ءۇندىستاننان تۋريستىك ساپاردان ورالعان الماتىنىڭ ءۇش تۇرعىنى تىرىسقاق دەرتىنە شالدىققانى انىقتالدى.
كتك ارناسى ءقاۋىپتى دەرت جۇقتىرعاندار اۋرۋحانادا وقشاۋ ورىنعا جاتقىزىلىپ، دارىگەرلەردىڭ باقىلاۋىنا الىنعانىن حابارلادى.
تۋىستارىنىڭ ايتۋىنشا، قازاقستاندىقتار ءبىر اي بۇرىن تۋريستىك ساپارمەن ءۇندىستانعا بارىپ، التى قالادا بولعان. ساپار كەزىندە بىرەۋى ءوزىن جايسىز سەزىنىپ، كەيىن دەنساۋلىق جاعدايى تۇراقتالعانداي بولعان. ءبىراق الماتىعا ورالعاننان كەيىن تاعى ناشارلاپ، قاڭتاردىڭ 31-ىندە جۇقپالى دەرتتەن ەمدەيتىن اۋرۋحاناعا جاتقىزىلعان.
"الماتىلىقتار ءۇندىستاندا ءارتۇرلى استان جەپ، سۋ ىشكەن. دەرت ۇلۋدان شيكىلەي جاسالاتىن تاعام جەگەندە جۇققان بولۋى مۇمكىن"، - دەگەن بولجام ايتادى الماتى قالاسى قوعامدىق دەنساۋلىق ساقتاۋ دەپارتامەنتىنىڭ اسا ءقاۋىپتى جۇقپالى اۋرۋلاردى ەپيدەمولوگيالىق قاداعالاۋ ءبولىمى جەتەكشىسى سايات قاۋمەتبايەۆ.
قازاقستاندىق تۋريستەردىڭ ءقاۋىپتى دەرت جۇقتىرعانى انىقتالعاننەن كەيىن دارىگەرلەر ولارمەن بايلانىستا بولعانداردىڭ ءبارىن – وتباسى مۇشەلەرىن، ۇشاقتا بىرگە كەلگەن جولاۋشىلار مەن ۇشاق ەكيپاجىن تۇگەلدەي تەكسەرگەن. ازىرشە وزگەلەردەن دەرت بەلگىلەرى انىقتالعان جوق دەپ حابارلاندى.
دارىگەرلەردىڭ مالىمەتىنشە، وتكەن جىلعى قاراشا-جەلتوقسان ايلارىندا الماتىدا ءۇندىستاننان كەلگەن بەس ادامنان تىرىسقاق دەرتى انىقتالعان.
