داۋدىڭ باسى – اقشاداعى «كوگەرشىن»

2017 جىلى اينالىمعا ەنگەن 500 تەڭگەلىك بانكنوت حالىقتىڭ قولىنا تيمەي جاتىپ سىنعا ۇشىرادى. اقشادا بەينەلەنگەن كوگەرشىندەر كادىمگى شاعالا بولىپ شىققان. ونىڭ ءوزىن اقشا شىعارۋشىلار شەتەلدىك فوتوگرافتاردان ۇرلاعان دەسەدى. الايدا ۇلتتىق بانك مۇنى تەرىسكە شىعاردى.

العاشىندا شۆەيساريالىق فوتوگراف مارسەل بۋركحارد 500 تەڭگەلىك بانكنوتتا ءوزى تۇسىرگەن سۋرەتتىڭ قولدانىلعانىن ايتتى. بىرنەشە كۇننەن كەيىن ونىڭ قاتارىنا كانادالىق فوتوگراف كەيت تەستەر قوسىلدى. ول دا بانكنوتتاعى شاعالانىڭ ءبىرى وزىنە تيەسىلى ەكەنىن مالىمدەپ، ۇلتتىق بانككە سۋرەتتىڭ ينتەرنەتتەن الىنعانىن مويىنداۋى كەرەكتىگىن ەسكەرتتى. فوتوگراف ءوزىنىڭ فەيسبۋك پاراقشاسىندا سۋرەتتى 2010 جىلدىڭ تامىزىندا كاناداداعى ءبىر جاعالاۋدا تۇسىرگەنىن جازعان.

Qamshy.kz اقپارات اگەنتتىگىنىڭ جۋرناليسىمەن تىلدەسكەن مارسەل بۋركحارد تا ارنايى سەرتيفيكات تالاپ ەتتى.

ەكى فوتوگراف بانكنوتتا بەينەلەنگەن شاعالالاردىڭ وزدەرىنە تيەسىلى ەكەنىن مويىنداتىپ، ەڭبەكتەرىنە لايىقتى وتەماقى الۋدى ماقسات تۇتقان. «قۇستاردىڭ قيمىل-قوزعالىسى ۇقساس بولادى، ديزاينەرلەر ەشقانداي گرافيكالىق باعدارلاما قولدانباي، سۋرەتتەردى قولمەن سالادى»، - دەپ مالىمدەگەن ۇلتتىق بانكتىڭ جاۋابىنا بۋركحارد پەن تەستەر قاناعاتتانبادى. ولار شاعالانى ءدال وسىلاي سۋرەتكە ءتۇسىرۋ مۇمكىن ەمەس ەكەنىن العا تارتىپ وتىر. وسى ورايدا Qamshy.kz اقپارات اگەنتتىگى ۇلتتىق بانككە رەسمي ساۋال جولداعان ەدى. بانكتىڭ جاۋابى اراعا 20 كۇن سالىپ ءبىراق كەلدى.

قازاق تەڭگەسىندەگى «ورىس استاناسى»

بانكنوتتاعى «موسكۆا» بيزنەس-ورتالىعى دا حالىقتىڭ اشۋىنا ءتيدى.

بىلتىر جەلتوقساندا بولعان ۇكىمەت ساعاتىندا ءماجىلىس دەپۋتاتى باقىتبەك سماعۇل بانكنوتتاعى بيزنەس ورتالىقتىڭ ەش سيمۆولدىق ءمانى جوق ەكەنىن باسا ايتقان.

«جاڭا 500 تەڭگەدە كەسكىندەلگەن ەلورداداعى «موسكۆا» كوممەرسيالىق بيزنەس ورتالىعىنىڭ بۇكىل قازاقستان ءۇشىن ەش ىزگى سيمۆولدىق ءمانى جوق. شىنداپ كەلگەندە، الەمدە ۇلتتىق ۆاليۋتادا تاڭبالاناتىن بەينە سيمۆولدىق مانگە يە بولىپ كەلەدى. سوندىقتان وعان قوعام دا، ورتالىق بانكتەر دە بەي-جاي قارامايدى»، - دەگەن سماعۇلوۆ ۇلتتىق ۆاليۋتامىزدا نە بەينەلەنەتىنىن قوعامدىق تالقىعا شىعارۋ كەرەكتىگىن ايتتى.

ال ۇلتتىق بانك بيزنەس-ورتالىقتىڭ ارحيتەكتۋرالىق اسەمدىگىن عانا نەگىزگە الىپتى.

«ەگەر «قازاق ەلى» سەرياسىنىڭ باسقا بانكنوتتارىنا قاراساق، ولاردىڭ مەملەكەتكە تيەسىلى – تيەسىلى ەمەستىگىنە قاراماستان، بەت جاعىندا قازاقستاننىڭ استاناسى – استانا قالاسىنىڭ ارحيتەكتۋرالىق سان الۋاندىعىن كورسەتەتىن عيماراتتار مەن قۇرىلىستار بەينەلەنگەن. ماسەلەن، «قازاق ەلى» ەسكەرتكىشى، پارلامەنت سەناتىنىڭ عيماراتى، تاۋەلسىزدىك سارايى، «سارىارقا» رەسپۋبليكالىق ۆەلوترەگى، «حان شاتىر» ساۋدا ءۇيى.

«موسكۆا» بيزنەس-ورتالىعى ەلوردانىڭ كەڭىنەن تانىمال عيماراتى بولىپ تابىلادى جانە بانكنوتتا بەينەلەنگەن كەزدە ۇلتتىق بانكتىڭ ديزاينەرلەرى بۇعان تەك ارحيتەكتۋرالىق ماڭىزدىلىعى تۇرعىسىنان قاراپ، بەينەنى بانكنوتتىڭ بەت جاعىنا ەلەمەنتتەردى كوركەمدىك ورنالاستىرۋ سياقتى ەستەتيكالىق قاعيداتقا سايكەس پايدالاندى»، - دەلىنگەن ۇلتتىق بانكتىڭ جاۋابىندا.

ياعني ۇلتتىق بانك ءۇشىن ۇلتتىق قۇندىلىق ەمەس، اسەمدىك ماڭىزدى بولىپ تۇر.

ۇلتتىق بانك سەرتيفيكات بەرمەيدى

ۇلتتىق بانكتەن سارىلا كۇتىپ جۇرگەن جاۋاپتارى شەتەلدىك فوتوگرافتاردىڭ كوڭىلىنە جاقپاسى انىق. سەبەبى شاعالالاردىڭ الگى فوتوگرافتارعا تيەسىلى ەكەنىن بانك مويىنداۋدان باس تارتتى.

«ولار فوتوگرافيا بولىپ تابىلمايدى. سونىمەن بىرگە ۇلتتىق بانك سەرتيفيكات شىعارمايدى»، - دەپ جاۋاپ بەردى بانك Qamshy.kz جولداعان ساۋالعا.

ەگەر بۋركحارد پەن تەستەر سوتقا جۇگىنسە، ۇلتتىق بانك ءوزىن جانە ۇلتتىق مۇددەلەردى قورعاۋ ءۇشىن زاڭدى قۇقىقتاردى پايدالانا الاتىنىن ايتتى. 

شەتەلدىك سۋرەتشىلەر ەندىگى كەزەكتە قانداي امال قولداناتىندارى بەلگىسىز. ۇلتتىق بانك بانكنوتتىڭ ديزاينىن وزگەرتۋدى دە جوسپارلامايدى.

ال وسى كەزگە دەيىن قولدانىلىپ كەلگەن ەسكى اقشا 2020 جىلدىڭ ماۋسىمىنا دەيىن اينالىمدا بولادى. ودان كەيىن شەتەلدىك فوتوگرافتاردىڭ شاعالالارى مەن تاريحي ماڭىزى جوق ساۋدا ءۇيى بار 500 تەڭگەلىك بانكنوتتى قولدانۋعا ءماجبۇر بولامىز.