وبلىستىق مادەنيەت جانە تىلدەردى دامىتۋ باسقارماسى، وبلىستىق مادەنيەت جانە حالىق شىعارماشىلىعى ورتالىعىنىڭ ۇيىمداستىرۋىمەن "نۇرلى جول - بولاشاققا باستار جول" وبلىستىق ونەر فەستيۆالى تۇلكىباس اۋدانىندا ءوتتى.

اۋداندىق، اۋىلدىق اكىمدىك قىزمەتكەرلەرى، ارداگەرلەر كەڭەسى جانە اجەلەر كەڭەسىنىڭ ءتوراعالارى مەن ءتورايىمدارى، مادەنيەت سالاسى قىزمەتكەرلەرى مەن بۇقارالىق اقپارات قۇرالدارى فەستيۆال قوناقتارىن اۋدان شەكاراسىنان كۇتىپ الىپ، ايماقتىڭ تىنىس-تىرشىلىگى جونىندە اڭگىمەلەپ، كيەلى، تاريحي ماڭىزى جونىندە مالىمدەدى.

شارا كەلتەماشات اۋىل وكرۋگىندە تۇلكىباس اۋداندىق  ارداگەرلەر كەڭەسىنىڭ ءتوراعاسى وڭلاسىن قۇلبەكوۆتىڭ ءتورت جىلدان بەرى 200-دەن اسا جادىگەردى ءوز قولىمەن جيناقتاعان "اۋىل تاريحى" مۇراجايىمەن تانىسۋدان باستاۋ الدى. اۋدانىنداعى كيەلى، تاريحي جەرلەردى ناسيحاتتاۋعا ارنالعان "مادەني مۇرا" باعدارلاماسى اياسىندا قازاقستاننىڭ كيەلى جەرلەرى تىزىمىنە ەنگەن "تامشى" اۋليەگە قۇران باعىشتالىپ، قاريالار تاۋ مەن سۋ  شەجىرەسىنەن سىر شەرتتى. ايماقتىڭ ايشىقتى اتىن بارشاعا تانىتىپ، سۇلۋلىق پەن ادەمىلىكتىڭ سيمۆولىنا اينالعان شۇبايقىزىل شوقىسىنداعى قىزىل كىلەم قىزعالداقتار القابى دا نازاردان تىس قالمادى.

فەستيۆال اياسىندا اۋدانداعى مادەنيەت ۇيلەرى مەن كلۋب مەكەمەلەرىنىڭ حالىق شىعارماشىلىعىن دامىتۋ ماقساتىندا اتقارىلعان جۇمىستارى، ەلدىمەكەنىڭ تاريحى مەن گەوگرافيالىق ەرەكشەلىگىن كورسەتەتىن ستەند كورمەلەر تانىستىرىلىپ، اۋدان ونەرپازدارىنىڭ فلەشموبى مەن ۇلتتىق ويىندارى جانە  گالا-كونسەرتكە جالعاستى.

"نۇرلى جول-بولاشاققا باستار جول" وبلىستىق ونەر فەستيۆالى  باسپا ءسوز كونفەرەنسياسىمەن قورىتىندىلاندى.  باسقوسۋعا م.اۋەزوۆ اتىنداعى ءوقمۋ-نىڭ اعا وقىتۋشىسى، قازىلار القاسىنىڭ ءتورايىمى جۇماباي ءلايلا جۇمابەك قىزى، قازىلار القاسىنىڭ مۇشەلەرى كومپوزيتور، قازاقستان كومپوزيتورلار وداعىنىڭ مۇشەسى، وقو كومپوزيتورلار قاۋىمداستىعىنىڭ ءتورايىمى ساتمۇحامبەتوۆا قۇرالاي  شايزادا قىزى، «Qazaqstan» ۇلتتىق ارناسىنىڭ «ەلدەن حابار» جانە «Ontustik» تەلەارناسىنىڭ «ەل مەن جەر» باعدارلامالارىنىڭ رەداكتورى، ق ر مادەنيەت قايراتكەرى اتابەك مۇحتار ورىنتاي ۇلى، وبلىستىق مادەنيەت جانە حالىق شىعارماشىلىعى ورتالىعىنىڭ حالىق شىعارماشىلىعى ءبولىمىنىڭ مەڭگەرۋشىسى نۇرماعامبەتوۆ مۇراتباي قۋانتقان ۇلى، وبلىستىق مادەنيەت جانە حالىق شىعارماشىلىعى ورتالىعىنىڭ رەداكتورى ايتپەنبەتوۆا مادينا جۇماباي قىزى جانە اۋداندىق مادەنيەت جانە تىلدەردى دامىتۋ ءبولىمى قىزمەتكەرلەرى مەن مادەنيەت ءۇيى، كلۋب مەكەمەلەرىنىڭ مەڭگەرۋشىلەرى، زيالى قاۋىم جانە بۇقارالىق اقپارات قۇرالدارى قاتىستى.

وتىرىس بارىسىندا فەستيۆالدى ۇيىمداستىرۋ مەن سەنارييلىك قۇرىلىمى، ساحنا مادەنيەتى، ۇيىرمە جۇمىستارىن جانداندىرۋ جانە ولارعا قولداۋ كورسەتۋ سىندى كوپتەگەن ماسەلەلەر ورتاعا سالىندى. 

تۇلكىباس اۋدانىنداعى مادەنيەت جانە تىلدەردى دامىتۋ بولىمىنە قاراستى مەكەمەلەر جىل باسىنان بەرى 1555 ءىس-شارا وتكىزسە، ونىڭ ءبىرقاتارى "رۋحاني جاڭعىرۋ" باعدارلاماسىن ناسيحاتتاۋعا ارنالعان. اۋدان كولەمىندە 10 مادەنيەت ءۇيى، 19 اۋىلدىق كلۋب جۇمىس جاسايدى. جاس دارىنداردى حالىق شىعارماشىلىعىنا باۋلۋ، شىڭداۋ ماقساتىندا 72 ۇيىرمەدە 732 قاتىسۋشى بار. سونداي-اق، اعىمداعى جىلى 7 اۋىلدىق كلۋب دىبىس كۇشەيتكىش اپپاراتۋراسىمەن جابدىقتالعان.