الەۋمەتتىك مۇمكىندىگىڭىزدەن ايىرىلىپ قالماڭىز.

الماتى قالاسى ايماقتىق كوممۋنيكاسيالار قىزمەتىندە  2017–2021 جىلدارعا ارنالعان ناتيجەلى جۇمىسپەن قامتۋ جانە كاسىپكەرلىكتى دامىتۋ باعدارلاماسى مەن جاڭا فورماتتاعى الەۋمەتتىك كومەكتى جۇزەگە اسىرۋ ماسەلەلەرى بويىنشا وتكەن باسپا ءسوز  بريفينگىندە الماتى قالالىق جۇمىسپەن قامتۋ جانە  الەۋمەتتىك باعدارلامالار باسقارماسىنىڭ باسشىسى مەيىرجان وتىنشييەۆ وسىلاي دەيدى. جۋرناليستەرمەن بولعان بۇل سۇحباتتاسۋعا باسقارما باسشىسىمەن بىرگە الماتى قالالىق جۇمىسپەن قامتۋ ورتالىعىنىڭ ديرەكتورى  مەيرام سۇيىندىكوۆ قاتىستى.

جۇمىسسىزدىق پەن الەۋمەتتىك ماسەلە قازىرگى   كەزدەگى وزەكتى ماسەلەلەردىڭ ءبىرى بولعاندىقتان بولار، جۋرناليستەردىڭ   وسى ەكى سالاعا جاۋاپتى باسشىلارعا قوياتىن ساۋالدارى از بولعان جوق. حالىقتى جۇمىسپەن قامتۋ، الەۋمەتتىك جاعىنان از قامتىلعان تۇرعىندارعا الەۋمەتتىك قولداۋ كورسەتۋ، مۇقتاج ازاماتتارعا  ارناۋلى كومەكتەر كورسەتۋ، مۇمكىندىگى شەكتەۋلى تۇلعالارعا الەۋمەتتىك كومەك كورسەتۋ، ناتيجەلى جۇمىسپەن قامتۋ جانە  جاپپاي كاسىپكەرلىكتى دامىتۋ  ماسەلەلەرى بويىنشا جۋرناليستەر تاراپىنان قويىلعان ساۋالدارعا جاۋاپ بەرگەن  باسشى­لاردىڭ بەرگەن مالىمەتىنە سۇيەنسەك، قالا­مىزداعى  جۇمىسسىزدىق پەن الەۋمەتتىك ماسەلەلەردى وڭتايلى شەشۋ باعىتىندا اتقارىلىپ جاتقان جۇمىستار جامان ەمەس كورىندى. جالپى، الماتى قالاسى بويىنشا قازىرگى كەزدە جۇمىسسىز   ادامدار سانى 8600 ادامدى قۇرايدى ەكەن. وتكەن 2017 جىلى  حالىقتى جۇمىسپەن قامتۋ شارالارىمەن 34 708 ادام قامتىلىپتى. تەگىن كاسىپتىك ءبىلىم الۋعا   2500  9–11 سىنىپ وقۋشىلارى تارتىلسا، قىسقا مەرزىمدى وقۋلارعا 3004 ادام جىبەرىلگەن. 15 374 ادام  تۇراقتى جۇمىسپەن قامتىلسا، 4060 ادام ۋاقىتشا جۇمىس ورىندارىنا جىبەرىلگەن. وتكەن جىلى  جۇمىسسىزدارعا جانە ءوزىن-وزى جۇمىسپەن  قامتىپ جۇرگەن ازاماتتارعا نەسيە بەرۋ ماقساتىندا بيۋدجەتتەن ءبىرىنشى رەت قوماقتى قاراجات بولىنگەن بولاتىن. بۇل  مۇمكىندىكتى پايدالانعان 43 ادامعا 662 ميلليون تەڭگە كولەمىندە شاعىن نەسيە بەرىلىپتى. ال بيىلعى  جىلى  جۇمىسسىز  جانە ءوزىن-وزى جۇمىسپەن قامتىپ جۇرگەن 150 ازاماتقا 100 اەك كولەمىندە  گرانت بەرۋ قاراستىرىلىپ  وتىر ەكەن.  جاڭا  فورماتتاعى الەۋمەتتىك كومەك قالامىزداعى 287 وتباسىنا تاعايىندالىپتى. اڭگىمە بارىسىندا وزدەرىنىڭ الەۋمەتتىك مارتەبەلەرىن  انىقتاماۋعا اسىعىستىق تانىتپاي جۇرگەن ازاماتتار  ماسەلەسى دە  ءسوز بولدى. ولار وزدەرىنىڭ تابىس كوزىن جاسىرعانمەن، وزدەرىنە تيەسىلى الەۋمەتتىك  يگىلىكتەردى پايدالانۋدان تىس قالادى. زەينەتاقى قورىنا، ءمامس قورىنا جارنا تولەۋدەن قالىپ قويادى. ال بۇل دەگەنىڭىز، ەڭ الدىمەن، ادامنىڭ ءوزىنىڭ  جەكە باسىنا كوپتەگەن كەدەرگى كەلتىرەدى   وزدەرىڭىز بىلەسىزدەر، كەلەر جىلدان باستاپ مەديسينالىق ساقتاندىرۋ جۇيەسى ەندىرىلەتىن بولسا، جۇمىسسىز رەتىندە تىركەلمەگەن  ازاماتتار  مەديسينالىق كومەكتەن سىرت قالىپ قويۋى مۇمكىن دەيدى، – الماتى قالالىق جۇمىسپەن قامتۋ باسقارماسىنىڭ باسشىسى مەيىرجان باتىربەك ۇلى. ءقازىر  الماتى قالاسى بويىنشا الەۋمەتتىك مارتەبەسى انىقتالماعان ازاماتتاردىڭ 600ء-ى عانا كەلىپ، جۇمىسسىز رەتىندە تىركەلگەنىن ايتقان الماتى قالالىق جۇمىسپەن قامتۋ ورتالىعىنىڭ ديرەكتورى مەيرام سۇيىندىكوۆ ازاماتتاردى الەۋمەتتىك مارتەبەلىرىن انىقتاپ، مەملەكەت تاراپىنان كورسەتىلىپ وتىرعان قولداۋلارعا قول جەتكىزۋلەرىن ەسكەرتتى. م.وتىنشييەۆ ءوز ءسوزىن كۇنى كەشە عانا تۇساۋى كەسىلگەن «بەلسەندى ۇزاق ءومىر ءسۇرۋ» جول كارتاسى توڭىرەگىندەگى جاقسى  اڭگىمەلەرىمەن  قورىتىندىلادى.  بۇل جيىن­نان تۇيگەنىمىز،  ەندى   الەۋمەتتىك جاعىنان از قامتاماسىز ەتىلگەن قالا تۇرعىندارى   جاردەم­اقىعا  ارقا سۇيەمەي، ەڭبەك ەتۋگە بەيىمدەلمەك.   ءتيىستى سالا قىزمەتكەرلەرى ۇسىنعان  جۇمىستان باس تارتقان جاعدايدا، ەڭبەككە قابىلەتتى مۇشەلەرى بار وتباسى  الەۋمەتتىك كومەكتەن قۇر قالۋى دا ابدەن مۇمكىن كورىنەدى.  اتالعان جاڭا جۇيە الەۋمەتتىك كومەك الۋشىلاردىڭ الەۋمەتتىك جاۋاپكەرشىلىگىنىڭ وسۋىنە، جۇمىس ىزدەۋگە جانە ءوزىن-وزى قامتاماسىز ەتۋگە دەگەن قۇلشى­نىستارىن ارتتىرۋعا، سونداي-اق، از قامتىلعان ازاماتتاردىڭ ەل ەكونوميكاسىنا جانە قوعام ومىرىنە قاتىسۋ دەڭگەيىن ارتتىرۋعا ىقپال ەتەدى، دەيدى   حالىقتىڭ الەۋمەتتىك احۋالىنا جاۋاپتى سالا باسشىلارى.