اقتوبەلىك ەرمەك ەسىمدى جىگىت شەشەنستان پرەزيدەنتى رامزان قادىروۆقا ۆيدەوۇندەۋ جولدادى.

«2016 جىلى ءبىزدىڭ قالادا تەراكت بولعاندا العاشقى بولىپ كومەك قولىن سوزعان ءسىز بولدىڭىز. ءبىز مۇنى ۇمىتپايمىز»، - دەپ ءسوزىن باستاعان جىگىت شەشەنستان پرەزيدەنتىنەن كەنەسارى قاسىموۆتىڭ باسسۇيەگىن قازاقستانعا قايتارۋعا كومەك سۇرادى. ۆيدەو YouTube جەلىسىندەگى Kavkaz News Chechnya ارناسىنا جاريالاندى.

«رەسەيدەگى سانكت-پەتەربۋرگ مۇراجايىندا ءبىزدىڭ ۇلى بابامىز كەنەسارى قاسىموۆتىڭ باسسۇيەگى بار. 1837 جىلى ول ۇلت ازاتتىق قوزعالىسىن باسقاردى. ءسىزدىڭ اكەڭىز سەكىلدى ول دا ۇلتىنىڭ قامى مەن ەركىندىگى ءۇشىن كۇرەستى. ءبىراق 1847 جىلى ونى ساتىپ كەتتى. ونىڭ باسىن شاۋىپ، ورىس كوسەمىنىڭ قولىنا تاپسىردى»، - دەدى جىگىت.

سونىمەن قاتار جىگىت پرەزيدەنتتەن پۋتينمەن كەزدەسەردە وسى ءوتىنىشتى جەتكىزۋىن سۇرادى.  

«2016 جىلى دميتريي مەدۆەديەۆ كەنەسارىنىڭ باسسۇيەگىن قايتارۋ ءۇشىن تىرىساتىنىن ايتقان، ءبىراق سوزىندە تۇرمادى. مەن بىلەمىن، ءسىز ءسوزدىڭ ادامىسىز. سول سەبەپتى پۋتينمەن كەزدەسىپ جاتساڭىز، كەنەسارىنىڭ سۇيەگىن قازاقستانعا قايتارۋعا ءوتىنىش ايتساڭىز. ونىڭ ۇستىنە وزگە ادامنىڭ باسسۇيەگىن مۇراجايدا ساقتاۋ دۇرىس ەمەس»، - دەيدى اقتوبەلىك ازامات.