«دوستىق» سپورت كەشەنىندە باسكەتبولدان قازاقستان چەمپيوناتىنىڭ اياسىندا فينالدىق كەزدەسۋلەر ءوتتى. ەل ءبىرىنشىلىگىندە ەكى ۇمىتكەر «الماتىلىق لەگيون» مەن «قازىعۇرت» كوماندالارى قىزىقتى دا تارتىستى ويىن ۇلگىسىن كورسەتتى. باسكەتبولشىلار بارىن سالىپ، ب ا ق سىناستى. ويىنشىلاردىڭ جەڭىسكە دەگەن ىنتالارى العاشقى ساتتەردەن-اق بايقالدى. دەگەنمەن، ءبىرىنشى كەزەڭدى الماتىلىقتار 36:17 ەسەبىمەن ءساتتى اياقتادى. الايدا، ماچتىڭ ەكىنشى جارتىسىندا شىمكەنتتىكتەر الاڭ قوجايىندارىن قۋىپ جەتىپ، ەسەپتى تەڭەستىرە الدى، 36:36.
ويىننىڭ سوڭىنا قاراي ەكى كوماندا اراسىنداعى شيەلەنىس ارتا ءتۇستى. باسكەتبولشىلار بىردەي دەڭگەيدە باستەستى. ءۇشىنشى كەزەڭدى الماتىلىقتار قارسىلاستارىن ءۇش ۇپاي ايىرماسىمەن جەڭدى، ەسەپ 58:55. سوڭعى شەشۋشى كەزەڭدە باسىمدىق ءبىر كوماندادان ەكىنشىسىنە ءوتىپ وتىرعانىمەن، سوڭىندا «الماتىلىق لەگيون» سپورتشىلارى جينالىپ، قارسىلاستارىن تىزە بۇكتىردى. ماچ الماتىلىقتاردىڭ جەڭىسىمەن، 82:74 ەسەبىمەن ءوز مارەسىنە جەتتى.
– ويىن قيىن بەرىلدى، سوڭعى مينۋتقا دەيىن باسىمدىق قاي كوماندادا ەكەنى بەلگىسىز ەدى. بۇل كوپتەن كۇتكەن جەڭىس، الماتىلىقتاردى قۇتتىقتايمىن، ءبىزگە قولداۋ كورسەتكەن باسكەتبول جانكۇيەرلەرىنە العىس ءبىلدىرەمىن. ويىننىڭ ەكىنشى جارتىسىندا كىشكەنە قاتەلىكتەر جىبەرىلدى، ونىڭ ۇستىنە قارسىلاستار دا مىقتى بولدى. ەكى كوماندا دا بارىن سالىپ وينادى، سوندىقتان دا ۇپاي ايىرماسى كوپ ەمەس، – دەيدى «الماتىلىق لەگيون» كومانداسىنىڭ كاپيتانى ۆسيەۆولود فادەيكين.
سونىمەن قاتار، «سينەگورە» مەن استانالىق «تيگر» كوماندالارى دا كەزدەسىپ، ءۇشىنشى ورىن ءۇشىن تالاستى. ماچ ناتيجەسى بويىنشا 78:68 ۇپايمەن «سينەگورە» باسكەتبولشىلارى جەڭىسكە جەتتى. ال «بارس» پەن «اتىراۋ بارىستارى-2» بەسىنشى ورىندى ساراپقا سالدى. بۇل ماچتا «بارسى اتىراۋ بارىستارى-2» قارسىلاستارىن 101:74 ەسەبىمەن ويسىراتا ۇتتى.
ەل چەمپيوناتىندا كوماندالار تۋرنير كەستەسىندە وسىلايشا جايعاستى. جەڭىمپازدار مەن جۇلدەگەرلەردى الماتى قالاسى دەنە شىنىقتىرۋ جانە سپورت باسقارماسىنىڭ جانە باسكەتبول فەدەراسياسىنىڭ وكىلدەرى ماراپاتتادى. جەڭىمپاز كوماندالارعا كۋبوك، مەدالدار تابىستالدى.
