باسپانالى بولۋ ءۇشىن وتباسىنىڭ تابىسى 200 مىڭنان كەم بولماعان جاعدايدا، ونىڭ 20 مىڭىن اي سايىن ۇزبەي سالىپ وتىرىپ، ءبىر بولمەلى باسپاناعا قاجەتتى باستاپقى جارنانى 10 جىل بويى جيناۋ كەرەك.  ال پاتەردى قولما-قول ساتىپ الۋ ءۇشىن كەمى 20 جىلداي ۋاقىت قاجەت. بۇل تۋرالى كتك ساراپشىلاردىڭ دەرەگىنە سۇيەنىپ مالىمدەدى.

زەرتتەۋ قورىتىندىسىنا قاراعاندا، ءبىر عانا جالاقىمەن باسپانالى بولۋ بىزدە تىم قيىن. بۇل مۇمكىن بولعاننىڭ وزىندە، قونىس تويىن جىلدار بويى كۇتۋگە تۋرا كەلەدى. مىسالى، وتباسىنىڭ تابىسى 200 مىڭ بولسا، بولاشاق باسپانا ءۇشىن اي سايىن ونىڭ 10 پايىزىن عانا جيناي الامىز. ال، قالعانى كۇندەلىكتى شىعىننان ارتىلمايدى ەكەن. وسىلايشا، تەك ارادا 10 جىل وتكەن سوڭ 1 بولمەلى پاتەرگە قاجەتتى باستاپقى جارنا جينالادى. بۇل ينفلياسيا دەڭگەيىن قوسپاعانداعى ەسەپ. ال، وسىنداي تابىسپەن پاتەردى قولما-قول ساتىپ الۋ ءۇشىن كەمى 20 جىلداي ۋاقىت قاجەت. ايىنا 100 مىڭ تەڭگەدەن جيناۋ ءۇشىن كىرىس كولەمى 350 مىڭ بولۋى ءتيىس. بۇل قارقىنمەن باستاپقى جارنانى 3 جىلدا جيناۋعا بولادى. ال، باسپاناعا يپوتەكاسىز 7-8 جىلدا قول جەتكىزە الاسىز.

پاتەردى 5 جىلدىڭ ىشىندە قولما-قول العىسى كەلەتىندەر بولسا، ايىنا 200 مىڭنان دەپوزيتكە سالىپ وتىرۋلارى كەرەك. ال، 150 مىڭ تەڭگە كولەمىندەگى وتباسىلىق تابىسپەن ءۇيلى بولۋ مۇمكىن ەمەس. ساراپشىلار وسىلاي اشىعىن ايتتى.

«ەگەر وتباسى پاتەر جالداپ تۇراتىن بولسا،150 مىڭ تەڭگە كولەمىندەگى تابىسپەن مۇلدەم اقشا جيناي المايدى. اقشا كۇندەلىكتى شىعىننان ارتىلمايدى. ياعني، مۇنداي تابىسپەن باستاپقى جارنانىڭ ءوزىن جيناۋ مۇمكىن ەمەس جاعداي»، — دەيدى krisha.kz پورتالىنىڭ شولۋشىسى الينا بۋراۆسيەۆا.

جالپى تەزىرەك باسپانا كىلتىن الۋ ءۇشىن، ازاماتتاردىڭ كوپ نارسەگە شەكتەۋ قويعانى ابزال. مامانداردىڭ بۇل كەڭەسى، اسىرەسە، قازاقتار ءۇشىن قيىنداۋ بولعالى تۇر. ويتكەنى، ءۇيلى بولماي، توي جاساماۋ كەرەك ەكەن. تاماقتان دا شەكتەۋ بولعانى ءجون.

 «ەگەر ادام پاتەرلى بولۋدى ماقسات ەتكەن بولسا، وعان تەزىرەك قول جەتكىزگىسى كەلسە، كەي جەرلەردە وزىنە شەكتەۋ قويۋى قاجەت. ماسەلەن، ءبىر كليەنتىمىز باستاپقى جارنانى قىسقا مەرزىمدە جيناۋ ءۇشىن ءتۇرلى تاعامداردان باس تارتقان، وتباسى قىدىرۋدى توقتاتقان. ۇنەمدەۋ ارقىلى 3-4 جىلدا قوماقتى قارجى جيناۋعا بولادى»، — دەپ ءتۇسىندىردى «تۇرعىن ءۇي قۇرىلىس جيناق بانكى» اق فيليالى ديرەكتورىنىڭ ورىنباسارى دياس راقىمجان.

وتكەن جىلى وسىلاي وزىنە كوپ نارسەدەن شەكتەۋ قويعاندار كوپ بولسا كەرەك، تۇرعىن ءۇي نارىعى قاتتى جاندانىپتى. ساۋدا-ساتتىق بىردەن 28 پايىزعا وسكەن. ماماندار بۇعان كليەنتتەرىنە ءتۇرلى مۇمكىندىكتەر بەرىپ وتىرعان قۇرىلىس كومپانيالارى عانا ەمەس، مەملەكەتتىك باعدارلامالاردىڭ دا وڭ اسەر ەتكەنىن ايتادى. ال، سۇرانىسقا جەر ءۇي ەمەس، پاتەرلەر كوبىرەك يە ەكەن.

اسىرەسە، جۇرت، شاعىن باسپانالاردى كوپتەپ ساتىپ العان. اۋماعى ۇلكەندەرىنە قىزىعۋشىلىق تومەن. مۇنى قۇرىلىسشىلاردىڭ ەسكەرگەنى ابزال.ءارى جاڭا ۇيلەر كوبىرەك ساتىلىپتى. بيىل دا تۇرعىن ءۇي نارىعىندا اسا وزگەرىس بولمايدى دەگەن بولجام بار. ال شارشى مەترلەردىڭ باعاسىنا كەلسەك، ول دا 2018 جىلى قاتتى قۇبىلمايدى. سوندىقتان، باسپانالى بولۋدى جوسپارلاعاندار بولسا، باعانىڭ ارزانداۋىن كۇتىپ، ۋاقىتتى سوزۋدىڭ قاجەتى جوق.