۋىرجان قالجانوۆقا ورىسشا سويلەمەگەنى ءۇشىن ەسكەرتۋ جاسادى. ونىمەن قويماي، ءوزى قويىرتپاق تىلدە سويلەپ، قاتتى سىنعا ۇشىرادى. ساۋرانبايەۆتىڭ بۇل ارەكەتىنە قاتىستى Qamshy.kz اقپارات اگەنتتىگى شىمكەنت قالاسى اكىمدىگىنە رەسمي ساۋال جولدادى. ءازىل-شىنى ارالاس جازىلعان ءۇشبۋ حات سايتىمىزدا دا جاريالاندى. الايدا جاۋاپ قاتقان ەشكىم جوق. وسىعان وراي وڭتۇستىك قازاقستان وبلىسىنىڭ اكىمى جانسەيىت تۇيمەبايەۆقا بىرنەشە سۇراق قويعاندى ءجون كوردىك.
قۇرمەتتى جانسەيىت قانسەيىت ۇلى!
- نۇرلان ساۋرانبايەۆتىڭ ءتىل تۋرالى سويلەگەن ءسوزىن وبلىس باسشىسى رەتىندە ءسىز قالاي تۇسىندىرەسىز؟
- ساۋرانبايەۆ ورىسشا سويلەمەگەن اۋدان اكىمىنە كوپتىڭ كوزىنشە ەسكەرتۋ جاسادى. ال مەملەكەتتىك ءتىلدى قورلاعان ساۋرانبايەۆقا قانداي دا ءبىر شارا قولدانىلعانىن ەستىمەدىك. نەگە؟
- نۇرلان ساۋرانبايەۆقا ساۋال جولداعانىمىزعا ءبىر اپتادان استى. ءالى جاۋاپ كەلگەن جوق. بۇل شىمكەنت اكىمىنىڭ ب ا ق وكىلدەرىمەن ساناسپاعانى ما، الدە قىزمەتىنە سالعىرت قاراعانى ما؟
- ءسىز قازاق ءتىلىنىڭ بىلگىرىسىز، كوپتەگەن وقۋلىقتىڭ اۆتورىسىز. فيلولوگيا عىلىمدارىنىڭ دوكتورى، پروفەسسور رەتىندە مۇنداي شەنەۋنىكتەردىڭ مەملەكەتتىك قىزمەتتە جۇمىس ىستەۋىنە قالاي قارايسىز؟
- شىمكەنتتىڭ بۇرىنعى اكىمى عابيدوللا ءابدىراحىموۆتىڭ قىزمەتتەن كەتۋىن ءسىزدىڭ تاعايىندالۋىڭىزبەن بايلانىستىراتىندار بار. وبلىس ورتالىعىنىڭ اكىمىن اۋىستىرۋعا نە سەبەپ بولدى؟
پىكىر قالدىرۋ