ەلباسى نۇرسۇلتان ءابىش ۇلى «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» جولداۋىندا قاتتى تۇرمىستىق قالدىقتاردى كادەگە جاراتۋ قاجەتتىگىنە توقتالعان ەدى. تۇرمىستىق قالدىقتاردى كادەگە جاراتۋعا بولاتىنىن باتىس قازاقستان وبلىسىنداعى تاسقالا اۋدانىنىڭ تۇرعىنى قانات بۋەنتايەۆ دالەلدەپ بەرگەندەي بولدى. ول نەبارى ون كۇننىڭ ىشىندە كولىكتىڭ جارامسىز دوڭگەلەكتەرىنەن ۇزىندىعى - 8، ەنى 6 مەتر بولاتىن ءتورت تۇلىككە ارنالعان قورا تۇرعىزدى.
– ءقازىر قالتانىڭ قالىڭدىعىنا كەلىپ تىرەلەتىن زامان عوي. تىعىرىقتان قالاي شىعۋ كەرەك دەپ ويلاناسىڭ؟ بىرىنشىدەن، جارامسىز دوڭگەلەكتەردى ىسكە جاراتايىن دەپ قۇرىلىس جۇمىسىنا كىرىسە كەتتىم. ەكىنشىدەن، رەزينانى ورتەۋ ەكولوگياعا زالال. قورانى تاجىريبە جۇزىندە سىناماق بولىپ، سالىپ كوردىم. قىستان ويداعىداي شىقتىق، ەندى گاراج سالۋ ويدا بار. ءار دوڭعالاق ءىشىن توپىراق قوقىس قالدىقتارىمەن تولتىردىم. قۇرىلىسقا 700-گە جۋىق رەزينا جۇمسالدى. ونىڭ ءوزىن ءۇش ايداي جينادىم، – دەگەن قانات ءابىل ۇلىنىڭ بولاشاقتا قوراسىن ءتورت تۇلىككە تولتىرىپ، شارۋاشىلىقپەن اينالىسسام دەگەن نيەتى بار. قانات جارى ەكەۋى ەكى قىز بەن ەكى ۇل تاربيەلەپ وتىر. اكەلەرى قولعا العان ىسكە بالالارى دا قولعابىس ەتەدى. قىستا جىلى، جازدا سالقىن قوراعا قاقپاقتاردى كوشەدەن، كۇل-قوقىستاردان جيناپتى. ەڭبەكقور ازامات وعان ءبىر تيىن دا اقشا جۇمساماعان. تەك ەسكى رەزينالاردى بىر-بىرىنە بەكىتۋ ءۇشىن ارنايى شەگەلەردى 3000 تەڭگەگە ساتىپ العان. ەندى ەسىك پەن تەرەزەنى ورناتۋ عانا قالىپتى.
«ەڭبەك ەپتىلىكتى سۇيەدى» دەمەكشى، ەڭبەكقورلىعى مەن ەپتىلىگىنىڭ ارقاسىندا قانات بىرنەشە جىل بۇرىن اۋلاسىن جەڭىل كولىكتىڭ قاڭقالارىمەن قورشاپ العان. ەكى جۇمادا تۇرعىزىلعان اۋلاعا 43 كولىكتىڭ قاڭقاسى كەتكەن.
-نەگىزى، مۇنى ءبىر كينودان كورىپ، نەگە جاساپ كورمەسكە دەگەن وي كەلدى. جارامسىز تەمىر تۇلپاردىڭ قاڭقاسى دا كادەگە استى، قوقىس تا ازايدى. ءۇيدىڭ اينالاسىندا 20 شاقتى بالا بار. ولارعا، ارينە، ويىن الاڭى قاجەت. ارنايى جەر بولسا، الاڭ سالۋ جوسپاردا بار. ءۇيىمنىڭ جانىندا بوس جاتقان جەردىڭ پايدالانىلماعانىنا بىرنەشە جىلدىڭ ءجۇزى بولدى. ەگەر سول جەردى ماعان بەرسە، جارامسىز جابدىقتاردان سالىنعان ويىن الاڭى كوزدىڭ جاۋىن الىپ تۇرار ەدى، – دەيدى كەيىپكەرىمىز.
