الماتى وبلىسىنداعى دەسانتتىق-شابۋىلداۋشى اسكەرلەرىنىڭ 11 اسكەري ءبولىمى اراسىندا «جاۋىنگەرلىك دوستاستىق» سايىسى اياقتالدى. بۇل تۋرالى Qamshy.kz اقپارات اگەنتتىگى حابارلايدى.

دەسانتشىلار بەس كۇن بويى جاركەنت قالاسىندا ورنالاسقان 74261 اسكەري بولىمىندە 5 اسكەري-كاسىبي كەزەڭنەن تۇراتىن سايىستا ب ا ق سىناستى. اسكەري قىزمەتشىلەر كاسىبي بىلىكتىلىگىمەن قوسا جاۋىنگەرلىك دايىندىعى بويىنشا دا باعالاندى. 

3 ەر جانە 1 ايەل ادامنان قۇرالعان ءار كوماندا  ارنايى، اتۋ جانە دەنە دايىندىقتارى بويىنشا جارىسقا ءتۇستى. اتۋ دايىندىعىندا قاتىسۋشىلار جاتىپ اتۋ، تىزەرلەپ اتۋ، تۇرىپ اتۋ سياقتى ءارتۇرلى جاعدايدا قارۋدى جەتىك مەڭگەرگەن مەرگەن ەكەندىگىن دالەلدەدى.   دەنە دايىندىعى كەزەڭىنە گراناتا لاقتىرۋ، 100 م، 1 جانە 3 كم جۇگىرۋ، بەلتەمىرگە تارتىلۋ، ءتۇرلى كەدەرگىلەردەن ءوتۋ، اۆتوماتتى شاشىپ-جيناۋ  سىندى ت.ب تاپسىرمالار ەنگىزىلگەن.

قاتىسۋشىلار بىلەكتەن عانا ەمەس، بىلىمنەن دە سىنالدى. قازاقستان تاريحى مەن حالىقارالىق گۋمانيتارلىق قۇقىق پاندەرىن قامتىعان 50 سۇراقتان تۇراتىن تەست تاپسىرماسى زياتكەردى انىقتاپ بەردى. قورىتىندى كەزەڭدە اسكەريلەر جاۋىنگەرلىك دايىندىقتان بولەك شىعارماشىلىق دارىن يەلەرى ەكەنىن كورسەتتى.    

بۇل «ارمي-2018» حالىقارالىق سايىسىنا دايىندىق كەزەڭى. قامتىلعان كەزەڭدەر سوعىس الاڭىندا ورىن الاتىن جاعدايلارعا نەگىزدەلىپ قۇراستىرىلعان. بۇگىن ءبىز الماتى وبلىسى بويىنشا ۇزدىكتەردى انىقتاتىد. ەندى جەڭىمپازدار دەسانتتىق-شابۋىلداۋشى اسكەرلەرى، قك قۇرلىق اسكەرلەرى بويىنشا ىرىكتەۋ كەزەڭدەرىنە قاتىسىپ، بالكىم حالىقارالىق دەڭگەيگە جولداما الۋى مۇمكىن، - دەپ اتاپ ءوتتى تورەشى سەرجانت امانجول حاسەنوۆ.

سايىس قورىتىندىسى بويىنشا ۇزدىك ناتيجەلەر انىقتالدى. ءبىرىنشى ورىندى الماتى قالاسىندا ورنالاسقان 61993 اسكەري ءبولىمى يەلەندى. اسكەري قىزمەتشى ايەلدەر اراسىندا ءبىرىنشى ورىنعا سارىوزەكتەگى 12740 ءا/ب كىشى سەرجانتى باعلان تالعاتوۆا لايىق دەپ تانىلدى. جەڭىمپازدار گراموتا جانە قۇندى سىيلىقتارمەن ماراپاتتالدى.

«جاۋىنگەرلىك دوستاستىق» سايىسى ارميا حالىقارالىق ويىندارىنىڭ قۇرامىنا بەكىتىلگەن. تمد قاتىسۋشى-مەملەكەتتەرىنىڭ قورعانىس مينيسترلەرى كەڭەسىنىڭ شەشىمىنە سايكەس 2009 جىلدان بەرى وتكىزىلىپ كەلەدى. 

بيىل «ارمي-2018» سايىسى 28 شىلدە مەن 11 تامىز ارالىعىندا التى مەملەكەتتىڭ اۋماعىندا وتكىزىلەدى دەپ جوسپارلانعان.