قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا «Reforms in Kazakhstan: An analytical View» اتتى كىتاپتى تانىستىرۋ راسىمىنە قاتىستى، دەپ حابارلايدى Qamshy.kz اقپارات اگەنتتىگى. بۇل جايىندا اقوردانىڭ باسپا ءسوز قىزمەتى جازدى.

«Reforms in Kazakhstan: An analytical View» اتتى كىتاپتىڭ اۆتورى – قازاقستاننىڭ بەلگىلى مەملەكەت جانە قوعام قايراتكەرى، جوعارى مەكتەپ پەن عىلىم ءىسىنىڭ كورنەكتى ۇيىمداستىرۋشىسى، ەكونوميست عالىم كەنجەعالي ابەن ۇلى ساعادييەۆ.

ءىس-شاراعا مەملەكەتتىك ورگاندار، عىلىمي جانە شىعارماشىلىق قوعامداستىق، بيزنەس وكىلدەرى، جوعارى وقۋ ورىندارىنىڭ رەكتورلارى، سونىمەن قاتار پروفەسسورلار مەن وقىتۋشىلار قۇرامى جانە ەلىمىزدىڭ ستۋدەنتتەر قاۋىمى قاتىستى.

مەملەكەتتىك حاتشى قۇتتىقتاۋ سوزىندە ەلباسى نۇرسۇلتان نازاربايەۆتىڭ ستراتەگيالىق باعدارىنىڭ ماڭىزدى باسىمدىعىنىڭ ءبىرى وتاندىق عىلىمدى دامىتۋ ەكەنىن اتاپ ءوتتى. مەملەكەت باسشىسى بۇكىل تاۋەلسىزدىك كەزەڭىندە عىلىمعا جانە عالىمدارعا ءاردايىم قامقورلىق جاساپ، ەلدەگى اكادەميالىق جانە قولدانبالى زەرتتەۋلەرگە جان-جاقتى قولداۋ كورسەتىپ كەلەدى.

تاۋەلسىزدىك جىلدارى عىلىمي قىزمەتتى باسقارۋدىڭ جاڭا مودەلى، عىلىمدى قارجىلاندىرۋدىڭ زاماناۋي تەتىكتەرى ەنگىزىلدى. ماسەلەن، 2016 جىلى 23 مىڭ عالىم جانە 383 مەكەمە عىلىمي-زەرتتەۋ جۇمىستارىمەن اينالىستى. جالپى، بۇل سالاعا 38 ميلليارد تەڭگە جۇمسالعان.

گۇلشارا ءابدىقالىقوۆا بۇل مونوگرافيا تاۋەلسىزدىك جىلدارىنداعى قازاقستان ەكونوميكاسىنىڭ ماڭىزدى ماسەلەلەرىن تالداۋعا ارنالعانىن، سونداي-اق وندا اۆتوردىڭ قوعامىمىزدى دامىتۋ بارىسىنداعى ءتۇرلى اسپەكتىلەرگە قاتىستى پىكىرى قامتىلعانىن اتاپ ءوتتى. بۇل ەڭبەك بۇكىل الەم ءۇشىن حرەستوماتياعا اينالىپ وتىرعان قازاقستان جولىن تەرەڭنەن تولعايدى.

كىتاپ تەك ءبىزدىڭ ەلدە عانا ەمەس، شەت ەلدەردە دە كەڭىنەن تالقىلانىپ، لايىقتى باعاسىن الدى. ماسەلەن، كەمبريدج ۋنيۆەرسيتەتىنىڭ پروفەسسورى سيدحارت ساكسەن بۇل ەڭبەكتىڭ پوستكەڭەستىك كەڭىستىكتەگى رەفورمالار جونىندە نۇسقاۋلىققا اينالعانىن اتاپ وتكەن. ال ماسكەۋ مەملەكەتتىك ۋنيۆەرسيتەتىنىڭ پروفەسسورى الەكساندر بۋزگاليننىڭ ويىنشا، بۇل باسىلىم – بارلىق مەملەكەتتەر ءوز تاۋەلسىزدىگىنىڭ باستاپقى جىلدارىندا تاپ بولعان جاھاندىق سىن-قاتەرلەردى ەڭسەرۋ ەرەجەلەرىنىڭ وزىندىك ءبىر جيىنتىعى.

ءىس-شارا سوڭىندا مەملەكەتتىك حاتشى گ.ن.ءابدىقالىقوۆا اكادەميك ك.ءا.ساعادييەۆكە مىقتى دەنساۋلىق، باق-بەرەكە، جاڭا شىعارماشىلىق تابىس تىلەدى.