ق ر پرەزيدەنتى نۇرسۇلتان ءابىش ۇلىنىڭ قازاقستان حالقىنا ارنالعان «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا كوتەرىلگەن باستى ماسەلەلەردىڭ ءبىرى – ەلىمىزدىڭ تۇرعىندارىن قولجەتىمدى باسپانامەن قامتاماسىز ەتۋ بولاتىن. وسى ورايدا باتىس قازاقستان وبلىسىنىڭ ورتالىعىنان جەر كولەمى 425 گەكتاردى قۇرايتىن «اقجايىق» جاڭا شاعىناۋدانىنىڭ قۇرىلىسى باستالماق. اتالعان اۋداندا 150 كوپقاباتتى ءۇي، 9600 وقۋشىعا ارنالعان 8 جالپى ءبىلىم بەرەتىن مەكتەپ،9 بالاباقشا، دەنساۋلىق ساقتاۋ نىساندارى مەن 78 بالالار ويىن الاڭىن سالۋ جوسپارلانۋدا. قازىرگى تاڭدا شاعىناۋدان بويىنشا ينجەنەرلىك جەلىلەر مەن قامتۋ جۇمىستارى باستالدى. بۇل تۋرالى وبلىس اكىمى التاي كولگىنوۆتىڭ توراعالىعىمەن وتكەن كەڭەس وتىرىسىندا ورال قالاسىنىڭ اكىمى مۇرات مۇقايەۆ باياندادى.
كەڭەسكە وبلىستىڭ باسقارما باسشىلارى جانە مەكەمە-كاسىپورىن جەتەكشىلەرى قاتىستى.وبلىس ورتالىعىنىڭ دامۋ جوسپارى تالقىلانعان جيىندا قالا اكىمى مۇرات مۇقايەۆ ەلباسىنىڭ بەس الەۋمەتتىك باستاماسىنىڭ ورىندالۋى، «سمارت سيتي» جوباسىن جۇزەگە اسىرۋ، الەۋمەتتىك نىساندار قۇرىلىسى مەن شاھاردى اباتتاندىرۋ تۋرالى بايانداما جاسادى.– ەلباسىمىزدىڭ «نۇرلى جول»، «نۇرلى جەر» سەكىلدى ءبىرقاتار اۋقىمدى باعدارلامالارى جانە وبلىس باسشىلىعىنىڭ قولداۋ كورسەتۋى ناتيجەسىندە قالا بيۋدجەتى جىل ساناپ ارتىپ كەلەدى. بۇگىنگى تاڭدا قالا بيۋدجەتى وتكەن جىلدىڭ وسى كەزەڭىمەن سالىستىرعاندا 52 پايىزعا ارتىپ، 40،6 ميلليارد تەڭگەنى قۇراپ وتىر. اعىمداعى جىلدىڭ ءبىرىنشى توقسانىنداعى قالانىڭ الەۋەتىن ارتتىرۋ باعىتىنا قارالعان قاراجات 14،4 ميلليارد تەڭگەنى قۇرادى. وتكەن جىلى بۇل كورسەتكىش 7،9 ميلليارد تەڭگە بولاتىن. قالا بيۋدجەتىنىڭ باسىم بولىگى ءبىلىم بەرۋ سالاسىنا، تۇرعىن ۇي-كوممۋنالدىق جۇيەنى جەتىلدىرۋ مەن قۇرىلىس سالاسىنا جۇمسالۋدا،– دەدى مۇرات راحمەت ۇلى.
قالا اكىمىنىڭ ۇسىنعان مالىمەتتەرىنە سۇيەنسەك، اعىمداعى جىلعا ارنالعان قۇرىلىس جۇمىستارىنىڭ جالپى كولەمى 13 ملرد. تەڭگەنى قۇرايدى. ونىڭ 80 پايىزى، ياعني 10 ملرد. تەڭگە تۇرعىن ءۇي قۇرىلىسى ءۇشىن كوزدەلسە، 1 820،0 ملن. تەڭگە نەمەسە 14 پايىزى ينجەنەرلىك ينفراقۇرىلىمدى دامىتۋعا باعىتتالعان. وتكەن جىلى باستالعان بەس كوپقاباتتى تۇرعىن ءۇيدىڭ قۇرىلىسى اعىمداعى جىلى جالعاسىن تاپپاق. بيىلعى جىلى «نۇرلى جەر» تۇرعىن ءۇي قۇرىلىسى باعدارلاماسى بويىنشا ەكى تۇرعىن ءۇيدىڭ قۇرىلىسى باستالعان.
– ەلىمىزدەگى يگى باعدارلامالاردى جۇزەگە اسىرۋ ماقساتىندا تۇرعىن ءۇي قۇرىلىسى بويىنشا 14 تۇرعىن ءۇيدىڭ جوبالىق-سمەتالىق قۇجاتتاماسى جاساقتالدى. سونىڭ ىشىندە توعىز تۇرعىن ءۇي زاشاعان كەنتىندە، التى تۇرعىن ءۇي ورال قالاسىنىڭ سولتۇستىك-شىعىس بولىگىندە بوي كوتەرەتىن بولادى. اعىمداعى جىلى كولەمى 159،1 مىڭ شارشى مەتردى قۇرايتىن 3242 پاتەرلى
21 ءۇيدىڭ قۇرىلىسىن جۇرگىزۋ جوسپارلانعان بولاتىن. بۇدان بولەك، بيىلعى جىلى اپاتتى دەپ تانىلعان 14 ءۇيدى بۇزىپ، ورنىنا جاڭا كوپقاباتتى تۇرعىن ءۇي سالۋ كوزدەلۋدە. اتاپ ايتقاندا، قالاداعى ع. قۇرمانعالييەۆ، ع. قاراش، ن. نەكراسوۆ كوشەلەرىنەن ءبىر ۇيدەن، قۇرمانعازى، يۋ. گاگارين كوشەلەرىنەن، ەۋرازيا داڭعىلىنان ءۇش ۇيدەن، ا. سكوروبوگاتوۆ كوشەسىنەن ەكى ءۇي ءسۇرىلىپ، ورنىنا 1500 پاتەرلى كوپقاباتتى ۇيلەر سالىنىپ، اپاتتى جانە توزىعى جەتكەن ۇيلەردە تۇرعان 432 ادام جاڭا تۇرعىن ۇيمەن قامتىلاتىن بولادى. بارلىق باعدارلاما بويىنشا بيىلعى جىلى قالامىزدا 4742 پاتەرگە ارنالعان 35 كوپقاباتتى ءۇيدىڭ قۇرىلىسى جۇرگىزىلدى. بۇل – شاھارىمىزدا بۇرىن-سوڭدى بولماعان كورسەتكىش، – دەدى قالا اكىمى.
كەڭەس وتىرىسىنا ءتوراعالىق ەتكەن وبلىس اكىمى جوسپارلانعان جۇمىستاردىڭ ۋاقتىلى جانە ساپالى ورىندالۋىن قاتاڭ قاداعالاۋدى تاپسىردى.
– قالا ورتالىعى مەن شاعىناۋداندارداعى جولداردى جوندەۋ جۇمىستارىن تەز ارادا باستاۋ كەرەك. كوكتەمنىڭ شۋاقتى كۇندەرىن ءتيىمدى پايدالانۋ ءۇشىن وتكەن جىلدىڭ سوڭىندا قاراجاتىن قاراستىرىپ، مەردىگەرلەردى انىقتادىق. ەندى ۋاقىت جوعالتپاي، جۇمىسقا كىرىسكەن ءجون. ينجەنەرلىك جۇيەلەردى جوندەۋدى دە ۇزاتپاعان دۇرىس. جاتاقحانا سالۋ جۇمىستارىنا مەملەكەتتىك-جەكە مەنشىك ارىپتەستىك اياسىندا كاسىپكەرلەردى كوپتەپ تارتۋ كەرەك. قوعامدىق كولىككە كەلەر بولساق، اۆتوپارك باسشىلارىمەن سويلەسىپ، اۆتوبۋستاردى جاڭارتۋدى قاتاڭ جۇكتەۋ كەرەك. ءبىز ولارعا كولىك جاڭعىرتۋعا ۋاقىت بەردىك. ناتيجەسىن سۇرايتىن كەز كەلدى. جول جوندەۋ جۇمىستارىن جۇرگىزگەندە ءبىرىنشى كەزەكتە قوعامدىق كولىك جۇرەتىن نەگىزگى جولدار قامتىلۋى ءتيىس. سونىمەن قاتار باسىم باعىتتى بيىلعى كوكتەمدە قيىندىق تۋدىرعان كوشەلەرگە سالۋىمىز قاجەت. وبلىس پەن قالانىڭ بيۋدجەتى بەكىتىلدى، اتقارىلاتىن جۇمىستار مەن مەردىگەرلەر انىقتالدى. ەندى ۋاقىت جوعالتپاي ىسكە كىرىسۋىمىز كەرەك، – دەدى كەڭەس وتىرىسىن قورىتىندىلاعان وبلىس اكىمى التاي كولگىنوۆ.
