قازۇۋ-دا ءۇندى حالقىنىڭ دانا تۇلعاسى، ۇلى ويشىل كارامچاند ماحاتما گاندي اتىنداعى ورتالىق اشىلدى، دەپ جازادى Qamshy.kz اقپارات اگەنتتىگى.
شىعىستانۋ فاكۋلتەتىنىڭ تاياۋ شىعىس جانە وڭتۇستىك ازيا كافەدراسىنىڭ ۇيىمداستىرۋىمەن وتكەن شاراعا ءۇندىستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى پرابحات كۋمار، ءۇندىستان رەسپۋبليكاسىنىڭ الماتى قالاسىنداعى باس كونسۋلى شري مارتين سيرياس سلەمەنس، قازاقستانداعى ءۇندىستان رەسپۋبليكاسىنىڭ اسكەري اتتاشەسى پولكوۆنيك ميلان نالاۆادە جانە قازۇۋ وقىتۋشىلارى مەن ستۋدەنتتەرى قاتىستى.
ءسوز العان قازۇۋ رەكتورى «بۇگىن تۇساۋى كەسىلىپ وتىرعان ورتالىق ءۇندى حالقىنىڭ دانا تۇلعاسى ماحاتما گاندي ەسىمىمەن تىكەلەي بايلانىستى. «الەمنىڭ وزگەرۋىن قالاساڭ، سول وزگەرۋدىڭ العاشقىسى ءوزىڭ بول» – دەگەن ناقىل ءسوزدى مۇرا ەتىپ قالدىرعان ماحاتما گاندي ءۇندىستاندى ۇلىبريتانيادان ازات ەتۋ ءۇشىن كۇرەسكەن عاسىر ادامى.
ءۇندى توپىراعىنىڭ قويناۋىنداعى سىرعا تولى تاريحتى، ونىڭ مادەني باي مۇراسىن، ءۇندى تىلدەرى مەن ادەبيەتىن زەرتتەيتىن مامانداردى دايىنداۋ ماقساتىمەن 1992 جىلى ۋنيۆەرسيتەتىمىزدىڭ شىعىستانۋ فاكۋلتەتىندە ءۇندىتانۋ ءبولىمى اشىلدى. جيىرما التى جىل ىشىندە ءۇندىتانۋ ءبولىمىن حيندي، ۋردۋ تىلدەرىن مەڭگەرگەن ەكى جۇزگە جۋىق شاكىرت ءبىتىرىپ شىقتى. ولاردىڭ ىشىندە، باكالاۆر، ماگيستر جانە PhD دوكتورلار بار.
ءۇندىتانۋشى ماماندار ەل اۋماعىندا عانا ەمەس شەت ەلدەردەگى بەلدى جوو-دا ءوز بىلىمدەرىن شىڭداپ وتىرادى. شىعىستانۋ فاكۋلتەتى، سونىڭ ىشىندە ءۇندىتانۋ ءبولىمى حالىقارالىق باعدارلامالار مەن جوبالار شەڭبەرىندە ۇندىستانمەن ICCR (مادەني بايلانىستار بويىنشا ءۇندى كەڭەسى) باعدارلاماسى، ITEC (حالىقارالىق تەحنيكا-ەكونوميكالىق ىنتىماقتاستىق) باعدارلاماسى اياسىندا ءۇندىستانداعى دەلي ۋنيۆەرسيتەتى، دج. نەرۋ ۋنيۆەرسيتەتى، اگرا قالاسىنداعى حيندي ءتىلى ورتالىقتارى، دجاميا ميليا ۋنيۆەرسيەتى سىندى ۋنيۆەرسيتەتتەرمەن حالىقارالىق بايلانىس جاساپ، اكادەميالىق الماسۋلاردى جۇزەگە اسىرىپ وتىرادى. 2015 جىلدان بەرى ۇلتتىق ۋنيۆەرسيتەتىمىزدە ءۇندىتانۋ ءبولىمى جانىنان ءۇندىستان رەسپۋبليكاسى قارجىلاندىراتىن «شانتي» يوگا ورتالىعى جۇمىس جاسايدى. 2015 جىلدىڭ ناۋرىز ايىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ دەلەگاسياسىنىڭ ىنتىماقتاستىق ورناتۋ جانە تاجىريبەمەن الماسۋ ماقساتىندا ۇلىبريتانيا، ءباا، اقش، سينگاپۋر جانە ت.ب. الەمنىڭ كوپتەگەن مەملەكەتتەرىندە فيليالدارى بار ءۇندىستاننىڭ ءىرى جوو-نىڭ ءبىرى «اميتي» ۋنيۆەرسيتەتىندە، سونىمەن قاتار دەلي ۋنيۆەرسيتەتى جانە ءۇندىستان تەحنولوگيالىق ينستيتۋتىنا رەسمي ءىس ساپارمەن بارۋى ەكى ەل اراسىنداعى حالىقارالىق بايلانىستىڭ سيمۆولى بولماق»، - دەدى عالىم مۇتانوۆ.
كەزەكتە ءسوز العان ءۇندىستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى پرابحات كۋمار: «ماحاتما گاندي كۇرەستى قارۋ كۇشىمەن ەمەس، بەيبىت جولمەن جۇرگىزە وتىرىپ، ۇلى ماقسات جولىندا قانداي دا ءبىر كۇش قولدانۋعا جان-تانىمەن قارسى بولدى. شىن مانىندەگى ۇلت كوسەمى دارەجەسىنە كوتەرىلگەن ول ۇلى مۇرات جولىندا قايتپاس جىگەر تانىتقان تۇلعا. گانديدىڭ ۇلتىنىڭ بولاشاعى جولىندا ەتكەن ەڭبەگىن بۇگىنگى ءۇندى حالقى ماڭگى ەستە تۇتىپ، جىل سايىن كوسەمنىڭ تۋعان كۇنىنە وراي ەسكە الۋ شاراسى وتەدى. بۇگىندە ماحاتما گاندي ورتالىعىنىڭ قازۇۋ-دا اشىلۋى ءۇندىستان مەن قازاقستاننىڭ مىزعىماس دوستىعىنىڭ دالەلى»، -دەدى ەلشى.
شارا بارىسىندا باسقا دا قاتىسۋشىلار قازاقستاندىقتار مەن ءۇندىستان حالقىن بۇگىنگى مەرەكەمەن قۇتتىقتاي وتىرىپ، ءۇندىتانۋ ءبولىمى جانىنان اشىلعان ماحاتما گاندي ورتالىعىندا اتقارىلاتىن ءىس شارالار جەمىستى بولىپ، ەكى ەل اراسىنداعى ءبىلىم، عىلىم، مادەنيەت سالاسىنداعى بايلانىس دوستىق كوپىرى جالعاسىن تابا بەرەدى دەگەن ۇمىتتەرىن جەتكىزدى. سونىمەن قاتار شارا سوڭىندا قازاق، ورىس، اعىلشىن جانە حيندي تىلدەرىندەگى وتاندىق جانە شەتەلدىك ءۇندىتانۋشى-عالىمداردىڭ ماتەريالدارى ۇسىنىلعان كىتاپ كورمەسى ۇيىمداستىرىلىپ، «حيندي-قازاق، قازاق-حيندي سوزدىگى» كىتابىنىڭ تۇساۋكەسەر ءراسىمى ءوتتى.
